Read Kahua TAGARAHA IATA NA APOSOTOLO 22 Bible Online

TAGARAHA IATA NA APOSOTOLO 22 - Kahua bible

TAGARAHA IATA NA APOSOTOLO 22

¹“Mane, vetagemane, ma meraha, mu rongoê, ve ramatenia na parongaku tangamu, gê pe aharê!”

²Matena ngaira ka rongoa, i tamasi tangara igê na tamasinga iata na Siu, ngaira ka manapu so. Mo Paulo ki tamasi, ki vi:

³“Inê na Siu, gê vora i Tareso ni Silisia, ma kê hagesuri ikê i Jerusaleme. O Gamaliele ki hagesuriê. Inê kê hagesuri maninga, hanana gê râ surigi na Ramata iata na êvarika, ma igê na mêrihaku hagenani inê kê tagara tanga God, manga igamu hato i ngekê akê.

⁴Inê kê tarogenira, ma kê hagamesira na enoni, ga râ suria na Tarana iana o Jesu. Inê kê rakura, na mane ma na gete nikâ, ma kê kasira igê na ruma ni hagaitangiha.

⁵Na mane ni vogasiha i teha ma na Kaunselo hagenani ka girarê, gê vi koro. Ngaira ka vateê na leta, ga bani segegi tangara na tamaka na Siu i Tamasiko. Tahema inê kê râ i ngekana, hanana gê taura igê na enoni, ga tongesuri vikana, kê rakura renigi na seni, ma kê torera me i Jerusaleme heniê, hanana na meraha ka hagaitangira.

⁶“Matena gê tavoraha tanga i Tamasiko, ma kê hagarangia noga na hinua ngekana, ki parama na marara mave ni vavearo, ma ki takiriê. Na ararina i ritova.

⁷Inê kê vota so i ano, ma kê rongoa na ringena na Araha, i tamasi tangê, ki vi, ‘Saulo! Saulo! Suria hega kanigo merongasiê?’

⁸Minê kê hagate, kê vi, ‘O ti kani igo Araha?’ Ma ngaia ki vi tangê, ki vi, ‘O Jesu ni Nasarete kani inê. Igo ko merongasiê.’

⁹Na mane, ga râ heniê, ka bâsia na marara, ma ka pe rongoa na ringena va ani, i tamasi tangê.

¹⁰Inê kê hagate, kê vi, ‘Na ta kani tuguhiê, vi gê tanua, Araha?’ Ma na Araha ki vi tangê, ki vi, ‘Gu aharaga, ma ko bêbanu igê na hinua i Tamasiko, ma i ngekana igo ko page giraragi igê na ara ni marâ, ga tuguhigo, vi go tanugi suria na katoha iana God.’

¹¹Inê ki guru na maaku renia na marara mave. Tahema na tamaku ka uruê, ma ka meêbanu i Tamasiko.

¹²“I ngekana i Tamasiko ki oga igê ta na mane, i rotu koro, o Anania na atana. Ngaia ki râ surigi na Ramata iaka, ma na Siu hato i Tamasiko ka hanetasia bâraha.

¹³Ngaia ki râ me, ki ura hagarangiê, ma ki vi, ‘Goaku, Saulo, ge marava aporo na maamu!’ Ki parama, ma ki marava aporo na maaku, ma kê bâsia.

¹⁴Ngaia ki vi, ‘Na God iata na êvarika ki bani atego, hanana vi go girara na katoha iana, ma hanana vi go bâsia na Kariana koro, ma ko rongoa, i tamasi tangago ngaia marena.

¹⁵Renia igo ko page tarohenigi tangara na enoni hato na marâ, go bani bâsigi, ma ko bani rongogi.

¹⁶Hoita, tanu hega go hagarihu? Gu aharaga, ma ko batesimo, ma God ki tananigi râ na tasi iamu, renia go tongesuria na Araha.’

¹⁷“Inê kê aporo tanga i Jerusaleme, ma na matena gê nunginungi i Ruma ni Rotu, inê kê marute,

¹⁸ma kê bâsia, vi na Araha ki vi tangê, ki vi, ‘Garigari, ma ko pania rêrê i Jerusaleme, suria na enoni ngegana ki asa, vi ge page tongesurigi na marâ, go taroheniê renigi.’

¹⁹Inê kê arami, kê vi, ‘Araha, ngaira nogata ka girara, vi inê kê râ tange na ruma ni sukuru, kê rakura ma kê tahurura na enoni, ga tongesurigo.

²⁰Ma na matena ga nahuia o Setepano, renia i tarohenigo, inê nogaku kê oga i ngekana nikâ, ma kê vi, i koro ma ga nahuia, ma kê bâsurigi na tuguni iata na enoni, ga ariha hunia.’

²¹Na Araha ki vi tangê, ki vi, ‘Gu râ, ma be hagatorangenigo hagatê tangara na enoni, ga pe Siu.’”

²²Na enoni ka rongoa rârâ, mataro me o Paulo ki tamasi vikana. Ma i ngekana ngaira ka haganega ka ngerengere raha, ka vivi: “Hagamagahurua! Nahuia! I pe araria, vi ge gâga!”

²³Ngaira ka ngerengere, ka tasigi na tuguni iata, ma ka raguragu na mako, ka arihate haha.

²⁴Na mane, i araha tangara na mane ni me, ki bonasira na kariana, ka mebanu o Paulo igê na ruma nganganihaga, ma ki vi tangara, ka ramusia, hanana i girara, vi tanu hega tani na Siu kani ngere ka tamasi pusia vikana.

²⁵Ma na matena ga bani baroa, hanana vi ga ramusia, o Paulo ki vi tanga na araha iata na mane ni me, i ura i ngekana, ki vi: “I hega? Na ramata ki hagamarumungenigo vari, vi go ramusia na mane, i manga na kare ni Roma, ma ki mamênga, vi ge hagatamasia renia ta na marâ, i pe koro?”

²⁶Matena na araha iata na mane ni me ki rogo vikana, ngaia ki râ i pasina na mane, i bêngenira na mane ni me, ma ki hagatea, ki vi: “Na ta kanigo katoa? Na mane ngekana ki manga na kare ni Roma!”

²⁷Ngekana na mane, i bêngenira na mane ni me, ki râ tanga o Paulo, ma ki hagatea, ki vi: “Visia me: igo ko manga vari na kare ni Roma?” O Paulo ki arami, ki vi: “Mako!”

²⁸Na mane, i bêngenira na mane ni me, ki vi: “Inê nogaku na kare ni Roma, ma kê kasia i nago na haga raha renia.” Mo Paulo ki arami, ki vi: “Ma inê nogaku na kare ni Roma, suria na enaku ngairerua ka na kare ni Roma nikâ.”

²⁹Na mane, vi ga hagatea o Paulo, ka naka vê ototo râ ma, ma na matena na mane, i bêngenira na mane ni me, ki tahetara renia, vi o Paulo ki manga na kare ni Roma, ngaia ki magu, renia i bani rakua renigi na seni.

³⁰Na mane, i bêngenira na mane ni me, ki obania vi girara bâkoro na tarana ta, na Siu ga tuguria renia o Paulo. Tahema igê na tangiana i muri ngaia ki rupasia o Paulo, ma ki bonasira na mane ni vogasiha ga teha ma na Kaunselo hagenani, ka hekarigi. Ma hemuri ngaia ki merâ o Paulo, ma ki vi tanga, ki ura i maata.