Read Kahua TAGARAHA IATA NA APOSOTOLO 17 Bible Online

TAGARAHA IATA NA APOSOTOLO 17 - Kahua bible

TAGARAHA IATA NA APOSOTOLO 17

¹Ngairerua karu râ vê i Amipipoli me Apolonia, ma karu ata i Tesalonika. Ma i ngekana ki oga igê na ruma ni sukuru iata na Siu.

²Tarema o Paulo ki arâ i ruma ni sukuru, ma i ngekê ngaia ki râ nikâ. Ma surigi na Tangiani gi oru ni Mamaroha ngaia ki merahekarigi na enoni i ngekana renigi na tamasinga i na Buka Apuna.

³Ngaia ki ramatenigi na tamasinga, ma ki hagatanga monari renigi, hanana vi tuguhia na Mesaia, i hatamia na mamasiaganiha, ma ki mauri aporo tenira na enoni, ga me. O Paulo ki vi: “Ngaia nogana Jesu, gê tarohenia tangagamu, ngaia nga ki na Mesaia.”

⁴Tani na hitangita ka tongesuria na tamasinga iana o Paulo, ma ka vora re na tamaterua o Paulo mo Sailasi, ma nikâ ga rako na enoni ni Agaia, ga rahesia God, ma nikâ ga rako na gete iata na maneraha.

⁵Ma na Siu ka hengari, ma ka unira haku me tani na mane purua, ga hotohoto ma ka makuakua ma ka gâga sutaga, ma ka vora re na hakuta na enoni, ga mangamangariaga. Ngaira ka sugaria na hinua hagenani, ma ka taharia na ruma iana o Jasoni, renia ga uhungia, vi ga tarahurerua o Paulo mo Sailasi, ma ka torererua hura tangara na mane igê na Kaunselo ni hinua.

⁶Ma suria ga pe tarahurerua, ngaira ka okebaba henira o Jasoni ma tani na enoni getera, ga tongesuri, ma ka merarâ tangara ma mane igê na Kaunselo ni hinua, ma ka ngerengere, ka vivi: “Na mane ngegê kaniga oga sutaga igê na ara ni agua! Ma i ngekê ngaira ka râ me i hinua iaka.

⁷Mo Jasoni ki unira banu i ruma iana. Ngaira hato ka aharê tenigi na ramata iana na maneraha i teha igê na Gavumane i Roma, suria ngaira ka vi, vi i bani oga noga na maneraha getea i teha o Jesu na atana.”

⁸Ngaira ka hagamangarira na enoni ma na mane igê na Kaunselo ni hinua renigi na tamasinga ngegana.

⁹Na mane igê na Kaunselo ni hinua ka hagataratarara o Jasoni ma na tamana, hanana vi ga rupasira, ma hemuri ka kahu nakara vê, ka râ.

¹⁰Matena i bungi me noga, na enoni, ga tongesuri, ka kasirerua o Paulo mo Sailasi, karu râ tanga i Beroa. Matena garu ata vê, ngairerua karu banu igê na ruma ni sukuru iata na Siu.

¹¹Na enoni i ngekana ka agana ngavê, ka karingarerua teharira na enoni i Tesalonika. Ngaira ka obania bâraha, vi ga rongoa na tamasinga iana o Paulo, ma i na ara ni tangiana ngaira ka hagesuringenigi na tamasinga i na Buka Apuna, hanana vi ga bâsigi, vi ga monari vari ka na marâ, i visigi o Paulo, se mareha.

¹²Ga rako na hitangita ga tongesuri. Ma i Agaia ka rako igê na gete raha ma ka ruruguha ma ka rako nikâ na mane ni Agaia, ga tongesuri.

¹³Ma na matena na Siu i Tesalonika ka rongo, vi o Paulo ki ateate nikâ i Beroa renia na tamasinga iana God, ngaira ka râ me i ngekana, ma ka hagamangarira na enoni ma ka sugarira, hanana vi ga rêra pusia o Paulo.

¹⁴Ma na enoni, ga tongesuri, ka hagatorangenia ototo taha o Paulo, mo Sailasi mo Timoti karu oga so i Beroa.

¹⁵Na mane, ga râ ka kasia o Paulo, ka metage i arâ, ma ka megoto i Atene. Ma hemuri ngaira ka aporo i Beroa, ma ka torea na tamasinga iana o Paulo tangarerua o Sailasi mo Timoti, vi garu mumuria râ rêrê.

¹⁶Matena o Paulo ki ogakarirerua o Sailasi mo Timoti i hinua i Atene, ki era bâraha na obana, renia ngaia ki bâsigi na nunuta na ataro, ga rako teha vê i hinua.

¹⁷Tahema i ruma ni sukuru ngaia ki merahekarigi igê na Siu ma na enoni, ga pe Siu ma ka rahesia God, ma igê na mahera ngaia ki merahekarigi igê na enoni, ga heraonge i ngekana, ma ka ura so, vi ga rongoa.

¹⁸Tani na mane, ka râ suria na hagesuringa iana o Seno, ngaira ka mehekarigi nikâ. Tani ka vi: “Na ta ki obania, vi visia o veka? Ngaia ki tamasi bâraha, ma ki pe girara ta na marâ!” Ma tani ka vi: “Ngaia ki bâ, manga i tamasi renira na ataro iata na enoni mahuara.” Ngaira ka vi vikana, suria o Paulo ki ateate renia o Jesu, ma renia na mêriha aporo tangara na enoni.

¹⁹Tahema ngaira ka vi tanga o Paulo, ki râ henira i pasita na mane igê na Kaunselo i Areopago, ma ngaira ka vi: “Igami kami obania, vi gami girara na hagesuringa haoru, go tamasi renia ngekê.

²⁰Tani na marâ, mi rongogi tenigo, ka haoru tangagami, ma kami obania, vigami giraragi na girarani.”

²¹(Renia na Ai ni Atene ma na mahuara, ga oga i ngekana, ka obania, vi ga ama ni hagagara nga tare, ma ka ama ni herongogi nga tare renigi na marâ, ga kahu rongogi haoru.)

²²Hoita, o Paulo ki râ ki ura i maata na mane igê na Kaunselo i Areopago, ma ki vi: “Igamu na enoni ni Atene! Inê kê bâsigamu, mu hagarapera bâraha na ataro igê na ara ni tarani.

²³Suria matena gê râhia na hinua iami, ma kê bâsigi na agua, mu vogasira igê na ataro, inê kê tarahua nikâ na vakivaki na hê, ga tahegi igê na tamasinga igê agê, ka vi, ‘Tanga God, ga pe girara.’ Na marâ igamu kamu rahesia, henaka ma igamu kamu pe girara, ma ngaia nga ki na marâ, inê gê tarohenia tangagamu akê.

²⁴God, ki bani hagavoragi na ano ma na ara ni marâ hato ngegê, ngaia ki na Araha, i nahunia na vavearo ma na maveta, ma ngaia ki mareha, vi ge oga igê na ruma, ga tagarahigi na enoni, vi ga rahesia igê.

²⁵Ma nikâ, ngaia ki pe naasia ta na marâ, hanana vi na enoni ke vatea, renia vi ga tagara tanga, suria ngaia marena ki hagamêrigi na ara ni mara hato, ma ki vatera na enoni hato na ani mavê na marâ, ga obanigi, vi ga mauri renigi.

²⁶God ki hagavora i nago na mane gi tage, ma tenia na mane ngekana ngaia ki hagavorara na ataka mavê na enoni, ma ki katora, ka manasia na maveta hagenani. Matena i mamênga, vi ge hagavorara, ngaia ki bani nakagi, ka arari na bevoani ma na bogoni na agua, ngaira ga page gâga igê.

²⁷Ngaia ki kato vikana, hanana vi ngaira ka page garia, ma ka page tarahua vari, matena ga tatagara rârâ renia God manga na mane, i guru na maana. I manga ngekana, ma ki monari, God ki pe oga hagatê tenia na anima na hitangika.

²⁸Renia ‘Igê na raramohana igia ka mauri ma ka arârâ ma ka gâga.’ Ma tani na enoni i pasimi, ga segesege na ki, ka visia vikê nikâ, ka vi, ‘Igia hato nikâ na karena.’

²⁹Suria igia na karena, siana ka takusia, vi God ki bâ manga na nunuta na ataro, na enoni katokato ka tagarahigi renigi na golo, se na siliva, se na hê.

³⁰I nago God ki bani piringiape me henira na enoni, suria ngaira ka pe girara, ma i ngekê ngaia ki bonasira na enoni hato i na ara ni agua, ka nakagi vê na tauhata, ga pe koro.

³¹Renia ngaia ki bani naka na tangiana, hanana vi ngaia ki page surira oto igê na enoni hato i maveta, ma ta na mane ngaia i bani atea, ki page katoa na suriha ngekê. Ngaia ki bani hagatanga monari renia na tarana ngekana tangara na enoni hato, suria ngaia ki bani hagamêria na mane ngekana tenira na enoni, ga me.”

³²Matena ngaira ka rongoa o Paulo, i tamasi renia na mêriha aporo tenira na enoni, ga me, tani na hitangita ka mehagaru, ma tani ka vi: “Igami kami obania, mi rongogo nikâ, go tamasi renia na tarana ngekana.”

³³Ma i ngekana o Paulo ki râ panira na enoni, ga hekarigi i ngegana.

³⁴Tani na enoni ka pane henia o Paulo, ma ka tongesuria. I berarogata na enoni, ga tongesuri ngegê, ka oga igê o Tionisio, na mane na Kaunselo i Areopago, ma ka Tamari, ma tani na enoni nikâ.