Read Kahua TAGARAHA IATA NA APOSOTOLO 19 Bible Online

TAGARAHA IATA NA APOSOTOLO 19 - Kahua bible

TAGARAHA IATA NA APOSOTOLO 19

¹Matena o Apolo ki oga i Korinto, o Paulo ki aharêvoro i Asia, ma ki ata me i Epeso. Ma i ngekana ngaia ki tarahura igê tani na enoni, ga tongesuri.

²Ma ngaia ki hagatera, ki vi: “Na Higona Apu ki angarigamu vari, matena mu têa na tongesuriha?” Ngaira ka arami, ka vi: “Igami ki mareha ngavê, vi gami rongoa rârâ ta na marâ renia na Higona Apu.”

³O Paulo ki hagatera, ki vi: “Na ani ta na batesimo kani mu batesimo renia?” Ngaira ka arami, ka vi: “Na batesimo, na ani i tamasi o Joane renia.”

⁴O Paulo ki vi: “Na batesimo, na ani o Joane i tamasi renia, ki tangara na enoni, ga urusigi na parongata era. Mo Joane ki vi tangara na Isiraelita, ki vi, ‘Igamu ki tuguhigamu, vigamu tongesuria o vani, i page mumuriê me.’ Ngaia ki no Jesu.”

⁵Matena ngaira ka rongo vikana, ngaira ka batesimo igê na raramohana na Araha Jesu.

⁶O Paulo ki têbuhira, ma na Higona Apu ki angarira, ma ngaira ka tamasi igê na tamasinga, i asa na enoni, vi ge rongogiraragi, ma nikâ ga tamasia na viteana God.

⁷Ngaira hato ka vora vari na mane tangahuru matarerua.

⁸Surigi na hageha ge ono o Paulo ki banu i ruma ni sukuru, ma ki pe magu, vi ge meratamasi na enoni. Ngaia ki merahetugugi, ma ki uhungira, vi ge tongesuria na Arahanga iana God.

⁹Ma tani na hitangita ka togeaga, ma ka usi, vi ge tongesuri, ma ka tamasi erasia na Hagesuringa iana na Araha i maata na enoni hato. Tahema o Paulo ki panira, ma ki merarâ na enoni, ga tongesuri. Ma i na ara ni tangiani ngaia ki merahekarigi igê na ruma ni hagesuri iana o Tirano.

¹⁰O Paulo ki kato vikana surirerua na harisi gi rua. Tahema na enoni hato, ga oga i na apanena i Asia, na Siu ma na ani, ga pe Siu nikâ, ka rongoa na tamasinga renia na Araha.

¹¹God ki katoa Paulo, ki katogi na mena raha.

¹²Henakagi na taolo ma na gahu ni tagaraniha iana o Paulo, na enoni ka toregi tangara na ani, ga maeha, hanana ga hagakomagara, ma ka paira hura na ataro era renigi.

¹³Tani na Siu, ga râhigi na hinua ma ka paira hura na ataro era nikâ, ngaira nikâ ka uhungia, vi ga tagara vikana nogata igê na raramohana na Araha Jesu. Ngaira ka vi tangara na ataro era, ka vi: “Igê na raramohana o Jesu, o Paulo i ateate renia, inê kê bonasigo: gu hura me!”

¹⁴Ga tagara vikana nogata ngaira o karena gi pi o Sekeva, na mane ni vogasiha i teha iata na Siu.

¹⁵Ma na ataro era ki vi tangara, ki vi: “Inê kê girara o Jesu, ma kê rongoa ta na marâ renia o Paulo. Ma igamu, o ti igamu?”

¹⁶Ma na mane atataroga ki nahuira, i ramo teha, ma ki teharira. Ngaia ki hagamamarira, ma ki tarisigi na gahu iata, ma ngaira ka gava tenia na ruma iana.

¹⁷Na enoni hato, ga oga i Epeso, na Siu ma na ani, ga pe Siu, ka rongoa na tarana ngekana. Ngaira ka magu ngavê. Ma na enoni ka visia raha ngavê na raramohana na Araha Jesu.

¹⁸Rako na enoni, ga tongesuri, ka râ me, ma ka tamasi i maata na enoni, ma ka visigi tangara na marâ, ga bani tanugi.

¹⁹Ma i berarogata ka rako na enoni, ga bani mangata, ma ka bani haritavo, ma ka bani marumaru i nago. Ngaira ka tora haku me na buka iata renigi na tarani ngegana, ma ka sungigi i maata na enoni hato, ka bâsira henigi. Ngaira ka tomahaku na meni na buka, ma ki vora na haga na rehagaro tangahuru gi rima.

²⁰Igê na tarana ngekana na tamasinga iana na Araha ki raramohaga. Ma ka tataka na enoni, ga rongoa na tamasinga renia na Araha, ma ka tataka na enoni, ga tongesuri.

²¹I murini ga bani vora me na tarani ngegana, o Paulo ki tako, vi arâ ki riri i Masetonia me Agaia, ma ki arâ i Jerusaleme. Ngaia ki vi: “I murina gê arâ i ngekana, ki arariê, vi ve râ nikâ i Roma.”

²²Nikâ ngaia ki hagatorangenirerua o Timoti mo Erasito i Masetonia. Ngairerua ka na tamana. Ma ngaia marena ki oga ma vê i na apanena i Asia.

²³I na matena ngekana ki vora me na perenga suria na Hagesuringa iana na Araha.

²⁴I ngekana ki oga igê ta na mane, o Temiterio na atana. Ngaia ki tagarahigi na marâ renigi na siliva. Renigi na siliva ngegana ngaia ki tagarahigi re na nununa na ngêsu tanga ka Aretemi na ataro, ma na enoni tagara ka tavogi rako na haga renigi.

²⁵Tahema ngaia ki unira haku me na tamana ma na ani getera, ga tagara manga ngaira, ma ki vi tangara, ki vi: “Vegamu, mu girara, igia ka ruruguha renigi na tagaraha iaka.

²⁶Mu bâsigi noga, ma kamu rongogi noga na marâ, i katogi o Paulo kê. Ngaia ki vi, na nunuta na ataro, ga tagarahigi na enoni, ka mareha ngavê, vi na ataro. Ngaia ki bani katora na enoni rako, ka tongesuria na tamasinga iana, ikê i Epeso ma nikâ i Asia hagenani vari.

²⁷Hoita, i pe asa, vi na enoni ke page tamasi erasia na tagaraha iaka. Ma ta na marâ nikâ, ki pe asa, vi na enoni ke page visia, vi na ngêsu tanga ka Aretemi, na ataro raha, ki na marâ purua ma, ma ka page bonotenia hagetage na raramohana ka Aretemi, na ataro, ga rahesia na enoni hato i Asia ma i maveta hagenani!”

²⁸Matena na enoni ka rongogi na tamasinga ngegana, ngaira ka mangariaga teha vê, ma ka haganega ka ngerengere, ka vivi: “I asa, vi ge so na atana ka Aretemi ni Epeso!”

²⁹Na perenga ki râhia hagenani na hinua raha. Ngaira ka ranguirerua o Gaio mo Arisitako. Ngairerua ka na mane ni Masetonia, ma karu râ henia o Paulo. Ma ngaira ka hatani bugu renirerua tanga na agua ni hakuta.

³⁰O Paulo marena ki obania, vi arâ ma ki tamasi tangara na enoni, ma na enoni, ga tongesuri, ka manimania.

³¹Tani na gavumane i ngekana, na tamana koro o Paulo, ka kasi tamasinga tanga nikâ, ma ka vi pusia, vi siana ki arâ ma ki tamasi tangara na enoni igê na agua ni hakuta.

³²Hoita, na enoni hato, ga haku i ngekana, ka ngerengere teha vê. Tani ka ngerengere, ka visigi tani na marâ, ma tani ka ngerengere, ka visigi na ani getigi na marâ, suria ga rako na hitangita ga bagatatako, vi na ta kaniga haku me renia.

³³Tani na enoni ka vi ma, vi o Alesanta kani bêngenia na tarana ngekana, renia na Siu ka hagêrasia i maata na enoni. Mo Alesanta ki bubuhira na enoni, hanana vi uhungia ki ateate tangara na enoni, ma ki ramatenigi na marâ.

³⁴Ma na matena ga girara, vi ngaia ki na Siu, ngaira hato ka ngerengere arihu teha vê, ka vivi: “I asa, vi ge so na atana ka Aretemi ni Epeso!”

³⁵Ma hemuri na mane segesege iana na Kaunselo i hinua ki girara, i hagamunira na enoni. Ngaia ki vi: “Igamu na enoni ni Epeso! Na ara ni enoni ki girara, vi na hinua i Epeso ki tuguhia, vi onono surigi na ngêsu iana na ataro raha ka Aretemi ma na hê apuna, i vota me tenia na vavearo.

³⁶I asa ta na enoni, vi ge hagaigarerua na marâ ngegê. Hoita, mu manapu, ma kamu takotako, hanana siana kamu tanua ta na marâ, i pe koro!

³⁷Igamu kamu bani torererua me na mane ngegê, henaka vi ngairerua karu pe hanagoa rârâ ta na marâ igê na ngêsu, se vi garu visia bera na ataro iaka ka Aretemi.

³⁸Manga o Temiterio ma na mane tagara iana ma ka obania, vi ga torea ta na enoni renia ta na marâ, i pe koro, ngaira ki tuguhira, viga torea i pasita na gavumane igê na tangiani, ga hagatamasi igê. Ngaira ki ararira viga biribiri heakara igê na tamasinga.

³⁹Ma ki manga igamu, ma kamu obanigi tani na marâ getigi, igamu ki tuguhigamu, vigamu hagaotogi igê na hekarigiana iata na ai ni hinua, matena ga hekarigi suria na ramata.

⁴⁰Renia ki pe asa, tangara na gavumane ni Roma vige vi, igia ka katoa na perenga igê na tarana, ga katoa i ngekê. Na perenga ngekê ki pe tonga hunana, ma ki asa iaka, vi ge page visia, vi ngaia ki tonga hunana koro.”

⁴¹I vi hato vikana, ma ki vi tangara vê ka râ.