Read Kahua JOANE 7 Bible Online

JOANE 7 - Kahua bible

JOANE 7

¹Ma hemuri o Jesu ki râhia i Galilea. Ngaia ki pe obania, vi ge râhia i Jutea, suria na meraha iata na Siu i ngekana ka obania, vi ga nahunia ki meme.

²Na tangiana raha iata na Siu tangagi na ruhu ki ata me noga.

³Ngekana na goana o Jesu ka vi tanga, ka vi: “Gu pania na agua ikê, ma ko arâ tanga i Jutea, hanana na kariamu, ga oga i ngekana, ka page bâsigi na mena, go tani.

⁴Manga ta na enoni, ma ki obania, vi na enoni getera ka girara, siana ki pinihigi na marâ, i tanugi. Suria igo ko katogi na marâ ngegana, gu hagagirarara na enoni hato i maveta renigo maremu!”

⁵(Na goana nikâ ka pe tongesuria.)

⁶O Jesu ki aramira, ki vi: “Na matena iaku inê ki mamênga: ma igamu, na ani mavê na matena ki ararigamu.

⁷Na enoni i maveta ki asa, vi ge kitenigamu igamu, ma ka kikiteniê inê hete, suria inê kê ama ni visira ma na enoni i maveta, vi pe koro na parongata.

⁸Mu râ igamu tanga na tangiana raha. Inê kê pe arâ tanga na tangiana raha ngekana, suria i mamênga, vige arâ me na aniku na matena.”

⁹Ngaia ki vi tangara hato vikana, ma ki oga so ma i Galilea.

¹⁰Matena ga bani râ na goana tanga na tangiana raha, o Jesu ki râ vê nogana. Ngaia ki pe obanira na enoni, vi ge girara. Tahema ngaia ki pipinihia marena i berarogata.

¹¹Na meraha i pasita na Siu ka bâbâ renia igê na tangiana raha ngekana. Ngaira ka hagate, ka vi: “I he ngaia?”

¹²Na enoni ka hehahanate so mareta renia. Tani ka vi: “Na mane koro kani ngaia.” Ma tani ka vi: “Mareha! Ngaia ki hagabekasira na enoni!”

¹³Mareha ta na enoni, vi ge tamasi mave, suria ngaira ka magutenira na meraha iata na Siu.

¹⁴I aragupu na tangiana raha, matena o Jesu i akê i Ruma ni Rotu, ma ki haganega ki hagesurira na enoni.

¹⁵Na meraha iata na Siu ka konetenia bâraha, ma ka vi: “Na mane ikê ki pe hagesuri, ma ki tanu hega kani giraragi mataha na ara ni marâ?”

¹⁶O Jesu ki arami, ki vi: “Na hagesuringa, gê hagatarêngenia, ki mareha, vi ge râ me teniê inê mareku, ma ki râ me hete tenia God, i hagatorangeniê.

¹⁷Manga ta na enoni, ma ki agana, hanana i tanugi na obaniha iana God, ngaia ki page girara, vi na hagesuringa iaku ki râ me tenia God, se i râ me teniê inê mareku ma.

¹⁸Na enoni, ma ki visia, vi na ara ni takotako ka râ me tenia ngaia marena, ngaia ki obania ma, vi na atana ke rongo raha. Ma na enoni, i obania, vi rongo raha na atana na ani, i hagatorangenia, ngaia ki visigi ma na marâ, ga monari, ma ki asa, vi ge hagaparu.

¹⁹O Moise ki bani vategamu na Ramata, iê? Ma ki mareha ta na hitangimi, vi ge marupegi na Ramata. Suria i hega kanimu obania, vi gamu nahuiê kê meme?”

²⁰Na enoni ka arami, ka vi: “Igo ko atataroga! Ti kani obania, vi nahuigo ko meme?”

²¹O Jesu ki arami, ki vi: “Inê kê bani katoa na ani gi tage ma na mena, ma igamu hato kamu koneteniê.

²²Bâ, o Moise ki bonasigamu, kamu retegi râ na gavoni na varata o karemi. Na tauha ngekana ki pe haganega i pasina o Moise, ma ki haganega hete i pasita na êvarimi. Ma igamu kamu retea na kare mane igê na Tangiana ni Mamaroha.

²³Igamu kamu retea na kare mane igê na Tangiana ni Mamaroha, hanana vi gamu marupegi na Ramata, o Moise i vategamu renigi. Tanu hega mu mangariaga tangê, suria vi inê kê hagakomaga na apena hagenani na enoni igê na Tangiana ni Mamaroha?

²⁴Siana kamu surira na enoni surigi na bâhanata, ma kamu surira suria hete, vi na ani ta na enoni kani ngaira.”

²⁵Tani na enoni ni Jerusaleme ka vi: “Ngaia vari ki no vani, na meraha iaka ka obania, vi ga nahuia ki meme?

²⁶Bâ, ngaia ki tamasi i maata na enoni hato, ma ngaira ka pe urapusia. Vari ngaira na meraha ka bani girara maninga, vi ngaia ki na Mesaia?

²⁷Na Mesaia ki page arâ me. Ma ki asa ta na enoni, ge girara, vi i pasina kani i he. Ma igia hato ka bani girara na hinua iana na mane ngekini.”

²⁸Matena o Jesu ki hagesurira na enoni i Ruma ni Rotu, ngaia ki tamasi raha, ki vi: “Igamu kamu girarê vari, vi na ani ta na mane kani inê? Ma kamu girara vari, vi i pasiku kani i he? Ma inê kê pe râ me inê mareku. Ngaia nga, na ani i hagatorangeniê, kanimu girara mu hagêguritogo renia. Ma igamu kamu pe girara.

²⁹Ma inê ke aitangisia, suria inê kê râ me tenia, suria ngaia ki hagatorangeniê.”

³⁰I ngekana ngaira ka rapasia, vi ga hagatotongoa, ma ki mareha ta na hitangita, vi ge here apena, suria na matena iana ki mamênga.

³¹Ga rako na enoni, ga tongesuria, ma ka vi: “Na matena, i arâ me igê na Mesaia, mu takusia vari, vi ngaia ki page katogi rako na mena teharigi na mena, i bani katogi na mane ngekini?”

³²Na Pariseo ka rongora na enoni, ga hehahanate renigi na tarani renia o Jesu ngegana. Tahema ngaira ma na maneraha ni vogasiha ga teha ka hagatorangenira tani na mane ni me, hanana vi ga hagatotongoa o Jesu.

³³O Jesu ki vi: “I abubu me noga na matena iaku, hanana gê arâ igê tenigamu tanga na ani, i hagatorangeniê.

³⁴Igamu kamu page bâbâ reniê, ma ki asa iami, vi gamu page tarahuê, suria na agua, gê page arâ igê inê, ki bara tangagamu igamu, vi gamu râ vê igê.”

³⁵Na meraha i pasita na Siu ka hehagateri so mareta, ka vi: “I he kani page arâ igê, hanana vi igia ki bara, vi ge tarahua? Ngaia ki page arâ vari i hinua i Helasi, na agua ga oga igê na Siu, ma ki page hagesurira na Ai ni Helasi, ga pe Siu?

³⁶Suria ngaia ki vi, ‘Igamu kamu page bâbâ reniê, ma ki asa iami, vi gamu page tarahuê.’ Ma nikâ ngaia ki vi, ‘Igê na agua, gê page gâga igê inê, ki asa iami igamu, vi gamu râ vê igê.’ Na ta kani takusia?”

³⁷I na tangiana, i hato igê na tangiana raha. Na tangiana ngekana ki na tangiana raha ngavê. Igê na tangiana ngekana o Jesu ki ura aharaga, ma ki tamasi raha, ki vi: “Manga ta na enoni, ma ki pasi tono, i koro, ki arâ me i pasiku, ma ki totono.

³⁸Suria na Buka Apuna ki vi, ‘Manga ta na enoni, ma ki tongesuriê, na ve, ga votoa na mauriha mora, ka page gogogo tenia na aitangihana.’”

³⁹(Matena o Jesu i tamasi vikê, ngaia ki tamasi renia na Higona Apu, i page angarira na enoni, ga tongesuria. Igê na matena ngekana God ki mamênga, vi ge hagatorangenia me igê na Higona Apu, suria ngaia ki mamênga, vi ge kasia akê o Jesu, ke Araha.)

⁴⁰Rako na enoni, ga rongoa o Jesu, i tamasi vikana, ka vi: “I monari, na mane ngekini ki na poropete, igia ga bani naasia!”

⁴¹Ma tani ka vi: “Na Mesaia ngekana!” Ma tani nikâ ka vi: “E, na Mesaia ki pe râ me tenia i Galilea!

⁴²Na Buka Apuna ki vi, ‘Na Mesaia ki na raraha iana o Tavite.’”

⁴³Tahema na enoni ka hetuguri renia o Jesu.

⁴⁴Tani ka obania, vi ga hagatotongoa, ma ki mareha tani, vi ge here apena.

⁴⁵Na mane ni me ka aporo i pasita na mane ni vogasiha ga teha ma na Pariseo. Ngaira ka hagatera na mane ni me, ka vi: “I hega mu pe merâ me?”

⁴⁶Na mane ni me ka arami, ka vi: “I mareha rârâ ta na enoni, vi ge maratorana na mane ngekana igê na tamasinga!”

⁴⁷Na Pariseo ka hagatera, ka vi: “Ngaia ki hagabekasigamu igamu nogami, iê?

⁴⁸Mu girara vari, vi na vere tage na meraha iaka, se vi na vere tage na Pariseo ki tongesuria?

⁴⁹Na enoni ngegana ka pe rongogiraragi na Ramata iana o Moise. Tahema God ki hagaitangira!”

⁵⁰O Nikotemo ka na hitangita. I nago ngaia ki na ani, i râ i pasina o Jesu. Ngaia ki vi tangara, ki vi:

⁵¹“Surigi na Ramata iaka ki apu, vi ge suria ka hagaitangia purupuru na enoni. Ma ki tuguhigia hete, ga rongoa, ma ka tarahua i nago, vi na ta kani erasia, ma hemuri ka kahu suria.”

⁵²Ngaira ka arami, ka vi: “I hega, igo nogamu ka na mane tenia i Galilea? Gu gari igê na Buka Apuna, ma ko page tarahua igê, vi mareha ngavê ta na poropete, vi ge râ me tenia i Galilea.”