Read Kahua TAGARAHA IATA NA APOSOTOLO 14 Bible Online

TAGARAHA IATA NA APOSOTOLO 14 - Kahua bible

TAGARAHA IATA NA APOSOTOLO 14

¹Na marâ, i tagenana ma, ki vora me i hinua i Ikonio. O Paulo mo Banebasi karu banu i ruma ni sukuru iata na Siu, ma karu tamasi bâkoro era. Tahema ka rako na Siu ma na enoni, ga pe Siu, ka kahu tongesuria o Jesu.

²Ma na Siu, ga usi, vi ge tongesuria o Jesu, ka hagatagetagera na enoni, ga pe Siu, hanana vi ga rêra pusira na enoni, ga tongesuri, ma ka mangariaga tangara.

³Na aposotolo karu oga arihu i ngekana. Ngairerua karu tamasi ramo renia na Araha o Jesu. Ma na Araha ki hagatanga monari renia na tamasinga iaterua, renia na korohana, suria ngaia ki vatererua na ramoha, hanana garu katogi na mena ma na tagaraha raha.

⁴Na enoni i hinua raha ka hevoavoa so mareta. Tani ka pane henira na Siu, ma tani ka pane henirerua na aposotolo.

⁵Ma hemuri na enoni, ga pe Siu, ma na Siu henira na maneraha iata ka hekarigi, vi ga hagatavarerua, ma ka ariha hunirerua renigi na hê.

⁶Matena na aposotolo karu rongo, ngairerua karu gava, karu râ i hinua i Lisitare me hinua i Terebe, me na apanena hagarangirerua. Na hinua ngegê karu oga i Likaonia.

⁷Ma i ngekana ngairerua karu ateate igê renia na Taroha Koro renia o Jesu.

⁸I hinua i Lisitare ki oga igê ta na mane, i tavi na êgana. I haganega tenia na matena i vora, ma ki bara, vi ge arârâ.

⁹Ngaia ki gâga ma, ma ki karingagi na tamasinga iana o Paulo. O Paulo ki girara, vi na mane ngekana ki tongesuri, ma ki araria, vi ge komaga. Tahema ki boretenia.

¹⁰Ma ngaia ki tamasi raha tanga, ki vi: “Gu aharaga ototo râ nga.” Na mane ki reke kê, ma ki haganega ki rârâ.

¹¹Matena na enoni ka bâsia na tarana ngekana, i tanua o Paulo, ngaira ka haganega ka ngerengere igê na tamasinga iata i Likaonia, ka vivi: “Na ataro karu maramare nuni, ma karu so me i pasika!”

¹²Ngaira ka hêtana o Banebasi renia na ataro raha o Soisi, mo Paulo ka hêtana renia na ataro o Hemesi, suria o Paulo ki tamasi tare.

¹³Na ruma na ngêsu, ga vogasia igê na ataro raha o Soisi, ki oga râ i metara i hinua. Na mane ni vogasiha i rahesia na ataro raha o Soisi ngekê, ki toregi me na puruka mane, ga mahe renigi na takani na apinige. Ngaia ma na enoni ka obania, vi ga susu tangarerua na aposotolo.

¹⁴Matena o Banebasi mo Paulo karu rongo vikana, ngairerua karu tarisigi na tuguni iaterua, na girarana, vi garu usi, ma karu tango karu râ, ma karu ura i guputa na enoni, ma karu ngere, karu vi:

¹⁵“Vegamu! I hega mu kato vikê? Na enoni ma kani igamirua! Igamirua ka na enoni manga igamu! Igamirua kamuru râ me ikê, kamuru tamasia na Taroha Koro renia o Jesu, hanana muru horogamu tenigi na vogasiha tangara na marâ purua, ma kamu rahesia ma hete God mamauri, i hagavoragi na vavearo, na ano, na asi, ma na ara ni marâ hato igê.

¹⁶I nago God ki nakara mavê na enoni hato i maveta, ka râ surigi na takotako iata mareta.

¹⁷Henaka i manga ngekana, ma ngaia ki hagatanga monari tare renia marena igê na tagaraha koro iana. Ngaia ki katoa na rangi ki râ me tangagamu tenia na roto. Ngaia ki katogi ka oga na harisi tangagamu igê na mateni tange. Ngaia ki vategamu na ngêra, ma ki hagakoro obami bâraha.”

¹⁸Henaka vi na aposotolo karu tamasi vikana ma ki kere bara tangarerua, vi garu urapusira na enoni, hanana vi siana ke susu tangarerua. Henaka i manga ngekana, ma ngairerua karu ura hagabarasira.

¹⁹Tani na Siu ka râ me tenia i Antioko i Pisitia ma tenia i Ikonia. Ngaira ka katora na enoni, ka pane henira, ma ka takea o Paulo renigi na hê, ma ka okerataratagenia, ka mehura tenia na hinua, suria ga vi ma, vi i me.

²⁰Ma na matena na enoni, ga tongesuri, ka haku me rihia, ngaia ki aharaga ma ki aporo râ i hinua. Igê na tangiana i muri ngaia mo Banebasi karu râ i hinua i Terebe.

²¹O Paulo mo Banebasi karu ateate renia na Taroha Koro i hinua i Terebe, ma renia na ateateha iaterua rako na enoni ka tongesuria o Jesu. Ma hemuri ngairerua karu aporo i Lisitare, me muri karu aporo i Ikonio, ma hemuri karu aporo i Antioko i Pisitia.

²²Ngairerua karu hagaramonira na enoni, ga tongesuri, ma karu kanukanura, ka gatagata monari igê na tongesuriha. Ngairerua karu hagesurira, karu vi: “I tuguhigia, vi ga hatamigi bâraha na mamasiaganiha, hanana igia ka page vagevage igê na arahanga iana God.”

²³Ngairerua karu hagêgurira na meraha igê na ara ni hakuta na enoni, ga tongesuri, karu nunginungi ma karu harihari, ma karu nungia na Araha, ki anumasira, suria ngaira ka hagêguritogo renia.

²⁴I murina garu aharêvoro i na apanena i Pisitia, ngairerua karu ata me i Pamupilia.

²⁵Ngairerua karu tarohenia o Jesu tangara na enoni i hinua i Perega, ma hemuri karu so i hinua i Atalia.

²⁶Ma tenia i ngekana ngairerua karu tage igê na haka ma karu aporo i Antioko. I nago i hinua ngekê na enoni, ga tongesuri, ka bani nungia God, ki onosurirerua bâkoro igê na tagaraha iaterua, i kahu hato i ngekê.

²⁷Matena garu ata me i Antioko, ngairerua karu unira haku me na enoni, ga tongesuri, ma karu hagarongora, renia vi manga i he God ki tamanirerua igê na tagaraha iaterua, ma manga i he ngaia ki tangahia na tara tangara na enoni, ga pe Siu, ka tongesuri.

²⁸Ngairerua karu oga arihu henira na enoni, ga tongesuri i ngekana.