Read Kahua TAGARAHA IATA NA APOSOTOLO 23 Bible Online

TAGARAHA IATA NA APOSOTOLO 23 - Kahua bible

TAGARAHA IATA NA APOSOTOLO 23

¹O Paulo ki bâ rapurapu renira na mane na Kaunselo, ma ki vi: “Goaku! Inê kê girara bâkoro igê na aitangihaku, na mauriha iaku mataro me i ngekê ki koro i maana God.”

²O Anania, na mane ni vogasiha i teha ki bonasira na mane, ga ura hagarangia o Paulo, ka tahuru i harana.

³O Paulo ki vi tanga o Anania, ki vi: “God ki page tahurugo nogamu! Igo ko bâkoro i metara, ma na aitangihamu ki kakaga! Igo ko oga i ngekana ko suriê surigi na Ramata iana o Moise, ma ku bâ, igo ko aharê igê na Ramata, renia go bonasira, ka tahuruê!”

⁴Na mane, ga ura hagarangia o Paulo, ka vi tanga, ka vi: “Igo ko tamasi erasia na mane ni vogasiha iana God i teha!”

⁵O Paulo ki aramira, ki vi: “Goaku, inê kê pe girara, vi ngaia ki na mane ni vogasiha i teha. Suria na Buka Apuna ki vi, ‘Siana ko tamasi erasia na mane, i marungira na enoni.’”

⁶Matena o Paulo ki girara, vi tani na hitangita ngaira ki na Satuseo, ma tani ngaira ki na Pariseo, ngaia ki tamasi ramo tangara na mane igê na Kaunselo, ki vi: “Goaku, inê na Pariseo, ma na enaku ki na Pariseo nikâ. I ngekê inê kê oga igê na tamasinga, suria inê kê tongesuria ma kê naasia, vi God ki page hagamêrira aporo na enoni, ga bani me!”

⁷Pusina ma ngaia ki tamasi hato vikana, na Pariseo ma na Satuseo ka haganega ka hetuguri so mareta, ma ka hevoavoa so mareta.

⁸(Renia na Satuseo ka vi, vi na enoni, i meme, ki asa, vi ge mauri aporo, ma ka mareha na angelo, se vi na ataro. Ma na Pariseo ka tongesurigi na tarani gi oru ngegana.)

⁹Vikana ngaira hato ka ngerengere raha. Ma tani na mane ni hagesuringa na rotu ga pane henira na Pariseo, ka aharaga, ma ka tamasi ramo, ka vi: “Igami kami pe tarahua rârâ ta na marâ era i pasina na mane ikê! Ma ki monari vari, na angelo se na ataro ki tamasi tanga!”

¹⁰Na hearihatana ki raha teha ngavê. Vikana na mane, i bêngenira na mane ni me, ki magu, vi ga komokomoa o Paulo. Tahema ngaia ki bonasira na mane ni me iana, ka so i pasita, ma ka torea vê o Paulo tenira, ma ka mebanu igê na ruma nganganihaga.

¹¹Igê na bungiana ngekana na Araha ki ura hagarangia o Paulo, ma ki vi: “Gu ramo! Igo ko bani taroheniê ikê i Jerusaleme, ma ki ararigo, vigo taroheniê nikâ i Roma.”

¹²Igê na mavoraro i muri na Siu ka haku ma ka harikato. Ngaira ka suru tanga God, hanana vi ga pe ngêngê, se viga pe totono rârâ, mataro me ka nanahuia o Paulo.

¹³Ngaira hato, ga harikato renia na tarana ngekana, ka vora na tangahuru ge he ma ki asiba.

¹⁴Ma hemuri ka râ i pasita na mane ni vogasiha ga teha ma na meraha, ka vi: “Igami kami bani surua tanga God, hanana vi igami kami pe ngêngê rârâ, mataro me kami nanahuia o Paulo.

¹⁵Hoita, igamu ma na Kaunselo, mu kasikasi tamasinga tanga na mane, i bêngenira na mane ni me ni Roma, hanana i mevato me o Paulo tangagamu, ma kamu hagaparua, vi igamu kamu obania, vi ngaia ki ramatenia bâkoro marena tangagamu. Ma igami kami ahehi karia, ma kami nanahuia.”

¹⁶Ma o mona o Paulo ki rongoa na katoha iata. Ngekana ngaia ki râ ma ki banu igê na ruma nganganihaga iata na mane ni me, ma ki hagarongoa o Paulo.

¹⁷Ma hemuri o Paulo ki unia ta na mane i bêngenira na mane ni me, ma ki vi tanga, ki vi: “Gu merâ na mane haoru ikê tanga na mane, i araha tangara na mane ni me. Ngaia ki obania, vi hagarongoa renia ta na marâ.”

¹⁸Na mane i bêngenira na mane ni me ki torea, ma ki merâ i pasina na mane, i araha tangara na mane ni me, ma ki vi: “O Paulo, na mane i oga igê na ruma ni hagaitangiha, ki uniê, ma ki nungiê, kê merâ na mane haoru ikê tangago, renia ngaia ki obania, vi hagarongogo renia ta na marâ.”

¹⁹Na mane, i araha tangara na mane ni me, ki tê i rimana, ma ki merâ vê ngaia getea, ma ki hagatea, ki vi: “Na ta kanigo obania, vi go hagarongoê renia?”

²⁰Ngaia ki vi: “Na Siu ka harikato, vi ga nungigo, hanana vi i gomaha ko mevato o Paulo tangara na mane na Kaunselo, ma ka hagaparugo, vi na mane na Kaunselo ka obania, vi ngaia ki ramatenia bâkoro marena tangara.

²¹Ma siana ko tongesurira, suria na mane tangahuru ge he, ma ki asiba, kaniga page ahehi karia. Ngaira hato ka bani suru tanga God, vi ga pe ngêngê, se viga pe totono rârâ, mataro me ka nanahuia o Paulo. Ngaira ka nanê, vi ga nanahuia, ma ka naasia na aramiha tenigo.”

²²Na mane, i araha tangara na mane ni me, ki vi: “Siana ko hagarongoa ta na enoni renia na marâ, go hagarongoê renia.” Ma ngaia ki hagatorangenia vê na mane haoru, ki râ.

²³Ma hemuri na mane, i araha tangara na mane ni me, ki unirerua na mane gi rua garu bêngenira na mane ni me, ma ki vi: “Muru hagananêra na tangarê gi rua na mane ni me, hanana ga arâ i Sesarea, henira na tangahuru gi pi na mane, ga arâ igê na hosi, ma na tangarê gi rua na mane, ga tangaru renigi na ora, ma kamu nanê, mu arâ i rikini bungi.

²⁴Mu hagarêa tani na hosi tanga o Paulo, ki tagiria, ma kamu girara kamu meata maninga i pasina o Felise na gavumane.”

²⁵Ma hemuri na mane, i araha tangara na mane ni me, ki segea na leta, ki vi:

²⁶“Inê Kolotio Lisiasi kê sege tangago gavumane Felise. Inê kê obania, go mauri koro!

²⁷Na Siu ka ranguia na mane ngekê ma ka hagani nanahuia. Inê kê tarahua, ngaia ki manga na kare ni Roma. Tahema inê kê merarâ na me iaku, hanana gê hagatahia.

²⁸Inê kê obania, vi gê girara na marâ, ga tuguria renia. Tahema inê kê mevato tangara na mane na Kaunselo iata.

²⁹Inê kê tarahua, vi ngaia ki pe tanua rârâ ta na marâ era, hanana vi ge nanahuia, se vi ge kasia i ruma ni hagaitangiha renia. Ngaira ka tuguria renigi na marâ igê na tauhata mareta.

³⁰Ma na matena inê kê rongoa, vi na Siu ka harikato renia, vi ga nanahuia, inê kê vi, i arariê, ve hagatorangenia tangago. Inê kê bani hagarongora na enoni, ga tuguria, hanana vige arâ ke mehetuguri i pasimu.”

³¹Na mane ni me ka kato, manga i bonasira. Ngaira ka torea o Paulo, ma ka merâ i hinua i Antipateri igê na bungiana ngekana.

³²Ki tangi râ, ma na mane ni me, ga hatare i tara, ka aporo tanga na ruma nganganihaga, ma ka panira na mane ni me, ga tage igê na hosi ka merâ o Paulo.

³³Ngaira ka mebanu i Sesarea, ma ka vatea na gavumane na leta ma ka tagarenia o Paulo tanga.

³⁴Na gavumane ki tomania na leta, ma ki hagatea o Paulo, ki vi: “I pasimu kani i he?” Matena ngaia ki girara, vi o Paulo ki râ me tenia i Silisia,

³⁵ngaia ki vi: “Inê kê page rongogo, ma kê page surigo, matena ga atata me na enoni, ga tugurigo.” Ma hemuri ngaia ki bonasira na mane ni me, ka hahutugia o Paulo igê na ruma raha, o Herote i bani torea.