Read Kahua TAGARAHA IATA NA APOSOTOLO 18 Bible Online

TAGARAHA IATA NA APOSOTOLO 18 - Kahua bible

TAGARAHA IATA NA APOSOTOLO 18

¹Ma hemuri o Paulo ki pania i Atene, ma ki râ tanga i Korinto.

²I ngekana ngaia ki tarahua igê ta na Siu, o Akuila na atana. Ngaia ki na mane ni Ponto. Ngaia ma ka Pirisila na hehene iana karu kahu râ me ma tenia i Itali, renia na mane i teha igê na gavumane i Roma, o Kolotio na atana, ki bani paira na Siu hato tenia i Roma. Mo Paulo ki râ ki bâsirerua.

³Ngaia ki oga henirerua, ma ki tagara henirerua, renia ngaia ki tagara meni na haga, vi ngêngê renigi. Ngaia ki tagarahigi na ruma na gahu mangarerua na ai Akuila.

⁴Igê na ara ni Tangiani ni Mamaroha ngaia ki tamasi ramo tare i ruma ni sukuru, ki uhungira na Siu ma na ani, ga pe Siu, hanata vi ge tongesuri.

⁵Matena o Sailasi mo Timoti karu ata me tenia i Masetonia, o Paulo ki hato tenia na tagaraha meni haga, ma ki ateate ma renia na taroha renia o Jesu. Ngaia ki tarohenia tangara na Siu, vi o Jesu ki na Mesaia.

⁶Ma suria ngaira ka haritohea o Paulo, ma ka tamasi erasia, tahema o Paulo ki aramira, ki tamasi ramo, ki murisigera, ma ki vi tangara, ki vi: “Manga mu pe tahitahi, na tauhami maremi! I mareha vi inê. Haganega tenia i ngekê, inê be râ be ateate tangara na enoni, ga pe Siu.”

⁷Ma ngaia ki panira, ma ki râ ki oga i pasina o Titio Jusito, na mane i pe Siu ma ki rahesia God. Na ruma iana ki hagarangia na ruma ni sukuru.

⁸O Kirisipo, i bâsuria na ruma ni sukuru, ma na ruma iana ka tongesuria na Araha. Ma ka rako na enoni getera i Korinto, ga rongoa na Taroha Koro, ka tongesuria, ma ka batesimo.

⁹I ta na bungiana o Paulo ki marute, ma ki bâsia, vi na Araha ki vi tanga, ki vi: “Siana ko magu. U ramo nga ku tamasi. Siana ko hatohato,

¹⁰renia inê kê gâga henigo. I asa ta na enoni, vi ge page erasigo, suria i na hinua raha ikê ka tataka igê na kariaku.”

¹¹Vikana o Paulo ki oga i ngekana suria na harisi gi tage ma na hageha ge ono, ma ki hagesurira na enoni renia na tamasinga iana God.

¹²Matena o Galio ki vora re na gavumane ni Roma i Agaia, na Siu ka haku me, ma ka ranguia o Paulo, ma ka torea ka hagatamasia i pasina o Galio.

¹³Ngaira ka vi: “O vani ngekini ki uhungira na enoni, vi ge rahesia God igê na tarana, na ramata ki manimania!”

¹⁴Matena o Paulo ki obania vi tamasi, o Galio ki vi tangara na Siu, ki vi: “Manga vi na mane ikê, ma ki aharê igê na ramata, se vi katoa na eraha raha, inê ki arariê, vigê piringiape ma kê rongogamu, na Siu. Ma ki mareha.

¹⁵Ma suria igamu kamu hetuguri ma renigi na tamasinga ma renigi na ata na enoni, ma renigi na ramata iami maremi, igamu maremi kanimu hagaotogi. Menê kê usi, vi ve surigi na tarani ngegana!”

¹⁶Ma ngaia ki paira hura tenia na ruma ni hagatamasi.

¹⁷Ngaira hato ka ranguia o Sositene, i bâsuria na ruma ni sukuru, ma ka ramusia i maana na ruma ni hagatamasi. Mo Galio ki nakara vê ma.

¹⁸O Paulo, ki oga i Korinto surigi na tangiani rako henira na enoni, ga tongesuri. Ma hemuri ngaia ki panira, ma ki tage henirerua ka Pirisila mo Akuila, ma ka râ i Siria. Ngaia ki tanua na suruha tanga God i Kenikerea. Ngaia ki goro bê huri i nago, ma hemuri ki kahu tage.

¹⁹Ngaira ka ata i Epeso. Ma i ngekana o Paulo ki panirerua igê ka Pirisila mo Akuila. Ngaia ki banu i ruma ni sukuru, ma ki merahetamasi na Siu.

²⁰Na enoni, ga tongesuri, ka nungia, vige gâga arihu so henira, ma ngaia ki usi.

²¹Ma ngaia ki vi tangara, matena i râ panira, ki vi: “Manga God, ma ki obania, inê kê page aporo me tangagamu.” Hoita, ma ngaia ki tage pania i Epeso.

²²Matena i bani ata râ i Sesarea, ngaia ki bêkê i Jerusaleme, ma ki vatugira na hakuta na enoni, ga tongesuri, me muri ki râ i Antioko.

²³Ngaia ki ogasigi tani na mateni, ma hemuri ki kahu râ. Ngaia ki vatugigi na hinua i na apanena i Galasia me Pirigia, ma ki kanukanura igê na enoni hato, ga tongesuri.

²⁴Ta na Siu, o Apolo na atana, ki râ me i Epeso. I pasina i Alesantiria. Ngaia ki na mane tako, ma na mane ni tamasinga. Ngaia ki girara koro era na hagesuringa i rarona na Buka Apuna.

²⁵Ngaia ki hagesuringenia bâkoro na Hagesuringa iana na Araha. Ngaia ki ramo ngavê, vi tamasi renia o Jesu, ma ki hagesurira bâkoro na enoni renia. Ma na marâ gi tage ma, ngaia ki girara ma na batesimo, o Joane i bani ateate renia.

²⁶Ngaia ki pe magu, ma ki haganega ki tamasi tangara na enoni i ruma ni sukuru. Matena ka Pirisila mo Akuila karu rongoa, ngairerua karu merâ i pasiterua, ma karu ramatenia maninga na Hagesuringa iana God tanga.

²⁷O Apolo ki takusia, vi arâ i Agaia. Tahema na enoni i Epeso, ga tongesuri, ka tamania, ka segesege tangara na enoni i Agaia, ga tongesuri, ma ka kanukanura, hanana vi ga unia banu o Apolo i pasita. Matena ngaia ki ata vê, ngaia ki tamanira bâkoro na enoni, ga tongesuria o Jesu, suria God ki koro tangara.

²⁸Ma renia ngaia ki ramo ki merahetuguri, ngaia ki teharira na Siu i maata na enoni, ma renigi na tamasinga i na Buka Apuna ngaia ki hagatanga monari renia vi o Jesu ki na Mesaia.