Read Kahua TAGARAHA IATA NA APOSOTOLO 20 Bible Online

TAGARAHA IATA NA APOSOTOLO 20 - Kahua bible

TAGARAHA IATA NA APOSOTOLO 20

¹Matena i hato na perenga, o Paulo ki unira haku na enoni, ga tongesuri, ma ki kanukanura, ma ki arira. Ma hemuri ngaia ki râ tanga i Masetonia.

²Ngaia ki vatugigi na hinua i na apaneni i ngekana, ma ki kanukanura na enoni, ga tongesuri, renigi rako na taroha. Ma hemuri ki kahu ata i Agaia.

³Ngaia ki oga i ngekana surigi na hageha gi oru. Matena i nanê, vi arâ i Siria, ngaia ki rongoa, vi na Siu ka obania, vi ga nanahuia. Tahema ngaia ki kato, ma ki aporo ki ritare i Masetonia.

⁴O Sopatere karena o Piro ni Beroa ki râ henia; ma nikâ o Arisitako mo Sekunto, ngairerua ka na mane ni Tesalonika: mo Gaio ni Terebe, mo Timoti; mo Tigiko, mo Toropimo tenia na apanena i Asia.

⁵Ngaira ka nanago, ma ka oga karigami i Toroasi.

⁶I murina na Tangiana Raha, na Siu ka ngêa igê na bereti i pe ahunga, igami kami tage i Pilipi, ma i murini na tangiani gi rima igami kami tarahura i Toroasi, ma kami oga henira igê. Ma kami oga i ngekana suria na wiki gi tage.

⁷Igê na Sarere i manurahi igami kami haku me, hanana mi ngê apuna haku. O Paulo ki tamasi tangara na enoni, ga tongesuri. Ngaia ki tamasi rârâ, ma ki gupu ni bungi, suria i tangitangi me, ma ngaia ki arâ.

⁸Ga rako na laiti igê na kiboru i haha mi haku igê.

⁹Ta na mane haoru, o Utiko na atana, ki oga so igê na mabaha. Ma na matena i tamasi rârâ o Paulo, ma o Utiko ki mêru agâga rârâ, ma ki mêru bore, ma ki vota tenia na mababa igê na kiboru i haha. Ngaira ka ragea akê, ma ngaia ki bani me hunu.

¹⁰Mo Paulo ki so ki abahia, ma ki ruia. Ma ki vi: “Siana kamu tako bâraha! Ngaia ki mauri mênga!”

¹¹Ma hemuri ngaia ki tagere aporo igê na kiboru i haha, ki pia na bereti, ma ki ngê henira na enoni, ga tongesuri. Ngaia ki tamasi arihu era henira rârâ ki tangi, ma ki kahu râ.

¹²Ma na mane haoru, i tahi, ngaira ka me aporo i pasina, ma ki koro bâraha aporo na obata.

¹³Igami kami nanago tanga na haka, ma kami tage tanga i Aso, hanana vi gami torea o Paulo. Ngaia ki bani vi tangagami vikana, renia ngaia ki hatare i ngekana.

¹⁴Matena i tarahugami i Aso, igami kami torea, ma kami tage tanga i Mitilene.

¹⁵Igami kami tage i ngekana, ma igê na tangiana i muri kami ata i Kio. Ma i murina na tangiana gi tage igami kami ata i Samo, ma igê na tangiana i muri me igami kami ata i Mileto.

¹⁶O Paulo ki takusia, vi riri tenia i Epeso, renia ngaia ki pe obania, vi ge arâ kakaviaga i na apanena i Asia. Ngaia ki hagasusu, vi atata rêrê i Jerusaleme igê na Tangiana na Pentekosite, manga vi pe asa.

¹⁷Tenia i Mileto o Paulo ki hagatorangenia na tamasinga tanga i Epeso, i nungira na meraha igê na rotu i Epeso, hanana vi ga arâ me ka bâsia.

¹⁸Matena ga râ me, ngaia ki vi tangara, ki vi: “Igamu kamu girara, vi manga i he inê kê bani oga ma kê tagara i pasimi, haganega tenia na tangiana gê ata moramora i na apanena i Asia, mataro me kê panigamu.

¹⁹Inê kê pe hagarahasiê mareku rârâ, ma hagarako inê kê angiangi, matena gê katoa na tagaraha iaku, manga i marisiku, vi inê ki na kariana na Araha, renia ga tarahuê na mamasiaganiha, suria na Siu ka obania, vi ga nanahuiê.

²⁰Igamu kamu girara, vi inê kê bani hagarongogamu renigi na ara ni marâ, ga girara, ga tamanigamu, matena gê ateate tangagamu, ma kê hagesurigamu igê na agua ni hakuta ma i ruma iami.

²¹Inê kê tamasi ramoramo tangara na Siu ma tangara na enoni, ga pe Siu nikâ, kê vi, ‘Mu urusigi na parongami era, ma kamu aporo tanga God, ma kamu tongesuria na Araha iaka o Jesu.’

²²Ma i ngekê inê kê arâ i Jerusaleme, renia na Higona Apu ki bonasiê, ma kê pe girara, vi na ta kaniga page katoa tangê na enoni i ngekana.

²³Inê kê bani girara ma, vi na Higona Apu ki bani vi tangê tare, vi igê na ara ni hinua raha na enoni ka kasiê igê na ruma ni hagaitangiha, ma ka hagamamasiaga apeku.

²⁴Ma inê kê pe tako renia na mêriha iaku mareku. Manga gê mauri, i koro ma. Manga gê me, i koro ma nikâ. Inê kê obania ma, vi gê hagahatongia na tagaraha iaku, na Araha o Jesu i hagatorangeniê tanga, ma ki bonasiê renia. Na tagaraha ngekê ki na taroheniana na Taroha Koro renia na korohana God.

²⁵“Inê kê bani vatugigamu i pasimi, matena gê ateate renia na Arahanga iana God. Ma i ngekê inê kê girara, i asa ta na hitangimi, vi ge page bâsiê nikâ.

²⁶Tahema inê kê tohe tangagamu i ngekê akê: Manga vi ta na hitangimi, ma ki pe tahitahi, na tauhana marena! Mareha vi inê.

²⁷Renia inê kê bani hagarongogamu renigi na ara ni marâ, God i katogi.

²⁸Mu bâsigamu maremi, ma kamu bâbâsurira na enoni hato, renia na Higona Apu ki bani nakagamu tangara ngaira. Mu marupea na hakuta na enoni, ga tongesuria God, renia ngaira ki na anina renia na mera iana o Karena marena.

²⁹Renia gê girara, vi i muriku gê arâ, ka page arârâ i pasimi na mane, ga mangara na o vasiga, ga ramoramo, ma ka page uhungia, vi ga aerasia na hakuta na enoni, ga tongesuri.

³⁰Ma ki page arâ me na bevoana, matena tani na mane tenigamu so maremi ka page hagahagaparu, hanana vi ga katora na enoni, ga tongesuri, ka arâ surira.

³¹Hoi, mu bâbâ, ma kamu takusia tare, vi manga i he inê kê hatamia bâraha na mamasiaganiha, igê na tangiani ma na bungiani, matena gê hagesuria na ara ni hitangimi surigi na harisi gi oru.

³²“Hoita, i ngekê inê kê nungia God, ke anumasigamu, ma na taroha renia na korohana God ke tamanigamu. Ngaia ki girara i hagagatagatanigamu, ma ki girara i vategamu na marâ, i nakagi tangara na kariana hato.

³³Inê kê pe tenigi na siliva, se vi na golo, se vi na gahu iana ta na enoni.

³⁴Igamu maremi mu girara, renigi na rimaku igê inê kê tagara. Tahema na tamaku menê kami nahunigi na marâ, gami obanigi, vi gami mauri renigi.

³⁵Inê kê bani hagagiraragamu tare, hanana i tuguhigamu, vi gamu tagara raha manga inê, hanana mu tamanira na enoni, ga matareha ma kamu takusigi tare na tamasinga iana ngaia marena na Araha o Jesu, i vi, ‘Matena na enoni ki votovoto, ngaia ki page vagevage bâraha teharia na matena, i tavotavo.’”

³⁶Matena o Paulo ki tamasi hato, ngaia ki susure henira, ma ngaira hato ka nunginungi.

³⁷Ngaira hato ka angiangi, matena ga ruia o Paulo, ma ka siginia, ma ka aria.

³⁸Ki rugu ngavê na obata, renia ngaia ki vi, vi ngaira ki asa, vi ge page bâsia nikâ. Tahema ga râ henia tanga na haka.