Read Kahua TAGARAHA IATA NA APOSOTOLO 3 Bible Online

TAGARAHA IATA NA APOSOTOLO 3 - Kahua bible

TAGARAHA IATA NA APOSOTOLO 3

¹Ta na tangiana o Petero mo Joane karu râ i Ruma ni Rotu. I pepe i oru na arito. Ngaia ki na matena tanga na hagarahenga.

²Hagarangia na maa ni Ruma ni Rotu, ga hêtana vi na “Maa ni Ruma Bâkoro”, ki tâ igê ta na mane, i tavi, i bani haganega me, matena i vora igê. I na ara ni tangiana na goana ka tugia râ, ki gâga i maa ni ruma, hanana vi nunginungi haga tenira na enoni, ga bêbanu ma ge huhura tenia na Ruma ni Rotu.

³Matena i bâsirerua o Petero mo Joane, garu banu, ngaia ki nungirerua, vi garu vatea ta na marâ.

⁴Ngairerua karu boretenia, mo Petero ki vi: “Bâsigamirua!”

⁵Ngekana ngaia ki bâsirerua, ma ki vi ma, vi garu page vatea ta na marâ.

⁶Mo Petero ki vi tanga, ki vi: “I marehasiê ngavê na haga, ma be vatego ma na marâ, gê nahunia. Igê na raramohana o Jesu Kirisito ni Nasarete inê kê bonasigo, gu aharaga ma ku ura rârâ!”

⁷Mo Petero ki here i rimana i otona, ma ki tamania ki aharaga. Ma karu parama na vekurugani ugana ma karu ramo aporo.

⁸Ngaia ki reke kê, ma ki ura gatagata, ma ki haganega ki ura rârâ. Ma hemuri ngaia ki banu i Ruma ni Rotu henirerua na aposotolo, ma ki rekereke rârâ, ki visia raha God.

⁹Na enoni hato ka bâsia ki rekereke rârâ, i visia raha God.

¹⁰Ma na matena ga bâgirara, vi ngaia ki na mane, i nunginungi haga tare i “Maa ni Ruma Bâkoro” na Ruma ni Rotu, ngaira ka kone bâraha, ma ka gasuga, renia na mane, i tavi, i arârâ.

¹¹Matena na mane ngekê ki tari surirerua o Petero mo Joane, na enoni hato ka kone, ma ka hetangohi ka râ i pasita igê na parema, ga hêtana vi na “Parema iana o Solomone.”

¹²Matena o Petero ki bâsira na enoni, ngaia ki tamasi tangara, ki vi: “Goaku na Isiraelita, surie hega kanimu konetenia na tarana ngekê? Surie hega kanimu boretenigami? Mu takusia vari, vi igami kami mi katoa na mane ikê, ki arârâ, renia vi na mena iamami maremami, se vi igami ki na enoni koro i maana God? Mareha!

¹³Na God iata o Abaramo mo Isako mo Jakobo, ngaia ki na God iata na êvarika, ngaia nga ki bani kasia akê o Jesu na kariana, ki araha. Igamu kamu tagarenia tangara na meraha, ma igamu kamu tuguria i maana o Pilato, henaka o Pilato ki obania, vi rupasia.

¹⁴Ngaia ki na mane i koro ma ki oto i maana God, megamu kamu tuguria, ma kamu nungia o Pilato, ki rupasia na manero.

¹⁵Ma i ngekana igamu kamu hagamesia na Hagamauri. Ma God ki hagamêria aporo tenira na enoni, ga me. Ma igami kami tarohenia na tarana ngekê.

¹⁶Na raramohana o Jesu ki katoa na mane, i tavi, ngekê, ki arârâ. Na tarana mu bâsia ma kamu girara, ki vora me, suria igami kami tongesuria o Jesu. Na tongesuriha nga ngekê kani katoa na mane ngekê, ki komaga. Mu bâsia.

¹⁷“Hoita, Goaku! Inê kê girara, vi igamu ma na meraha i pasimi kamu pe tako mataha bâkoro renia na tarana, mu katoa tanga o Jesu.

¹⁸I nago noga God ki bani tamasi i harata na poropete hato renia na Mesaia iana, vi page hatamia na mamasiaganiha. Ma ngaia ki hagamonaria na tamasinga iana igê na tarana ngekê.

¹⁹Mu urisi parongami tenigi na tasi iami, ma kamu aporo tanga God, hanana ngaia ki page tananigi râ na tasi iami,

²⁰ma hanana na Araha ki page naka na matena tangagamu, mu hagahârungigi igê na mêrihami, ma ki page hagatorangenia o Jesu na Mesaia, i bani atea tangagamu.

²¹Ki tuguhia, i gâga i pasina God, mataro na matena ga haoru aporo igê na marâ hato, suria God ki bani tamasi vikana i harata na poropete koro iana, ga oga i nago noga.

²²Renia o Moise ki vi, ‘God na Araha iami ki page hagatorangenia tangagamu ta na poropete, tagenana ma manga i hagatorangeniê inê. Na poropete ngekana ki page vora me tenia na hagosi ninuni iami. I tuguhigamu, vigamu taugi na tamasinga hato iana.

²³Ma na anima na enoni, ga pe taugi na tamasinga iana na poropete ngekana, ngaia ki page arâ panira na kariana God, ma ki page meme.’

²⁴Ma na poropete getera henia o Samuele ma na ani getera i hemuri, ngaira hato ka torea me na tamasinga iana God, ma ka tamasi nikâ renigi na tangiani i na matena ngekê.

²⁵Na poropete ka visigi na suruha iana God tangagamu, ma na suruheri iana God tangara na êvarimi ki tangagamu nikâ igamu. Renia God ki vi tanga o Abaramo, ki vi ‘Renira na raraha iamu inê kê page hagakorora na enoni hato i maveta.’

²⁶Tahema God ki atea o Jesu na Kariana, ma ki hagatorangenia tangagamu hagenago, hanana i hagaporosigamu tenigi na bagatauhami ma ki hagakorogamu.”