Read Kahua JOANE 6 Bible Online

JOANE 6 - Kahua bible

JOANE 6

¹Ma hemuri o Jesu ki tarê igê na Rano i Galilea (ga hêtana nikâ, vi na Rano Tiberiasi).

²Rako era na enoni, ga tare suria, renia ngaira ka bani bâsigi na mena, i tanugi, matena i hagakomagara na enoni.

³O Jesu ma na kariana ka tagere igê na kere hungana, ma ka oga igê.

⁴Na Tangiana Raha na Paseka iata na Siu ki hagarangi me noga.

⁵O Jesu ki sira râ, ma ki bâsira rako era na enoni, ga arâ me tanga. Tahema ngaia ki hagatea o Pilipo, ki vi: “I he kaniga girara, ga vurivuri igê na ngêra, i ararira na enoni hato ngegê, hanana vi ga ngêngê masu?”

⁶Ngaia ki tamasi vikana, hanana vi uhungia o Pilipo, ma ngaia marena ki bani girara hete na tarana ta kani page katoa.

⁷O Pilipo ki arami, ki vi: “Na haga, na enoni ga girara vi ga ngêngê re na kere bereti sisite, ki araria na haga na meni na tagaraha igê na tangiani tangarê gi rua.”

⁸Mo Anterea, o vesina o Simone Petero, ngaia ka na hitangita na kariana, ki vi tanga o Jesu, ki vi:

⁹“Na kere mane ikê ki nahunigi na guani gi rima na bereti na koni ma na siare gi rua. I bara, vi ge ararira na enoni hato agini, hanana vi ge ngê masu!”

¹⁰O Jesu ki vi tangarerua, ki vi: “Muru vi tangara na enoni, ke oga so i ano.” (I ngekana ka rako igê na go koro, tanga ga goga so igê.) Vikana na enoni hato ka oga so. I berarogata na enoni ngegê ka vora na ararina na rehagaro gi rima na mane.

¹¹O Jesu ki têgi na bereti, ma ki visia koro God renigi, ma ki vatungira na enoni renigi. Tagenana ma renirerua na siare, ma ngaira hato ka ngê ararira, hanana ga ngê masu.

¹²Matena ga bani ngê masu, o Jesu ki vi tangara na kariana, ki vi: “Mu ruguni haku na ngêra, ga hita, i era ma, ka erasigi.”

¹³Ngekana ngaira ka ruguni ma ka hagavunusigi na heni tangahuru matarerua renigi na ngêra, ga hita; ngaigi ki na apigani na guani na bereti na koni gi rima.

¹⁴Matena na enoni ka bâsia na mena, i katoa o Jesu, ngaira ka vi: “I monari, ngaia ki na poropete, na Buka Apuna i bani visia, vi page arâ me.”

¹⁵O Jesu ki bani girara, vi ngaira ka sugia ma, vi ge râ me, ke ranguia ma ke kasia, ke araha, henaka vi ngaia ki pe obania. Tahema ngaia ki gava, ki akê ngavê igê na hungana, ngaia getea.

¹⁶I manurahi, ma na kariana o Jesu ka rere tanga na rano.

¹⁷Ngaira ka tage igê na kere haka, hanana vi ga aporo tarê igê na rano tanga i Kapenamu. I bungi me noga, mo Jesu ki mamênga, vi ge mataruhira me.

¹⁸I na matena ngekana na roga ki ramo, ma ki katoa na rano, ki aroborobo.

¹⁹Matena na kariana ka haruta ka hagarangi tarê, ngaira ka bâsia o Jesu, i arâ i basina na rano. Ngaia ki hagarangia me na kere haka, ma ngaira ka magu ngavê.

²⁰O Jesu ki vi tangara, ki vi: “Inê nga! Siana kamu magu!”

²¹Ngaira ka obania, vi ga torea igê na kere haka, ma na kere haka ki goto ototo râ i one igê na agua, ga tabea.

²²I na tangiana i muri na hakuta na enoni, ga oga vê, ka kahu takusia, vi na kere haka gi tage togo ma ki oga i ngekana i nanora. Ngaira ka girara, vi o Jesu ki pe tage henira na kariana. Ngaira ka pania so.

²³Tani na kere haka, ga râ me tenia i hinua i Tiberiasi, ka goto hagarangia na agua, na Araha i visia koro igê God renigi na bereti ma na hakuta na enoni ka kahu ngê.

²⁴Matena na hakuta na enoni ka girara, vi o Jesu ki mareha i ngekana ma na kariana ka mareha nogata, ngaira ka tagirigi na kere haka i ngegana, ma ka râ i Kapenamu, ka bâbâ igê renia o Jesu.

²⁵Matena na enoni ka tarahua o Jesu i na apanena tarê na rano, ngaira ka hagatea, ka vi: “Rabai, keta kanigo arâ me ikê?”

²⁶O Jesu ki arami, ki vi: “I monari, be vi tangagamu: igamu kamu bâbâ reniê, suria ma igamu kamu ngê masu renigi na bereti, mareha vi suria igamu kamu giraragi na girarani na mena iaku.

²⁷Siana kamu tagara tangagi na ngêra, ga girara kakaga se ga marasi, ma kamu tagara hete tanga na ngêra, i girara i votoa na mauriha mora ma tarema. O Karena Enoni ki page vategamu na ani ngekê na ngêra, renia God Vaemana ki hagabângenia, vi bani vatea na raramohana.”

²⁸Ngaira ka hagatea, ka vi: “Na ta kani tuguhigami, vi gami katogi, hanana mi tanugi na marâ, God i bonasigami renigi?”

²⁹O Jesu ki arami, ki vi: “Na marâ, God i obanigamu, vi gamu tanugi, ki manga ikê: mu tongesuria na ani, i bani hagatorangenia.”

³⁰Ngaira ka hagatea, ka vi: “Na ani ta na mena kanigo page tanua, hanana mi rigia ma kami tongesurigo renia?

³¹Na êvarika ka ngêgi na bereti na mana igê na bagamasusu raha, suria na Buka Apuna ki vi, ‘Ngaia ki hagangêra renigi na bereti, ga râ me tenia God.’”

³²O Jesu ki vi: “I monari, be vi tangagamu: na ngêra, i vategamu o Moise, ki mareha vi na bereti, ge râ me tenia God. Ngaia nga o Vaemaku kani vategamu na bereti mora, i râ me tenia God.

³³Suria na bereti, God i votoa, ngaia ki na ani, i râ me tenia God, ma ki votoa na mêriha mora tangara na enoni hato i maveta.”

³⁴Ngaira ka nungia, ka vi: “Araha, vategami tare na bereti ngekê.”

³⁵O Jesu ki vi tangara, ki vi: “Inê nga ki na bereti na mauriha mora ma tarema. Manga na enoni, ma ki arâ me i pasiku, ma ki tongesuriê, ngaia ki asa iana hagetage, vi ge page magê, se vige pasi tono.

³⁶Hoi, inê kê bani vi tangagamu, henaka igamu kamu bani bâsiê, igamu kamu pe tongesuriê.

³⁷Na ara ni enoni, o Vaemaku ki vateê me, ngaia ki page hakuniê. I asa, be kitenia na enoni, i hakuniê,

³⁸renia inê kê râ me tenia God, hanana gê katoa na obaniha iana na ani, i hagatorangeniê, mareha vi na obaniha iaku mareku inê.

³⁹Na obaniha iana na ani, i hagatorangeniê, ki manga ikê: i tuguhiê, vi siana kê naka vê ta na enoni, hanana vi ge pe tahitahi, ma ki tuguhiê hete, kê hagamaurira hato igê na hagahato tangiani.

⁴⁰Renia na obaniha iana o Vaemaku ki manga ikê: na enoni hato, ga bâgirara o Karena ma ka tongesuria, ki tuguhira, ga nahunia na mauriha mora ma tarema. Ma inê kê page hagamaurira igê na hagahato tangiani.”

⁴¹Na Siu ka haganega ka tamasi ngurunguru so mareta renia, suria ngaia ki vi: “Inê nga ki na bereti, i râ me tenia God.”

⁴²Tahema ngaira ka hehagateri, ka vi: “O Jesu nge kini, o karena o Josepo, iê? Igia ka girararerua na enana. Tanu hega kani vi, vi ngaia ki râ me tenia God?”

⁴³O Jesu ki arami, ki vi: “Siana kamu tamasi ngurunguru so maremi.

⁴⁴I asa ta na enoni, vi ge hakuniê, manga vi o Vaemaku, i hagatorangeniê, ma ki pe unia me tangê. Ma inê kê page hagamauria igê na hagahato tangiani.

⁴⁵Na poropete ka bani sege, ka vi, ‘God ki page hagesurira na enoni hato.’ Na ara ni enoni, i rongoa maninga o Vaemaku ma ki tê viteana, ngaia ki hakuniê.

⁴⁶Mareha vi ge vi, vi ta na enoni ki bani bâsia o Vaemaku. Na ani, i râ me tenia God, ngaia getea ma ki na ani, i bani bâsia o Vaemaku.

⁴⁷“I monari, be vi tangagamu: na enoni, i tongesuriê, ki nahunia na mauriha mora ma tarema.

⁴⁸Inê nga ki na bereti na mauriha mora ma tarema.

⁴⁹Henaka na êvarimi ka bani ngêgi na bereti na mana igê na bagamasusu raha, ma ngaira ka me.

⁵⁰Ma na bereti, na ani ngekê i râ me tenia God, ki pe manga ngekana. Na enoni, i ngaua, ki asa iana, vi ge page me.

⁵¹Inê nga ki na bereti na mauriha mora ma tarema, i râ me tenia God. Manga ta na enoni, ma ki ngaua na bereti ngekê, ngaia ki page mauri tare ma tarema. Ma na bereti, gê page vatea, ngaia ki na hasigoku, gê tagarenia, hanana na enoni i maveta ka nahunia na morana na mauriha renia.”

⁵²Na Siu ka hetuguri so mareta renia na tamasinga ngekana. Ngaira ka hehagateri, ka vi: “Tanu hega o vani akini kani girara i vategia na hasigona, hanana vi ga ngaua?”

⁵³O Jesu ki vi tangara, ki vi: “I monari, be vi tangagamu: manga igamu, ma kamu pe ngaua na hasigona o Karena Enoni, ma kamu pe tonomia na gapuna, na morana na mauriha ki asa, vi ge oga i pasimi.

⁵⁴Na enoni, i ngaua na hasigoku ma ki tonomia na gapuku, ngaia ki nahunia na mauriha mora ma tarema, ma inê kê page hagamauria igê na hagahato tangiani.

⁵⁵Renia na hasigoku ki na ngêra mora monari, ma na gapuku ki na tono mora monari.

⁵⁶Na enoni, i ngaua na hasigoku, ma ki totono na gapuku, ngaia ki ama ni gâga nga i pasiku, ma inê kê ama ni gâga nga i pasina.

⁵⁷O Vaemaku, i votoa na mauriha, ngaia ki hagatorangeniê. Ma renia ngaia inê nogaku kê votoa na mauriha. I tagenana ma, na enoni, i ngauê, inê kê page hagamauria.

⁵⁸Bâ, ngaia nga ki na bereti, i râ me tenia God. Ngaia ki pe manga na bereti, na êvarimi ga ngêa ma hemuri ka me. Ma na enoni, i ngaua na bereti na ani ngekê, ngaia ki page mauri tare ma tarema.”

⁵⁹Na marâ hato ngegana o Jesu ki visigi, matena i hagesurira na enoni i ruma ni sukuru i Kapenamu.

⁶⁰Rako na kariana o Jesu, ga rongoa na tamasinga ngekana, ka vi: “Na hagesuringa ngekana ki bara. Ti kani pasi rongoa?”

⁶¹O Jesu ki bani girara, vi na kariana ka tamasi ngurunguru so mareta renia na tarana ngekana, henaka i mareha rârâ ta na enoni, vi ge hagarongoa renia. Ma ngaia ki vi tangara, ki vi: “Na tamasinga ngekana ki katogamu vari, kamu kasia na tongesuriha?

⁶²Hoi, ata ni vi ma: manga mu bâsia o Karena Enoni, i aporo akê i pasina, i bani oga igê i nago, ki hega?

⁶³Ngaia nga ki na Higona Apu, i votoa na mauriha mora. Ma tanga na enoni na tarana ngekana ki bara ngavê. Renigi na tamasinga, gê bani visigi tangagamu, na Higona Apu, i votoa na mauriha, ki angarigamu.

⁶⁴Henaka i manga ngekê, ma tani i pasimi ka pe tongesuriê.” (Tenia na matena o Jesu ki haganega, ngaia ki bani girarara na ani, ga pe tongesuria, ma na ani, i page hagavuringenia.)

⁶⁵Ma ngaia ki vi nikâ: “Renia na tarana nga ngekana, tahema inê kê bani vi tangagamu, kê vi, i asa ta na enoni, vi ge hakuniê, manga vi o Vaemaku ma ki pe naka me, ke hakuniê.”

⁶⁶Tahema, haganega tenia i ngekana, ka rako na kariana ga aporo tenia, ma ka hato tenia, vi ge takua.

⁶⁷Vikê o Jesu ki vi tangara na kariana tangahuru matarerua, ki vi: “Ma igamu kamu hega? Igamu kamu obania nogami vari, vi gamu aporo?”

⁶⁸O Simone Petero ki arami, ki vi: “Araha, ma ti nikâ kanimi page hakunia? Igo nga ki na ani, go girara go votoa na mauriha mora ma tarema renigi na tamasinga iamu.

⁶⁹Igami kami tongesuria ma kami bani girara, vi igo ki na ani, God i bani surua, vi hagatorangenigo me.”

⁷⁰O Jesu ki arami, ki vi: “I hega, inê kê pe bani ategamu, na ani tangahuru matarerua? Henaka i manga ngekana, ma na hitangimi ki manga Satana!”

⁷¹Ngaia ki tamasi renia o Juta, o karena o Simone Isikariote. Suria, henaka o Juta ki na hitangita na kariana tangahuru matarerua, ma ngaia ki page hagavuringenia.