Read Kahua JOANE 8 Bible Online

JOANE 8 - Kahua bible

JOANE 8

¹[Ma hemuri na enoni hato ka aporo i pasita, mo Jesu ki akê i Hungana ni Olive.

²I na tangiana i muri, igê na mahogotana, ngaia ki aporo râ tanga na Ruma ni Rotu. Na enoni hato ka hakuria me, ma ngaia ki oga so, ma ki haganega ki hagesurira.

³Na mane ni hagesuringa ni Rotu ma na Pariseo ka torea banu me ta na gete. Ngaira ka tarahua, i gamogamo, ma ka naka ki ura i maata na enoni hato.

⁴Ngaira ka vi tanga o Jesu, ka vi: “Araha, igami kami tarahua, vi na gete ikê ki gamogamo.

⁵Ma igê na Ramata iaka o Moise ki bonasigia, vi ga arihahunia na gete, i manga ngekana. Hoi, na ta kanigo takusia?”

⁶Ngaira ka tamasi vikana, hanana vi ga hagareke tara tanga igê na tamasinga, hanana vi ge page tuguria renia. Mo Jesu ki maroro so, ma ki segesege i ano renia na kakêna rimana.

⁷Ma suria ngaira ka ura râ ka ama ni hagate nga, tahema ngaia ki kahu ahêu kê, ma ki vi tangara, ki vi: “Manga ta na hitangimi, ma ki tatarasia ngavê na tasi, ua, i girara i hagenago, ki arihahunia na gete.”

⁸Ma ngaia ki maroro so nikâ, ma ki segesege i ano.

⁹Matena ga rongoa, i tamasi vikana, ngaira hato ka gava tatage vê ka râ, na meraha ka nanago. Ma i na murita ga gava vê ka râ, o Jesu ngaia getea ma ki oga so, ma na gete ki ura so mênga nogana.

¹⁰Ngaia ki ahêu kê, ma ki hagatea na gete, ki vi: “Ngaira i he? Mareha ta na hitangita ge oga so, hanana vi ge surigo ki hagaitangigo?”

¹¹Na hehene ki arami, ki vi: “Mareha vê, Araha.” Mo Jesu ki vi: “Hoi, inê nogaku, kê pe surigo kê hagaitangigo. Gu râ, ma siana ko tasitasi aporo nikâ.”]

¹²O Jesu ki tamasi tangara nogata na Pariseo, ki vi: “Inê nga ki na ani, gê mavesigi na obata na enoni i maveta. Manga ta na enoni, ma ki amake suriê, ngaia ki page nahunia na marara, i votoa na mauriha mora, ma ki asa iana, vi ge page oga igê na roto hono.”

¹³Na Pariseo ka vi tanga, ka vi: “Igo getego ma ko hagatanga monari renigo maremu. Igo ko tamasi purua ma.”

¹⁴O Jesu ki arami, ki vi: “Mareha vê! Henaka ma inê mareku, kê hagatanga monari reniê mareku, ma na tamasinga iaku ki monari, suria inê nga ki na ani, gê girara na agua, gê râ me tenia, ma na agua, gê page arâ igê. Ma igamu, igamu kamu pe girara na agua, inê gê râ me tenia, se vi na agua, gê page arâ igê.

¹⁵Igamu kamu surira na enoni surigi na bâhanata. Inê nga ki na ani, gê pe suria ta na enoni.

¹⁶Ma ki manga inê, ma kê suria na enoni, na suriha iaku ki oto, suria i mareha, vi inê geteê kani ve suria na enoni, o Vaemaku hete, i hagatorangeniê, ma inê, kanimuru suria na enoni.

¹⁷Na Ramata iami ki vi, vi ‘Manga na vererua, ma ki tage râ na tamasinga iaterua, ua, na tamasinga iaterua ki monari.’

¹⁸Inê mareku kê hagatanga monari reniê mareku, ma o Vaemaku, i hagatorangeniê, ngaia nogana ki hagatanga monari reniê.”

¹⁹Ma ngaira ka hagatea, ka vi: “O Vaemamu kani i he?” Mo Jesu ki arami, ki vi: “Igamu kamu pe aitangisiê, ma kamu pe aitangisia nikâ o Vaemaku. Manga mu aitangisiê, igamu kamu aitangisia nikâ o Vaemaku.”

²⁰O Jesu ki visigi na marâ hato ngegana, matena i hagesurira na enoni i Ruma ni Rotu, hagarangia na kiboru, ga hakuhaku haga igê tanga na rotu. Ma ki mareha vê ta na enoni, vi ge hagatotongoa, suria na matena iana ki mamênga.

²¹O Jesu ki vi tangara nikâ, ki vi: “Inê nga kanigê page arâ. Megamu kamu page bâbâ reniê, ma kamu page meme, suria mu ama ni tasitasi nga tare. I asa iami igamu, vi gamu râ igê na agua, gê page arâ igê inê.”

²²I ngekana na meraha i pasita na Siu ka vi: “E, ngaia ki vi, vi ‘I asa iami igamu, vi gamu râ igê na agua, gê page ara igê inê.’ I vi ngaia vari, vi page nahuia marena?”

²³O Jesu ki arami, ki vi: “I pasimi igamu kani i ano ikê. Ma inê, inê kê râ me tenia God. I pasimi igamu kani i maveta ikê, ma i maveta ikê ki mareha vi pasiku inê.

²⁴Tahema inê kê bani vi tangagamu, vi igamu kamu page meme, suria mu ama ni tasitasi nga tare. Ma igamu kamu page meme, suria mu ama ni tasitasi nga, manga vi igamu, ma kamu pe tongesuria, vi ‘Inê nga Inê.”

²⁵Ngaira ka hagatea, ka vi: “Na ani ta na enoni kani igo?” O Jesu ki arami, ki vi: “Inê kê bani visia tangagamu igê na haganegahana.

²⁶Ga rako na marâ, inê kê girara gê visigi renigamu, ma kê girara gê surigamu kê hagaitangigamu renigi. Ma kê pe katogi. Inê kê hagarongora hete na enoni i maveta renigi na marâ, inê kê bani rongogi tenia na ani, i hagatorangeniê. Ngaia ki na ani, ga hagêguritogo renia.”

²⁷Ngaira ka pe rongogirara, vi ngaia ki tamasi tangara renia o Vaemana.

²⁸Tahema o Jesu ki vi tangara, ki vi: “Na matena mu raragea akê o Karena Enoni, igamu kamu page girara, vi ‘Inê nga Inê’. Ma igamu kamu page girara nikâ, vi inê kê pe râ surigi na takotako iaku mareku ma, ma kê visigi ma hete na marâ, o Vaemaku i bani hagesuriê renigi.

²⁹Ma na ani, i hagatorangeniê, ki goga heniê tare. Ngaia ki pe paniê so inê geteê, suria inê kê tani tare na marâ, gê hagakoro obana renigi.”

³⁰Matena o Jesu i tamasi vikana, rako na enoni, ga rongoa, ka tongesuria.

³¹Hoi, o Jesu ki tamasi tangara na Siu, ga tongesuria, ki vi: “Manga igamu, ma kamu taua na hagesuringa iaku, igamu ki na kariaku monari.

³²Igamu kamu page girara na monariha renia God, ma na monariha ngekana ki page rupasigamu.

³³Ngaira ka arami, ka vi: “Igami ki na raraha iana o Abaramo, mareha ngavê ta na enoni, vi ge marungigami. Na ta kanigo takusia, matena go vi, vi na monariha ki page rupasigami?”

³⁴O Jesu ki arami, ki vi: “I monari, be vi tangagamu: na enoni, i tasitasi, na tasi ki marungia.

³⁵Na kare vurivuri ki pe gâga tare henia na mane ma na ahemata iana, nga noga ma o karena na mane ngaia kani gâga tare henia.

³⁶Manga o Karena, ma ki rupasigamu, igamu kamu page aharupa maninga.

³⁷Inê kê bani girara, vi igamu ki na raraha iana o Abaramo. Henaka i manga ngekana, ma igamu kamu obania, vi gamu nahuiê kê meme, suria igamu kamu usitenia na hagesuringa iaku.

³⁸Inê kê tamasigi na marâ, gê bani bâsigi i pasina o Vaemaku inê, ma igamu kamu tani na marâ, i bani visigi tangagamu o vaemami igamu.”

³⁹Ngaira ka aramia, ka vi: “E, ngaia nga o Abaramo ka na êvarimami.” O Jesu ki arami, ki vi: “Manga vi igamu ka na karena monari o Abaramo, vikê igamu kamu amake suria.

⁴⁰Na tarana gi tage ma, kanigê katoa tare. Ngaia ki manga ikê: inê kê hagarongogamu renia na monariha, gê bani rongoa tenia God. Tanu hega kanimu obania, vi gamu nahuiê kê meme? O Abaramo ki asa, vi ge kato vikana!

⁴¹Igamu kamu amake suria o vaemami igamu.” Ngaira ka arami, ka vi: “Se, i mareha vi na kare ni tara kani igami! God ngaia getea ma ka no Vaemamami.”

⁴²O Jesu ki vi tangara, ki vi: “Manga vi o vaemami monari kani God, vikê igamu kamu takuiê, suria inê kê râ me tenia God, ma i ngekê inê kê oga ikê. Inê mareku kê pe râ me ikê, ma ngaia ma i hagatorangeniê me.

⁴³Tanu hega kanimu pe rongogiraragi na marâ, gê visigi? Suria igamu kamu usi, vi gamu karinga na taroha iaku.

⁴⁴Igamu, o vaemami igamu kani Satana, ma kamu obania, vi gamu amake surigi na teniha iana o vaemami. Haganega tenia i nago kere vê noga, ngaia ki bani nahuira me na enoni ka meme. Ngaia ki mareha vê, vi ge atea na monariha, suria i mareha rârâ na monariha i pasina. Na tauhana ngaia ki hagahagaparu, suria ngaia ki hagaparu, ma ki katora na enoni, ka hagahagaparu.

⁴⁵Ma inê, inê kê tamasia na monariha. Tahema igamu kamu pe tongesuriê.

⁴⁶Ti na hitangimi kani girara i hagatanga monari reniê, vi inê kê tasi? Manga inê, ma kê tamasia na monariha, tanu hega kanimu kamu pe tongesuriê?

⁴⁷Na enoni, i râ me tenia God, ngaia ki karingagi na tamasinga iana God. Ma igamu, igamu kamu mareha vi na kariana God. Tahema igamu kamu usi, vi gamu karinga.”

⁴⁸Na meraha i pasita na Siu ka aramia o Jesu, ka vi: “Igami kami pe vi koro vari, matena mi visigo, vi igo ka na mane ni Samaria, ma ko atataroga?”

⁴⁹O Jesu ki arami, ki vi: “Inê kê pe atataroga. Inê kê hagarahasia o Vaemaku, ma igamu kamu pe hagarahasiê.

⁵⁰Inê kê pe naasira na enoni, hanana vi ge hagarahasiê. Ma ki oga na ani, i obanira na enoni, vi ga hagarahasiê, ma na suriha iana ki oto.

⁵¹I monari, be vi tangagamu: na enoni, ma ki amake suria na hagesuringa iaku, ngaia ki asa iana, vi ge page me.”

⁵²Na Siu ka vi tanga, ka vi: “Hoi, i ngekê igami kami kahu tahetara renigo, vi igo ko atataroga. O Abaramo ki bani me, ma na poropete ka bani me. Ma ki tanu hega, kanigo vivi, ‘Na enoni, ma ki amake suria na hagesuringa iaku, ngaia ki asa iana, vi ge page me?’

⁵³Na êvarimami o Abaramo ki bani me. Go vi vari, vi igo ko raha teharia o Abaramo, iê? Ma na poropete ka bani me nikâ. Go takusia vari, vi o ti kani igo?”

⁵⁴O Jesu ki arami, ki vi: “Manga inê, ma kê hagarahasiê mareku, inê kê hagarahasiê purua ma. Ma na ani, i hagatorangeniê, ngaia ki no Vaemaku. Ngaia ki na ani nga, igamu kamu visia, vi na God iami.

⁵⁵Igamu, igamu kamu pe girara igamu, ma inê kê aitangisia inê. Manga inê, ma kê vi, vi gê pe aitangisia, inê kê hagaparu ma, manga igamu. Ma inê kê aitangisia, ma kê tê viteana.

⁵⁶Na êvarimi o Abaramo ki vagevage, hanana vi rigia na râha me iaku. Ngaia ki bani bâsia râ, ma ki koro na obana.”

⁵⁷Na Siu ka vi tanga, ka vi: “E, igo ki mamênga, vi ge tangahuru gi rima na harisi iamu, ma ki hega go bâsia o Abaramo?”

⁵⁸O Jesu ki arami, ki vi: “I monari, be vi tangagamu: hagenago tarana o Abaramo i vora me, ‘Inê nga Inê.”

⁵⁹Ma ngaira ka tavo na hê, vi ga arihahunia renigi. Mo Jesu ki magahuru tenira, ma ki pania na Ruma ni Rotu.