Read Kahua TAGARAHA IATA NA APOSOTOLO 16 Bible Online

TAGARAHA IATA NA APOSOTOLO 16 - Kahua bible

TAGARAHA IATA NA APOSOTOLO 16

¹O Paulo ki tavoraha tanga i Terebe ma tanga i Lisitara. Ma i ngekana ki oga igê o Timoti, na mane i tongesuri. Ma kenana ngaia ki na Siu, ma ki tongesuri nogana. Ma o vaemana ngaia ka na mane ni Agaia.

²Na enoni hato i Lisitara me Ikonio, ga tongesuri, ka visia o Timoti, vi na mane koro.

³O Paulo ki obania, vi merâ o Timoti. Tahema ngaia ki retea râ na gavona na varana. Ngaia ki kato vikana, suria na Siu hato, ga oga i hinua ngekana, ka girara, vi o vaemana o Timoti ki na mane ni Agaia.

⁴Matena ga vatugigi na hinua, ngaira ka hagarongora na enoni, ga tongesuri, renigi na ramata, ga bani nakagi na aposotolo ma na meraha i Jerusaleme, ma ka bonasira, ka arâ surigi na ramata ngegana.

⁵Tahema na enoni i na rotu ka kahu ama ni nganganihaga nga igê na tongesuriha, ma ka ama ni tataka nga tare i na ara ni tangiani.

⁶Ngaira ka râ ka aharêvoro i na apanena i Pirigia me Galasia. Na Higona Apu ki pe hagamarumungenira, vi ge ateate renia na Taroha Koro i na apanena i Asia.

⁷Matena ngaira ka mataro vê i Misia, ngaira ka uhungia, vi ga bêbanu i na apanena i Bitinia, ma na Higona Apu iana o Jesu ki pe hagamarumungenira.

⁸Tahema ngaira ka ritare râ i Misia, ma ka so tanga i Toroasi.

⁹Igê na bungiana ngekana o Paulo ki marute, vi bâsia ta na mane ni Masetonia, i râ me ki ura, ma ki nungia bâraha, ki vi: “Gu tarê me i Masetonia, ma ku tamanigami!”

¹⁰Pusina ma o Paulo ki marute hato, igami kami hagarurugu, kami tage tanga i Masetonia, renia mi girara, vi God ki bani hagagiraragami, hanana vi gami ateate renia na Taroha Koro tangara na enoni i ngekana.

¹¹Igami kami tage igê na haka i Toroasi, ma kami oto tarê tanga na marê i Samotarase, ma igê na tangiana i muri igami kami tage tarê tanga na hinua i Neapoli.

¹²Ma tenia i ngekana igami kami hatare, kami banu tanga i Pilipi, na hinua raha igê na apanena gi tage i Masetonia. Ma nikâ na enoni, ga goga i ngekana, ngaira ka râ me tenia i Roma. Igami kami oga na tangiani haritamani igê na hinua raha i ngekana.

¹³Igê na Tangiana ni Mamaroha igami kami hura pania na hinua, ma kami râ tanga na papana na ve, renia mi takusia, vi ngekana ki oga igê vari ta na agua iata na Siu, ga nunginungi igê. Igami kami oga so, ma kami meratamasi na gete, ga haku me i ngekana.

¹⁴Na hitangita na gete, ga rongogami, ngaia kani ka Litia. Na hinua iana kani i Tiatira. Ngaia ki hagavuringenigi na gahu rotorotoaga, ma ki raha era na meni. Ngaia ka na gete, i rahesia God, ma na Araha ki hagamataha obana, ki karinga, ma ki tongesuria na tamasinga iana o Paulo.

¹⁵Ngaia ma ngaira hato i ruma iana ka batesimo. Ma hemuri ngaia ki kahu unigami banu, ki vi: “Manga mu takusia, vi inê kê tongesuria maninga na Araha, mu arâ me, ma kamu gâga i ruma iaku.” Igami kami banu suria i rapurapugami.

¹⁶I ta na tangiana, matena mi râ tanga na agua iata na Siu, ga nunginungi tare igê, ki tarahugami me na kere gete vurivuri, ma ki atataroga. Ma na ataro era ngekê ki hagahinarua tare. Ngaira na enoni, ga bani vuria na kere gete ngekê, ka tavogi rako na haga, suria ngaia ki girara i hinahinaru.

¹⁷Ngaia ki mumurigami o Paulo megami, ma ki ama ni ngerengere nga, ki vivi: “Na mane ngegê ka na kariana God, i Raha Teha!”

¹⁸Ngaia ki kato vikê surigi na tangiani rako, mataro me o Paulo ki usi na apena renia. Tahema o Paulo ki aharo râ, ma ki vi tanga na ataro, ki vi: “Igê na raramohana o Jesu Kirisito inê kê bonasigo, gu hura me tenia!” Ki parama na ataro, ma ki hura me tenia na kere gete.

¹⁹Matena na enoni, ga bani vuria na kere gete ngekê, ka girara, vi i asa tangara nikâ, vi ge tavoa na haga renia na kere gete, ngaira ka ranguirerua o Paulo mo Sailasi. Ngaira ka okebaba henirerua tanga na mahera tangara na maneraha i hinua.

²⁰Ngaira ka torererua i maata na gavumane ni Roma i ngekana, ma ka vi: “Na mane ngegê ngairerua ka na Siu. Ngairerua karu erasigi na tauhamami.

²¹Ngairerua karu hagesurira na enoni, ka katogi na marâ, ga râ pusigi na ramata iamami. Igami, mi oga ikê, igami na Ai ni Roma, ma kami pe râ surigi na tauha ngegana!”

²²Na enoni, ga bani haku me, ka nahuirerua nogata. Na maneraha i hinua ka tarisigi râ na gahu iaterua o Paulo mo Sailasi, ma ka bonasira na mane ni me ka ramusirerua.

²³Matena ga ramusirerua hato, na mane ni me ka kasirerua igê na ruma ni hagaitangiha. Ma na maneraha ka bonasia na mane, i anumasia na ruma ni hagaitangiha, ka vi: “Go purusirerua banu bâkoro, hanana siana karu gavagava.”

²⁴Matena na mane, i anumasia na ruma ni hagaitangiha, ki rongo vikana, ngaia ki kasirerua igê na kiboru kere banu ngavê, ma ki rohagi na êgaterua igê na bogoni na apinige i higa ngavê.

²⁵Na ararina i gupu ni bungi, o Paulo mo Sailasi karu nunginungi, ma karu kirigi na ki tanga God, ma na enoni getera, ga oga i na ruma ni hagaitangiha, ka rongorerua.

²⁶Ki parama, ma ki nunu raha era, ma ki ngingia bâraha na ruma ni hagaitangiha ma na angisi ruma. Ka parama, ma ka akeke na ara ni maa ni ruma, ma na seni ka guma tenira na enoni, ga oga i na ruma ni hagaitangiha.

²⁷Na mane, i anumasia na ruma ni hagaitangiha, ki rite. Ma na matena i bâsigi, ga tahataha na maa ni ruma i ruma ni hagaitangiha, ngaia ki takusia ma, vi na enoni hato i ruma ni hagaitangiha ka bani gava. Tahema ngaia ki amuria na tatapa borahu iana, ma ki haga ni ahura marena renia.

²⁸Mo Paulo ki ngere raha ngavê, ki vi: “E, siana ko ahurago maremu! Igami hato ikê!”

²⁹Na mane, i anumasia na ruma ni hagaitangiha, ki vi: “Torea me na mangate!” Ma ngaia ki tango banu i tata, ma ki susure i maaterua o Paulo mo Sailasi.

³⁰Ma hemuri ki torererua hura, ma ki hagatererua, ki vi: “Na ta kani tuguhiê, vi ve katoa, hanana ve nahunia renia na mêriha mora ma tarema?”

³¹Ngairerua karu arami, karu vi: “Gu tongesuria na Araha o Jesu, ma hanana igamu, igo ma ngaira hato i ruma iamu, kamu page nahunia na mêriha mora ma tarema.”

³²Ma ngairerua karu tarohenia na Araha tanga ngaia ma tangara na enoni hato getera i ruma iana.

³³Na matena igê nga na bungiana ngekana na mane, i anumasia na ruma ni hagaitangiha, ki torererua banu i ta na kiboru, ma ki manuhigi na maara iaterua. Ma ngaia ma na enoni hato i ruma iana ka batesimo i na matena ngekana.

³⁴Ngaia ki unirerua banu o Paulo mo Sailasi i ruma iana, ma ki vatererua na ngêra. Ngaia ma na enoni i ruma iana ka vagevage bâraha, renia ngaira ka kahu tongesuria God.

³⁵Na mavorarotana na tangiana i muri, na gavumane ni Roma ka bonasira na araha iata na mane ni me, ka vi: “Mu rupasirerua, karu râ.”

³⁶Ngekana na mane, i anumasia na ruma ni hagaitangiha, ki hagarongoa o Paulo renia, ki vi: “Na gavumane ka bonasiê, vi gê rupasigamurua, igo mo Sailasi, kamuru arâ. I koro ma, muru arâ, ma kamuru arâ suri parongamurua.”

³⁷Mo Paulo ki vi tanga na araha iata na mane ni me, ki vi: “Na gavumane ka pe hagatanga monari rârâ renigamurua, vigamirua kamuru tanua ta na tarana, i pe koro. Ma ka ramusigamirua hagabo râ i maata na enoni! Ma igamirua nogamirua kamuru mangara na Ai ni Roma! Ma hemuri ngaira ka kasigamirua igê na ruma ni hagaitangiha. Ma i ngekê ngaira ka kahu obania vari, vi ge rupasigamirua hura, kamuru arâ pinihi? I asa ngavê! Na gavumane ni Roma ki tuguhira, viga arâ me mareta ikê, ma ka rupasigamirua hura!”

³⁸Na araha iata na mane ni me ka hagarongora na gavumane ni Roma renia na tarana ngekana. Ma na matena ngaira ka girararerua, vi o Paulo mo Sailasi karu manga na Ai ni Roma, ngaira ka magu.

³⁹Tahema ngaira ka râ, ma ka hagakorokoro tangarerua. Ma hemuri ka kahu torererua hura tenia na ruma ni hagaitangiha, ma ka vi tangarerua bâkoro, ka vi: “Muru arâ pania na hinua ikê.”

⁴⁰O Paulo mo Sailasi karu pania na ruma ni hagaitangiha, ma karu râ i ruma iana ka Litia. Ma i ngekana ngairerua karu tarahura igê na tamaterua, ga tongesuri, ma karu kanukanura. Hato vikê, ma ngairerua karu râ.