Read Kahua TAGARAHA IATA NA APOSOTOLO 12 Bible Online

TAGARAHA IATA NA APOSOTOLO 12 - Kahua bible

TAGARAHA IATA NA APOSOTOLO 12

¹I na bevoana ngekana o Herote, na maneraha ki haganega ki merongasira tani na enoni igê na rotu.

²Ngaia ki vi tangara na mane ni me iana, ka retenguria o Jakobo, o veogana o Joane.

³Matena i bâsia, vi na tarana ngekana ki hagakoro obata na Siu, ngaia ki torêri ki rakua nikâ o Petero. (Na tarana ngekana ki vora me igê na Tangiana Raha, ga ngêa igê na bereti i pe ahunga.)

⁴Matena ga rakua hato o Petero, ngaira ka kasia igê na ruma ni hagaitangiha. Ngaira ka tagarenia tangara na apaneni ni me ge he. Ngaira ka heheuri ka bâsuria. Na mane ni me ge he igê na ara ni apaneni me. O Herote ki kato, vi i murina na Paseka ngaia ki page hagatamasia i metara i maata na Siu.

⁵Tahema ga bâsuria ma o Petero igê na ruma ni hagaitangiha, ma na enoni igê na rotu ka nungia bâraha tare na Araha, ki tamania.

⁶Igê na bungiana ki tangi râ mo Herote ki vi, vi hagatamasia o Petero i metara i maata na enoni, o Petero ki mêru i guputerua na mane ni me. Ma ka baroa renirerua na seni gi rua. Ma na mane ni me ka ura igê na maa ni ruma igê na ruma ni hagaitangiha, ma ka anumasia.

⁷Ki parama, ma ki vora me na angelo o iana na Araha, ma na marara ki mavesia na kiboru i ruma ni hagaitangiha. Na angelo ki ngingia na gaparana o Petero, ki hagaritea, ma ki vi: “Gu aharaga rêrê!” Ma karu parama na seni, ma karu ruka tenirerua na rimana.

⁸Ma hemuri na angelo ki vi: “Gu hugusigo renia na hogosimu, ma ko buti.” Mo Petero ki kato vikana, ma na angelo ki vi: “Gu tugunia ma ko arâ me heniê.”

⁹O Petero ki râ suria, ma ki hura tenia na ruma ni hagaitangiha. Ma ngaia ki pe girara, vi na marâ, i katoa na angelo, ki monari, se mareha. Ngaia ki takusia ma, vi marute.

¹⁰Ngairerua karu ritenia na apanena hagenago na mane ni me, ga anumasia na ruma ni hagaitangiha, ma hemuri karu ritenia na ruata na apanena na mane ni me, ma hemuri karu mataro me igê na maa ni ruma na para. Na maa ni ruma ngekana ngaia ki na aeani, ma ki maa bê râ tanga na hinua raha. Ngaia marena na maa ni ruma ki akeke râ taraterua karu hura. Ma karu râ suria ta na tara, ma ki parama na angelo, ma ki magahuru tenia o Petero.

¹¹I ngekana o Petero ki kahu girara na marâ, i katoa na angelo tanga, ma ki vi: “E, ê kahu girara, i monari! Na Araha ki hagatorangenia na angelo iana, ma ki hagatahiê tenia na raramohana o Herote ma tenigi na eraha hato, na Siu ga obanigi tangê.”

¹²Matena i girara, vi ngaia ki bani tahi, ngaia ki râ i ruma iana ka Maria, kenana o Joane Mareko. Na enoni rako ka bani haku i ngekana, ma ka nunginungi.

¹³O Petero ki korekore i maa ni ruma, ma ta na kere gete tagara, ka Rosa na atana, ki râ me, ki vi bâsia, vi o ti kini korekore.

¹⁴Ngaia ki rongogirara na ringena o Petero, ma ki vagevage bâraha, ma ki tango aporo, mareha vi ge tangahia na maa ni ruma, ma ki hagarongora na enoni i ruma, ki vi: “O Petero kani rêra i metara!”

¹⁵Ma ngaira ka aramia, ka vi: “Kego, go beka!” Ma ngaia ki ama ni vivi ma: “I monari!” Ma ngaira ka arami, ka vi: “Na angelo iana ngekana!”

¹⁶O Petero ki ama ni korekore nga, matena ga tamasia. Matena ga tangahia na maa ni ruma, ngaira ka bâsia, ma ka kone vê.

¹⁷Ngaia ki bubuhira ka muni, ma ki hagarongora renia, vi manga i he na Araha ki bani torea hura tenia na ruma ni hagaitangiha. Ngaia ki vi: “Mu hagarongora o Jakobo ma na goaka getera renia na tarana ngekê.” Ma hemuri ngaia ki râ vê, ki râ i ta agua.

¹⁸Na matena i tangi ki arâ, na mane ni me, ga bâsuria o Petero, ka magu, ma ka anumanuma bâraha, ma ka hehagateri, ka vi: “O Petero i he? Na ta kani katoa?”

¹⁹O Herote ki bonasira ka garia, ma ka pe tarahua. Tahema ngaia ki surira, vi ga meme. Ma ngekana o Herote ki so tenia i Jutea, ma ki râ ki oga sisite râ noga i Sesarea.

²⁰O Herote ki mangariaga bâraha tangara na Ai ni Taire me Sitone. Tahema ngaira ka haku, ka râ ka bâsia o Herote. Ngaira ka gari tamata i nago, ma ka naka bêta tanga o Balasito, ki tamanira. Ngaia ki na mane, i onosuria na ruma raha iana o Herote. Ma hemuri ngaira ka râ i pasina o Herote, ma ka naku henia, suria na ngauha iata ka arâ ma me tenia na apanena iana o Herote.

²¹Igê na tangiana, i bani surua o Herote, ngaia ki mahe renigi na mahena, ma ki oga igê na âgâga iana, ma ki ateate tangara na enoni.

²²Ngaira ka ngerengere, ka vivi: “God kani tamasi i harana ngekê, mareha vi ngaia marena.”

²³Ki parama na angelo iana na Araha, ma ki hagaape era o Herote, suria ngaia ki pe hanetasia God, ma ki vi, vi ngaia marena ki God. Ngaia ki mamaga na apena, ma ki me.

²⁴Ma ka ama ni rakorako nga na enoni, ga rongoa na tamasinga iana God, ma ka râ suria.

²⁵O Banebasi mo Saulo karu hatongia na tagaraha iaterua, ma karu aporo tenia i Jerusaleme, ma karu merâ o Joane Mareko henirerua.