Read Kahua JOANE 9 Bible Online

JOANE 9 - Kahua bible

JOANE 9

¹I tara o Jesu ki tarahua igê na mane, i bani guru taropuru, matena i vora me.

²Na kariana ka hagatea o Jesu ka vi: “Rabai, na tasi iana o ti, kani katoa na mane ikê, ki bani guru taropuru, matena i vora me? Na tasi iana marena, se na tasi iaterua na enana?”

³O Jesu ki arami, ki vi: “Ngaia ki guru taropuru, ma na tasi iana marena, se vi na tasi iaterua na enana ka pe katoa, ke manga ngekana. Ngaia ki guru, hanana ma vi God ki girara i hagabângenia igê na raramohana.

⁴I tuguhigami, vigami ama ni tanugi nga na tagaraha iana na ani, i hagatorangeniê, igê na kere marara na tangiana mênga. I sugi bungi, ma ki asa ta na enoni, vi ge girara ge tagara.

⁵Matena gê goga i maveta, inê nga nga na ani, gê mavesigi na obata na enoni i maveta.”

⁶Matena o Jesu i tamasi hato vikana, ngaia ki musu i ano, ma ki arogi henia na mako, ma ki taruhigi na maana na mane renia.

⁷Ma ngaia ki vi tanga, ki vi: “Gu râ, ma ku manuhigi na maamu igê na nonganonga i Siloamu.” (Siloamu ki vi “Hagatorangenia”.) Ngekana na mane ki râ, ki manuhigi na maana, ma ki aporo i pasina, i bani rite ma ka marava aporo na maana.

⁸Na enoni i pasina, ma na enoni, ga bani bâsia, i baganunungi haga tare, ka hehagateri, ka vi: “Nga na mane vari, i gâga hevurusi, ki baganunungi haga tare ea nge?”

⁹Tani ka vi: “Ngaia ngekana!” Ma tani ka vi: “Mareha vi ngaia ngekana. I hagani bâ manga vi ngaia.” Ngekana ngaia marena na mane ki vi: “Mako, inê ngekê.”

¹⁰Ngaira ka hagatea, ka vi: “Tanu hega kanigo rite ma ka marava aporo na maamu?”

¹¹Ngaia ki arami, ki vi: “Na mane, ga visia vi o Jesu, kani aroa na mako igê na musuna, ma ki taruhigi re na maaku, ma ki vi tangê, ki vi, ‘Gu râ i Siloamu, ma ko manuhigi igê na maamu.’ I ngekana inê kê râ, ma na matena gê manuhigi na maaku, ki parama, ma kê rite ma ka marava aporo na maaku.”

¹²Ngaira ka hagatea, ka vi: “Ngaia i he?” Ngaia ki arami, ki vi: “Inê kê pe hagarea.”

¹³Ma hemuri ngaira ka merâ na mane, i kahu rite ma ka marava aporo na maana ngekê, i pasita na Pariseo.

¹⁴Na matena o Jesu ki aroa na mako igê na musuna, ma ki hagamaravagi aporo re na maana na mane ngekê, ngaia ki na Tangiana ni Mamaroha.

¹⁵Tahema na Pariseo ka hagatea nogata na mane, i rite ma ka kahu marava aporo na maana ngekê. Ngaia ki vi tangara, ki vi: “Ngaia ki taruhigi na maaku renia na mako, ma inê kê manuhigi na maaku, ma na ta nikâ: gê kahu rite ma ka marava aporo na maaku.”

¹⁶Tani na Pariseo ka vi: “Na mane, i kato vikana, ki mareha vi na ani, God i hagatorangenia, suria ngaia ki aharê igê na Ramata tanga na Tangiana ni Mamaroha.” Ma tani ka vi: “Manga vi ngaia ka na enoni tasi, tanu hega kani girara i katogi na mena manga ngegana?” Ma ka tora hetatari na takotako iata.

¹⁷Vikê na Pariseo ka hagatea râ nikâ na mane, ka vi: “Igo ko vi, vi ngaia ki hagamaravagi na maamu. Hoita, na ta kanigo takusia renia?” Ngaia ki arami, ki vi: “Na poropete ngekana.”

¹⁸Na meraha i pasita na Siu ka usi, vi ge tongesuria, vi na mane ngekana ki bani guru taropuru i nago, ma i ngekê ki kahu rite ma ka marava aporo na maana, nga noga ga unirerua me na enana, karu hagatanga monari renia.

¹⁹Ma ngaira ka hagatererua na enana, ka vi: “O karemurua ngekê? Manga vi ngaia, igamurua kamuru vi, vi ngaia ki bani guru taropuru, matena i vora me? Manga vi monari, hoi, tanu hega kani kahu rite ma ka marava aporo na maana?”

²⁰Na enana karu arami, karu vi: “Igamirua kamuru girara, vi ngaia ki no karemirua, ma kamuru girara nga, vi ngaia ki bani guru taropuru, matena i vora me.

²¹Ma igamirua kamuru pe girara, vi o ti kani hagamaravagi aporo na maana. Mu hagatea so ngaia! Ngaia ki mareha vi na kare! Ngaia ki girara i aramigamu marena!”

²²Na enana karu tamasi vikê, suria garu magutenira na meraha i pasita na Siu. Renia ngaira ka bani vi, vi ga page paia hura tenia na rotu na ara ni enoni, i visia, vi o Jesu vi na Mesaia.

²³Tahema na enana karu vi: “Ngaia ki mareha vi na kare! Mu hagatea!”

²⁴Ngaira ka unia aporo me nikâ na mane, i bani guru taropuru, matena i vora me. Ma ngaira ka vi tanga, ka vi: “Gu tohe, vi igo ko page tamasi monari! Igami kami girara, na mane ngekana ngaia ka na mane tasi.”

²⁵Ma ngaia ki arami, ki vi: “Inê kê pe girara, vari ngaia ka na mane tasi se mareha. Na ani gi tage togo ma na marâ kanigê girara: i nago inê kê guru taropuru, ma i ngekê inê kê girara, gê kahu bâbâ.”

²⁶Ngaira ka hagate, ka vi: “Na ta kani katogo renia, matena i hagamaravagi na maamu?”

²⁷Ngaia ki arami, ki vi: “Inê kê bani visia tangagamu. Ma igamu kamu usi, vi gamu karingê. Suria i hega kanimu obania, vi gamu rongoa nikâ? Mu obania vari, vi gamu voravora nogami vi na kariana?”

²⁸Ngaira ka guharia, ma ka vi: “Igo nga, igo nga na kariana o vani ngekana. Ma igami nga, igami ka na kariana o Moise.

²⁹Igami kami bani girara bâkoro, vi God ki tamasi tanga o Moise. Ma na mane ngekana igami kami hitenia!”

³⁰Na mane ki arami, ki vi: “E, gê kone! Igamu kamu hitenia, ma ngaia ki hagamaravagi na maaku!

³¹Igia ka girara, vi God ki pe aganarigi na nunginungiha iata na enoni tasi; ngaia ki aganarigi ma hete na nunginungiha iata na enoni, ga hanetasia ma ka tê viteana.

³²Haganega me tenia i nago kere vê noga, igia ka pe rongoa rârâ ta na enoni, vige hagamaravagi na maana ta na enoni ge bani guru taropuru, matena i vora me.

³³Manga na mane ngekê, ma ki pe râ me tenia God, i asa hagetage, vi ge tanua ta na marâ.”

³⁴Ngaira ka arami bê aporo, ka vi: “Igo, igo na mane go tasi, haganega me tenia na matena, go vora me, ma ko obania vari, vi go hagesuringami, iê?” Ma ngaira ka paia hura tenia na rotu.

³⁵Matena o Jesu ki rongo, vi ngaira ka bani paia hura na mane ngekana, ngaia ki tarahua, ma ki vi tanga ki vi: “I hega, igo ko tongesuria o Karena Enoni?

³⁶Na mane ki arami, ki vi: “Araha, hagagirarê renia, hanana ve tongesuria!”

³⁷O Jesu ki vi tanga, ki vi: “Igo ko bani bâsia. Ngaia nga na ani, i megotamasi i ngekê akê.”

³⁸Na mane ki vi: “Inê kê tongesurigo, Araha.” Ma ngaia ki susure tanga o Jesu, ma ki bêtuhia.

³⁹O Jesu ki vi: “Inê kê râ me i maveta ikê tanga na suriha, hanana na enoni, ga guru, ka girara ga bâbâ, ma na enoni, ga bâbâ, ka guruguru.”

⁴⁰Tani na Pariseo, ga oga i ngekana henia, ka rongoa, i tamasi vikana, ma ka hagatea, ka vi: “E, go vi vari, vi igami nogamami kami guru?”

⁴¹O Jesu ki arami, ki vi: “Manga igamu, ma kamu guru, vikê ki asa, vi ge surigamu ka hagaitangigamu renigi na tasi iami; ma suria ma igamu kamu vi, vi igamu kamu bâbâ, tahema na tasi iami ka gâga.”