Read Kahua TAGARAHA IATA NA APOSOTOLO 2 Bible Online

TAGARAHA IATA NA APOSOTOLO 2 - Kahua bible

TAGARAHA IATA NA APOSOTOLO 2

¹Matena i ata me na tangiana na Pentekosite, ngaira hato na enoni, ga tongesuri, ka oga haku i na agua gi tage.

²Ki parama, ma ki râ me ta na marâ tenia na vavearo, i rongo manga ta na roga raha, ma ngaira hato i ruma ka rongoa.

³Ma hemuri ngaira ka bâsigi tani na marâ, ga bâ mangagi na vavatani na gi, ga totoko suria na ara ni hitangita, ga oga i ngekana.

⁴Na Higona Apu ki angarira ngavê, ma ngaira ka haganega ka tamasi igê na tamasinga i na agua getigi, suria na Higona Apu ki katora ka tamasi vigana.

⁵I ngekana i Jerusaleme ka oga igê na Siu, na enoni ga rotu koro. Ngaira ka râ me tenigi na ara ni agua getigi i maveta.

⁶Matena ga rongoa na tarana ngekana, i vora me, na enoni rako era ka haku me. Ngaira hato ka kone, renia na ara ni hitangita ki rongora na enoni, ga tongesuri, ga tamasi igê na tamasinga iana marena.

⁷Ngaira ka gasuga, ma ka kone ka tamasi raha, ka vi: “Se, ngaira na Ai ni Galilea, ma ki tanu hega kaniga tamasi vigana?

⁸Tanu hega igia hato kaniga rongora, ga tamasi igê na tamasinga iaka mareka?

⁹Igia ka râ me tenia i Patia me Metia, me Elama; tenia i Mesopotamia, i Jutea, me Kapatosia; tenia i Ponto me Asia;

¹⁰tenia i Pirigia me Pamupilia; tenia i Esipito me na apanena i Libia hagarangia i Sairini. Ma tani na hitangika ka râ me tenia i Roma.

¹¹Tani ka Siu, ma tani ka pe Siu, ma ka bani têa na rotu iata na Siu. Ma tani na hitangika ka râ me tenia i Kerete me Arabia. Ma kamu bâ, igia hato ka rongora, ga tamasi igê na tamasinga hehegitigi iaka mareka renigi na tagaraha raha, God i bani katogi.”

¹²Renia ga gasuga, ma ka bagatatako, tahema ngaira hato ka ama ni hehagateri nga, ka vi: “E, na ta ki na girarana na tarana ngekê?”

¹³Ma tani ka tê hagatara henira na enoni, ga tongesuri, ka vi: “E, na mane, i nahuira na tonoha ka beka ngegê!”

¹⁴Mo Petero henira na tamana na aposotolo tangahuru gi tage matare tage ki ura râ, ma ki haganega ki tamasi raha tangara na enoni, ki vi: “Goaku na Siu, megamu hato mu oga i Jerusaleme, mu rongoê, ma kamu karinga na marâ, ve visia tangagamu.

¹⁵Mu visira, vi na mane ngegê ka tono. Mareha! Na arito ki kahu haneteva ma.

¹⁶Bâ, na poropete o Joele ki bani tamasi renia na tarana, mu bâsia i ngekê akê, suria ngaia ki vi vikê:

¹⁷‘God ki vi: Nga hanana na marâ, gê page katoa igê na hagahato tangiani kani ikê: Inê kê page vatera na enoni hato na Higona Apu iaku. O karemi ma ka karemi ka page taroheniê. Na mane taura i pasimi ma na mane êragi nikâ ka page marute.

¹⁸Nikâ igê na tangiani ngegana inê kê page votoa igê na Higona Apu iaku tangara na kariaku, na ani mane ma na ani hehene, ma ngaira ka page taroheniê mangara na poropete.

¹⁹Inê kê page tanugi na mena i vavearo ma na tagaraha raha i maveta. Ma ka page oga na gapu, ma na gi ma na roborobona raha.

²⁰Na arito ki page roto, ma na hageha ki page memera manga na gapu. Ma hemuri ki page atata me na Tangiana na Suriha Raha iana na Araha.

²¹Ma na enoni, ga tongesuria na Araha, ka page tahi tanga na mauriha mora.’

²²“Igamu na goaku, Isiraelita, mu rongogi na tamasinga igê agê! God ki bani hagabângenia maninga tangagamu, renia ngaia ki kasia o Jesu i Nasarete tanga na tagaraha iana, suria ngaia ki katogi na mena, ma na tagaraha raha, ma na hagesuringa raha igê na raramohana God. Igamu maremi kamu bani girara na tarana ngekê, suria na tarani ngegê ka bani vora me i pasimi.

²³God ki hagamarumungenigamu, kamu rakua o Jesu surigi na obaniha ma na katoha iana. Megamu kamu bani hagamesia, ma kamu bani katora na enoni era, ka rapusia igê na kuruse.

²⁴Ma God ki bani hagamêria aporo tenira na enoni, ga me, ma ki bani hagatahia tenigi na mamasiaganiha na mera, suria na mera ki asa, vi ge teharia tare.

²⁵Renia o Tavite ki tamasi renia o Jesu, ki vi: ‘Inê kê bâsia na Araha, i gâga heniê tare, suria ngaia ki tamaniê, siana kê votavota.

²⁶Tahema i koro na obaku ma kê tamasi vagevage. Henaka ma gê girara gê meme, inê kê page mamaro, suria inê kê hagêguritogo renia na Araha.

²⁷Suria igo, God, ki asa, vi gu pania na ataroku igê na atohata na enoni, ga me. Ma ko page usitenia, vi ge kakaga na kariamu koro.

²⁸Igo ko bani hagabâsiê renigi na tara tanga na mauriha, ma renia go gâga heniê, inê kê page vagevage teha ngavê.’

²⁹“Goaku! I tuguhiê, ve hagagiraragamu bâkoro renia na êvarika o Tavite. Ngaia ki me, ma ka bani bagia, ma na anoanona ki goga mênga i pasika mataro me i ngekê.

³⁰Ngaia ki na poropete, ma ki bani girara na suruha iana God tanga. God ki tohe, ma ki surua, vi page kasia tani na hitangita na raraha iana o Tavite, ki maneraha ngavê, manga ngaia marena o Tavite.

³¹O Tavite ki bani bâsia râ na marâ, God i kato vi page tanua. Tahema ngaia ki tamasi renia, vi na Mesaia ki page mauri aporo, suria ngaia ki vi: ‘God ki pe pania igê na atohata na enoni, ga me, ma na gahuana ki asa, vi ge page kakaga.’

³²“God ki bani hagamêria nogana o Jesu tenira na enoni ga me, ma igami hato kami tarohenia.

³³God Vaemana ki bani kasia akê, ki araha, ma ki bani vatea na Higona Apu suria na suruha iana. Mo Jesu nogana ki katogi i pasika na marâ, mu bâsigi ma kamu rongogi i na matena i ngekê.

³⁴Renia ngaia marena o Tavite ki pe akê i pasina God manga o Jesu. Ma ngaia ki vi hete, vi: ‘Na Araha God ki vi tanga na Araha iaku, ki vi: oga so igê na atohaku, hanana go araha heniê.

³⁵Menê be vatego na ramoha, ku marungira na merongamu.’

³⁶“Na Isiraelita hato ki tuguhira, ga girara maninga, vi God ki bani kasia o Jesu, ki Araha ma ki Mesaia, o Jesu nga igamu nogami mu rapusia igê na kuruse!”

³⁷Matena na enoni ka rongo vikana ngaira ka anumanuma bâraha, ma ka hagatera o Petero ma na aposotolo getera, ka vi: “Goaku, na ta kami katoa?”

³⁸O Petero ki vi tangara, ki vi: “Mu urisi parongami tenigi na tasi iami, na ara ni hitangimi. Ma kamu batesimo, ma kamu tongesuria o Jesu Kirisito, hanana God ki bonotenigi na tasi iami. Ma God ki page vategamu na votovoto iana, ngaia ka na Higona Apu.

³⁹Renia God ki bani surua na tarana ngekana tangagamu, ma tangara na karemi, ma tangara na enoni hato igê na agua hagatê, ma tangara na enoni hato, na Araha God iaka i unira tanga ngaia marena.”

⁴⁰O Petero ki tamasi vikana tangara, ma ki kanukanura igê rako na tamasinga nikâ. Ngaia ki vi: “Mu hagatahigamu maremi tenia na hagaitangiha, i page tarahura na enoni era igê!”

⁴¹Rako na hitangita ka tongesuria na ateateha iana, ma ka batesimo. Na rehagaro gi oru na enoni ka hagatonganira na enoni, ga tongesuri, igê na tangiana ngekana.

⁴²Ngaira ka aganarigi na hagesuringa iata na aposotolo. Ngaira ka obahaku henira na enoni, ga tongesuri, ma ka ngê apuna haku henira, ma ka nunginungi haku henira.

⁴³Na aposotolo ka katogi rako na mena ma na tagaraha raha, ma na ara ni enoni ka gasuga renigi.

⁴⁴Na enoni hato, ga tongesuri, ka ama ni obahaku nga henira na tamata, ma ka henahunisi renigi na nahuninga iata.

⁴⁵Ata ni vi ma: ngaira ka hagavuringenigi na nahuninga ma na ruruguha iata, ma ka hetongasige renigi na haga, ma ka tamanira re na ara ni hitangita.

⁴⁶Na ara ni tangiani ngaira ka ama ni aretaku nga tare i Ruma ni Rotu, ma ka ngêngê haku rârâ surigi na ruma iata. Ma na matena ga ngêngê, ngaira ka vagevage, ma ka haritagi.

⁴⁷Ngaira ka visia raha God, ma ka vagevage i obata, suria na enoni hato ka hekomaniheri. Ma i na ara ni tangiana na Araha o Jesu ki hagarakonira igê na enoni, ga tongesuri, renira na enoni, God i hagatahira.