Read Kahua TAGARAHA IATA NA APOSOTOLO 11 Bible Online

TAGARAHA IATA NA APOSOTOLO 11 - Kahua bible

TAGARAHA IATA NA APOSOTOLO 11

¹Na aposotolo ma na enoni i Jutea hagenani, ga tongesuri, ka rongo, vi na enoni, ga pe Siu, ka tongesuria nikâ na tamasinga iana God.

²Matena o Petero ki akê i Jerusaleme, na enoni, ga obania, vi ga retegi na gavoni na varata na enoni, ga pe Siu, ka ramonia, ka vi:

³“Igo ko oga i pasita na enoni, ga pe Siu ma ka pe retegi na gavoni na varata, ma nikâ go merabêrihu!”

⁴Ngekana o Petero ki hagarongora bâkoro renigi na ara ni marâ hato, ga vora me, ma ki haganega henia na marâ, i vora me hagenago.

⁵Ngaia ki vi: “Inê kê nunginungi i hinua raha i Jopa, menê kê marute. Inê kê bâsia, vi ta na marâ, i bâ manga na apena na gahu siki. Ma ki bâ, manga vi na enoni ka tê igê na sukuni ge he, ma ki so me tenia na vavearo, ma ki oga hagarangiê.

⁶Inê kê bâsia maninga, ma kê bâsigi na marâ, i vora nêgata, ma na marâ vasiga i mu, ma na marâ mangara na ma, na gagarisu, na tata, na babagiro, na gunu ma na manu.

⁷Ma hemuri inê kê rongoa, vi God ki tamasi tangê, ki vi, ‘Petero, gu aharaga. Ku nahuira ma ku ngêra!’

⁸Ma inê kê aramia, kê vi, ‘I asa vê, Araha! Inê kê pe ngêgi noga na marâ, na ramata ka visira, vi ga bera ma ka pe arari, vi ge ngaura.’

⁹Ma God ki tamasi nikâ tenia na vavearo, ki vi, ‘Siana ko visira, vi pe arari, vi ge ngaura na marâ, God i visira, vi ga pe apu.’

¹⁰God ki tamasi hageoru tangê vikana ma hemuri na gahu ki magahuru aporo i vavearo.

¹¹Igê nga na matena ngekana na mane gi oru ka ata me i ruma, gê goga igê. Na mane ngegana ka râ me tenia i Sesarea, hanana vi ga uniê.

¹²Na Higona Apu ki vi tangê, vi siana kê magu, vi gê arâ henira. Na vere ono na tamaka ngegana ka râ me heniê nikâ i Sesarea, ma igami hato kami banu i ruma iana o Konelio.

¹³Ngaia ki hagarongogami renia na angelo, i bâsia, i ura i ruma iana, ma ki vi tanga, ki vi, ‘Gu hagatorangenia ta na enoni ke râ i Jopa, ke unia me ta na mane, na atana hagenani kano Simone Petero.

¹⁴Ngaia ki page tamasi tangago renia na Taroha, ma igo ma na ruma iamu kamu tahitahi renia.’

¹⁵Ma na matena gê haganega kê tamasi, na Higona Apu ki angarira, tagenana manga ngaia ki angarigia igia i nago.

¹⁶Ma inê kê takusia aporo na tamasinga iana na Araha, i vi, ‘O Joane ki hagabatesimo renia na ve, ma igamu kamu page batesimo renia na Higona Apu.’

¹⁷Na tamasinga ngekê ki rongo mataha, vi God ki vatera na enoni, ga pe Siu ngegê, na Higona Apu, tagenana manga i vategia igia i nago, matena igia ka tongesuria na Araha o Jesu Kirisito. Mu takusia vari, vi inê na maneraha kê girara, vi gê rêrapusia God? Mareha!”

¹⁸Matena ngaira ka rongo vikana, ngaira ka kahu pe ramonia rârâ o Petero, ma ka visia raha hete God, ka vi: “Hoi, God ki vatera nikâ na enoni, ga pe Siu, ka urusigi na aitangihata ma ka tahi!”

¹⁹Matena ga nahuia o Setepano, ma ka merongasira na enoni, ga tongesuri, na enoni, ga tongesuri, ka gava, ma ka totoko. Tani ka gava ma ka râ hagatê manga i Punisia me Saipero me Antioko, ma ka tarohenia igê o Jesu tangara ma na Siu.

²⁰Ma tani na enoni, ga tongesuri, ngaira na mane i Saipero me Sairini, ka râ i Antioko, ma ka tarohenia igê nikâ o Jesu tangara na enoni, ga pe Siu, ma ka ateate tangara renia na Taroha Koro renia o Jesu na Araha.

²¹Na Araha raramohaga ki tamanira bâraha, ma ka amake suria.

²²Na hakuta na enoni i Jerusaleme, ga tongesuri, ka rongogi na tarani ngegana. Tahema ngaira ka hagatorangenia o Banebasi, ki râ i Antioko.

²³Matena i bani ata vê, ma ki bâsia, God i koro tangara na enoni, ngaia ki vagevage, ma ki kanukanura ngaira hato, vi ga tongesuria gatagata na Araha, ma ka arâ bâkoro suria igê na mêrihata hagenani.

²⁴O Banebasi ngaia na mane koro, i nganaganihaga igê na tongesuriha, ma na Higona Apu ki angaria. Ma ka rako na enoni, ga kahu tongesuria na Araha.

²⁵Ma hemuri o Banebasi ki râ i Tareso, ki bâ igê renia o Saulo.

²⁶Matena i tarahua, ngaia ki merâ i Antioko. Suria na harisi hagenani ngairerua karu oga igê henira na enoni, ga tongesuri, ma karu hagesurira na enoni rako. I ngekana nga i Antioko ki haganega igê, ka hêtata na enoni, ga tongesuri, vi na enoni kirisitiano.

²⁷Igê na ararina na matena ngekana tani na mane ni hinarunga ka so me tenia i Jerusaleme tanga i Antioko.

²⁸O Agabo, na hitangita, ngaia ki hinaru igê na raramohana na Higona Apu, ma ki vi, “Na magêha raha ki sugi râ me igê na maveta hagenani.” (Na magêha ngekê ki râ me, matena o Kolotio ki na gavumane i teha i Roma.)

²⁹Na enoni, ga tongesuri, ka hekarigi ka haku haga, ka vi, vi na ara ni hitangita ki araria, i kasia na haga, manga hanana ngaia marena i girara, ma ka tamanira re na tamata, ga oga i Jutea.

³⁰Hoi, ngaira ka haku haga, mo Banebasi mo Saulo karu tora na haga tangara na meraha igê na rotu.