Read Kahua TAGARAHA IATA NA APOSOTOLO 21 Bible Online

TAGARAHA IATA NA APOSOTOLO 21 - Kahua bible

TAGARAHA IATA NA APOSOTOLO 21

¹Igami kami arira ma kami râ. Mi tage kami oto tare, ma kami ata i Koso. Na tangiana i muri me igami kami ata i Rotesi, ma tenia i ngekana igami kami tage tanga i Patara.

²Ma igami kami tarahua na haka, i arâ tanga i Punisia. Ngekana igami kami tage igê ma kami râ.

³Mi rârâ, ma kami bâsia i mahamami na marê i Saipero, ma kami ritare tanga i Siria. Igami kami goto i Taire, na agua i kasikasi toraha igê na haka.

⁴I ngekana igami kami tarahura igê tani na enoni, ga tongesuri, ma kami oga henira suria na wiki gi tage. Igê na raramohana na Higona Apu ngaira ka visia tanga o Paulo, ka vi: “Siana ko arâ tanga i Jerusaleme.”

⁵I hato na ogaha iamami henira, ma igami kami râ, ma kami uruia na râha iamami. Ngaira hato, na mane ma na gete iata ma na kareta, ka pania na hinua, ma ka râ me surigami, ka kasigami. Igami hato kami susure so i ano, ma kami nunginungi.

⁶Ma hemuri igami kami arigami heri, ma kami tage igê na haka. Ma ngaira ka aporo i pasita.

⁷Igami kami uruia na râha iamami, mi tage tenia i Taire tanga i Potolomai. Ma i ngekana igami kami vatugira igê na enoni, ga tongesuri, ma kami oga henira suria na tangiana gi tage.

⁸Igê na tangiana i muri igami kami râ, ma kami ata i Sesarea. I ngekana kami banu i pasina o Pilipo. Ngaia ki na hitangita na mane gi pi, na enoni i Jerusaleme, ga tongesuri, ka bani atera tangagi tani na tagaraha.

⁹Ngaia ki bani aparara na kare hehene ge he, ga kare viru, ma ka ateate renia na tamasinga iana God.

¹⁰Matena igami kami bani oga i ngekana surigi na tangiani haritamani, o Agabo ki ata me tenia i Jutea. Ngaia ki na mane ni hinarunga.

¹¹Ngaia ki râ me i pasimami, ki tavoa na hogosina o Paulo, ki rakugi marena na êgana ma na rimana renia, ma ki vi: “Na Higona Apu ki vi vikê: Na Siu i Jerusaleme ka page rakua vikê na avanuna na hogotekâ ngekê, ma ka page tagarenia tangara na enoni, ga pe Siu.”

¹²Matena mi rongo vikana, igami ma na enoni i ngekana, igami kami ama ni hagakonea nga o Paulo, kami vi: “Siana ko arâ i Jerusaleme.”

¹³Ma ngaia ki aramigami, ki vi: “Na ta kani tanugamu, kamu angi vikana, mu hagarugu obaku bâraha? Inê kê nanê tanga ga rakuê i Jerusaleme, ma nikâ gê meme renia na Araha o Jesu.”

¹⁴I asa iamami, vi gami katoa, ke urusi parongana. Tahema igami kami naka ma vê, ma kami vi: “Na Araha ma ki girara.”

¹⁵I murina mi oga i ngekana, igami kami hagarurugu, ma kami uruia na râha iamami tanga i Jerusaleme.

¹⁶Tani na enoni i Sesarea, ga tongesuri, ka râ me henigami nikâ, ma ka megami râ i pasina o Manasoni, na mane mi tuguhia. I pasina kani i Saipero. Ngaia ki bani tongesuri me i nago vê.

¹⁷Matena igami kami ata i Jerusaleme, na enoni, ga tongesuri, ka vagevage, ma ka unigami banu i pasita.

¹⁸Igê na tangiana i muri o Paulo ki râ henigami, hanana vi bâsia o Jakobo, ma na ara ni meraha igê na rotu ka râ me nogata.

¹⁹O Paulo ki mêri renira, ma ki hagarongora renigi na ara ni marâ hato, God i bani katogi i pasita na enoni, ga pe Siu, renigi na tagaraha iana o Paulo.

²⁰Matena ga rongoa hato, ngaira hato ka visia raha God. Ma hemuri ka vi tanga o Paulo, ka vi: “Goamami igê na tagaraha, igo ko girara, ga rako na rehagaro na Siu, ga bani têa na tongesuriha, ma ka têgi gatagata na Ramata iana o Moise.

²¹Ngaira ka bani rongoa na tamasinga renigo, vi igo ko bani hagesurira na Siu hato, ga oga igê na agua iata na enoni, ga pe Siu, hanana viga nakagi vê na Ramata iana o Moise, ma ko bani vi tangara, vi siana ka retegi râ na gavoni na varata na kareta, ma siana ka arâ surigi na tauhata na Siu.

²²Ngaira ka page girara, vi igo ko bani ata me. Hoi, na ta ka katoa renia?

²³Go tanua na marâ, mi visia tangago! Eka ka goga na mane ge he, ga katoa na suruha tanga God.

²⁴Go hakunira, ma igamu, igo ma ngaira, kamu tanua na marâ, i visia na Ramata, mu tanua na vuripusiami tenigi na suruha tanga God. Ma igo ko vurigi na vogasiha tanga na vuripusiata. Ma hemuri ngaira ka kahu girara ga tapurugi na bêta. Igê na tarana ngekena na ara ni enoni ka page girara, vi na tamasinga renigo ka pe monari, ma igo maremu ko râ surigi na Ramata iana o Moise.

²⁵Ma ka hega na enoni, ga pe Siu ma ka tongesuri? Hoi, igia ka bani segea na leta tangara, ma ka bani hagarongora renigi na marâ, igia ga takusigi, vi ga tuguhira. Siana ka ngêngê na ngêra, ga bani susu tangara na ataro renigi, se vi ga ngêngê na gapu, se vi na ganiana, ga nguria, ma siana ka gamogamo, paronga iera, se vi na marâ vigana.”

²⁶Ma hemuri o Paulo ki hakunira na mane, ma na tangiana i muri me ngaia ma na mane ngegana ka tanua na vuripusiata renigi na suruha iata tanga God. Ma hemuri o Paulo ki banu i Ruma ni Rotu, ma ki visia mataha na matena, ga page hatohato igê na vuripusiata renigi na suruha tanga God, ma ka page tagarenia igê na vogasiha, i rupasia na ara ni hitangita.

²⁷Matena ga hato noga na tangiani gi pi, tani na Siu tenia na apanena i Asia ka bâsia o Paulo i Ruma ni Rotu. Ngaira ka hagatagetagera na enoni hato, ma ka ranguia o Paulo.

²⁸Ngaira ka ngerengere, ka vivi: “Isiraelita, tamanigami! Na mane ikê ki na mane, i hagesurira na enoni hato surigi na ara ni hinua hato, ma ki tamasi erasira na Ai ni Isiraele, ma na Ramata iana o Moise, ma na Ruma ni Rotu ikê. Ma i ngekê ngaia ki merabanu nikâ i Ruma ni Rotu tani na enoni, ga pe Siu, ma ki aerasia na agua, i apuna!”

²⁹(Ngaira ka tamasi vikana, suria ngaira ka bani bâsia o Toropimo na mane ni Epeso, i râhia na hinua raha henia o Paulo, ma ngaira ka takusia ma, vi o Paulo ki mebanu i Ruma ni Rotu.)

³⁰Ngaira ka hagatagetagera na enoni hato i hinua raha, ma na enoni hato i hinua raha ka tango ka haku me i na agua gi tage, ka ranguia o Paulo, ma ka okebaba henia hura tenia na Ruma ni Rotu. Ka parama na maa ni Ruma ni Rotu, ma ka purupuru.

³¹Na enoni, ga mangamangariaga, ka uhungia, vi ga nahuia o Paulo, matena na tamasinga ki râ tanga na mane, i araha tangara na mane ni me ni Roma, vi na enoni hato i Jerusaleme ka tanua na perenga.

³²Na mane, i araha tangara na mane ni me, ki bonasira ototo râ tani na mane ga bêngenira na mane ni me ma na mane ni hearihatana, ka râ henia, ma ki hatani tango vato tangara na enoni. Matena na enoni ka bâsia, i râ me henira na mane ni hearihatana, ngaira ka naka so o Paulo, mareha vi ge tahurua nikâ.

³³Na mane, i araha tangara na mane ni me, ki râ tanga o Paulo, ki têa, ma ki bonasira na mane ni hearihatana, ka rakua renirerua na seni gi rua. Ma hemuri ngaia ki surare, ki vi: “O ti ngekê? Ma na ta kani erasia?”

³⁴Tani na enoni ka ngere ka visia ta na marâ, ma tani na enoni ka ngere ka visia ta na marâ getea. Na mane, i araha tangara na mane ni me, ki bagatatako renigi na tamasinga iata, ka tora hegitigi, ma ki pe girara, vi na ta ki na hunana na perenga. Tahema ngaia ki bonasira na kariana, ma ka metagere o Paulo, ka mebanu igê na ruma nganganihaga iata.

³⁵Ngaira ka urua rârâ, ma ka tariha igê na tara akê tanga na ruma nganganihaga iata, ma tenia i ngekana na mane ni hearihatana ka tugia, suria na enoni ka mangariaga teha.

³⁶Ngaira hato ka tarogenia, ma ka ngerengere, ka vivi: “Ge nahuia!”

³⁷Matena na mane ni hearihatana ka mebanu noga o Paulo igê na ruma nganganihaga, ngaia ki tamasi tanga na mane, i araha tangara na mane ni me. Ngaia ki vi: “I koro ma, be visia ta na marâ tangago?” Na mane, i araha tangara na mane ni me, ki hagate, ki vi: “Igo ko girara vari na tamasinga ni Agaia, iê?

³⁸Hoi, i manga ngekana, igo ki mareha vi na mane ni Esipito, i haganega i nago na perenga, iê? Ngaia ki merarâ na rehagaro ge he na manero igê na bagamasusu raha.”

³⁹O Paulo ki arami, ki vi: “Inê na Siu, gê vora i Tareso ni Silisia. Inê na mane igê na hinua raha. Gu hagamarumungeniê be tamasi tangara na enoni.”

⁴⁰Na mane, i araha tangara na mane ni me, ki hagamarumungenia. Vikana o Paulo ki ura igê na tara akê tanga na ruma nganganihaga, ma ki bubuhira na enoni. Matena ngaira ka muni so, o Paulo ki tamasi tangara igê na tamasinga iata na Siu, ki vi: