Read Kahua TAGARAHA IATA NA APOSOTOLO 5 Bible Online

TAGARAHA IATA NA APOSOTOLO 5 - Kahua bible

TAGARAHA IATA NA APOSOTOLO 5

¹Hoi, ta na mane o Anania na atana, ma na atana na gete iana ngaia kani ka Sapira. O Anania ki hagavuringenia ta agua na mako iaterua.

²Ma ngaia ki pinihigi tani na haga tanga marena, ma tani ki tagarenigi tangara na aposotolo. Ma kaniana ki bani girara.

³O Petero ki hagatea, ki vi: “Anania, tanu hega kanigo hagamarumungenia Satana ki angarigo, ma ki katogo, ko hagaparua na Higona Apu, renia go pinihigi tangago maremu tani na haga na mena na mako iamu?

⁴Matena i mamênga, vi gu hagavuringenia na mako, ngaia ki na mako iamu, me na murina go hagavuringenia hato, na haga ki na animu. Ma surie hega kanigo kato vikana? Igo ko pe hagaparura na enoni, ma ko hagaparua hete God!”

⁵Pusina ma i rongo vikana o Anania, ngaia ki me, ma ki apuri ki râ ki tâ. Ma ngaira hato na enoni, ga rongoa na tarana ngekê, ngaira ka magu bâraha.

⁶Na mane haoru, ga ura me, ka baraia na gahuana, ma ka torea ka bagia.

⁷I arihu me sisite i muri, ma na gete iana o Anania ki banu me, ma ngaia ki pe girara, vi o vaniana ki bani me.

⁸O Petero ki hagatea, ki vi: “Gu visia me, i hega na haga ngekana hagenani o vaniamu mego muru tavoa renia na mako?” Ma na gete ki vi: “Mako! Na haga hagenani ngekana.”

⁹Hoi o Petero ki vi tanga, ki vivi: “Tanu hega o vaniamu mego kanimuru uhungia, vi gamuru hagaparua na Higona Apu iana na Araha? Bâ, na mane, ga kahu bagia râ ma o vaniamu, kaniga banu me agê, ngaira ka page torego ka bagigo nogamu.”

¹⁰Ki parama nogana, ma ki me ki apuri ki râ ki tâ i maana o Petero. Na mane haoru ka banu me, ma ka bâsia, i me na gete. Ma ngekana ngaira ka torea, ma ka bagia henia o vaniana.

¹¹Na kare hato igê na rotu ma na enoni hato getera, ga rongoa na tarana ngekana, ka magu era vê.

¹²Na aposotolo ka katogi rako na mena ma na tagaraha raha i pasita na enoni. Na enoni hato, ga tongesuri, ka obahaku, ma ka haku me igê na Parema iana o Solomone.

¹³Ma na enoni getera ka magu, vi ge haku henira. Henaka i manga ngekana, ma na enoni i Jerusaleme ka visira, vi na enoni, ga tongesuri, ka koro.

¹⁴Ma ka tataka na enoni, ga tongesuri, ma ka hagatongania na hakuta na mane ma na gete, ga tongesuria na Araha.

¹⁵Renia na aposotolo ka katogi na mena, na enoni ka torera i metara na goata, ga maeha, ma ka hagatâhira igê na bea ma na bana, hanana vi na nununa o Petero ki mamarusira, matena i arâ me.

¹⁶Rako era na enoni, ga râ me tenigi na hinua hagarangia i Jerusaleme, ma ka torera me na goata, ga maeha, ma na ani, ga atataroga. Ma ngaira hato ka komaga aporo.

¹⁷Hoi, na mane ni vogasiha i teha ma na kariana hato, na Satuseo i Jerusaleme, ka hengarira ngavê na aposotolo. Tahema ga kato, ka urapusira.

¹⁸Ngaira ka rakura na aposotolo, ma ka kasira igê na ruma ni hagaitangiha tangara na enoni hato.

¹⁹Ma igê na bungiana ngekana na angelo iana na Araha ki tangahigi na maa ni ruma i ruma ni hagaitangiha, ma ki torera hura na aposotolo, ma ki vi tangara, ki vi:

²⁰“Mu banu i Ruma ni Rotu, ma kamu hagarongora na enoni hato i ngekana renia na tarana haoru ngekê, renia na monariha.”

²¹Na aposotolo ka tê viteana ma igê na mahogotana ngaira ka banu i Ruma ni Rotu, ma ka haganega ka hagesurira igê na enoni. Na mane ni vogasiha i teha ma na kariana ka unira me haku na meraha iata na Siu, hanana vi hekarigi na Kaunselo hagenani. Ma hemuri ngaira ka kasi tamasinga tangara na mane ni me, ga anumasia na ruma ni hagaitangiha, ka torera me na aposotolo tangara.

²²Ma na bevoana na mane tora tamasinga ka ata vê i ruma ni hagaitangiha, ngaira ka bâ mareha renira na aposotolo. Ngekana ngaira ka aporo tangara na mane igê na Kaunselo, ma ka hagarongora, ka vi:

²³“Matena mi râ vê, na ruma ni hagaitangiha ki purupuru bâkoro, ma na mane ni me, ga anumasia na ruma ni hagatangiha, ka ura tonganigi na maa ni ruma. Ma na matena mi tangahigi na maa ni ruma, igami kami bâ magahuru renira!”

²⁴Matena na maneraha iata na mane ni me, ga anumasia na Ruma ni Rotu, ma na mane ni vogasiha ga teha ka rongo vikana, ma ngaira ka vi: “Manga ngekê ka hega?”

²⁵Hoi, ma ki banu me ta na mane ki vi tangara, ki vi: “Mu rongo! Na mane, mu kasira igê na ruma ni hagaitangiha, ngaira ka gâga i Ruma ni Rotu i na matena ngekê, ma ka hagesurira igê na enoni!”

²⁶Vikana na mane i bêngenira na mane ni me, ga anumasia na Ruma ni Rotu, ma na kariana ka hura vê, ma ka torera aporo na aposotolo. Ma ngaira ka pe tê raharaha renira, suria ga magu, vi era ma na enoni ka takera renigi na hê.

²⁷Ngaira ka torera banu me na aposotolo, ma ka vi tangara, ka ura i maata na Kaunselo. Ma na mane ni vogasiha i teha ki hagatera, ki vi:

²⁸“Igami kami bani hagapêpugamu, vi siana kamu hagesurira na enoni igê na raramohana o Jesu. Ma kamu bâ, na ta kanimu katoa! Igamu kamu tokorenia na hagesuringa iami i Jerusaleme hagenani. Megamu kamu obania, vi gamu visia, vi igami kani mi hagamesia!”

²⁹O Petero ma na aposotolo getera ka arami bê aporo, ka vi: “Igami ki tuguhigami, vi gami têtê viteana God, mareha vi na enoni.

³⁰I murina mu nahuia o Jesu, ma kamu rapusia igê na kuruse, na God iata na êvarika ki hagamêria aporo tenira na enoni, ga me.

³²Igami kami tarohenigi na marâ ngegana, igami ma na Higona Apu. Na Higona Apu ngekê ki na votovoto iana God tangara na enoni, ga têtê viteana.”

³³Matena na Kaunselo ka rongo vikana, ngaira ka mangariaga bâraha, ma ka obania, vi ga nanahuira na aposotolo.

³⁴Ma ki ura aharaga ta na mane igê na Kaunselo. Ngaia ki na Pariseo, o Gamaliele na atana. Ngaia ki na mane ni hagesuringa ni Rotu. Na enoni hato ka visia, vi ngaia ki na mane koro era. Ngaia ki vi tangara na mane ni me, ga anumasia na Ruma ni Rotu, ka merahura na aposotolo.

³⁵Ma hemuri ngaia ki tamasi tangara na Kaunselo, ki vi: “Goaku, mane ni Isiraele, mu takotako maninga renia na marâ, mu page katoa tangara na mane ngegana.

³⁶I ta na harisi hato vê o Toita ki râ me, ma ki visia marena, vi na maneraha. Vari na tangarê gi he na mane ka vora re na kariana. Ngaia ki me igê na henahuita, ma na kariana hato ka totoko, ma ki hato na tagaraha iana.

³⁷Ma hemuri o Juta na mane i Galilea ki râ me igê na matena, ga tomatoma igê na atata na enoni. Na enoni rako nikâ ka vora re na kariana, ma ngaia ki me nikâ igê na henahuita, ma na kariana ka totoko.

³⁸Hoita, igê na tarana ngekê renia o Jesu, inê kê vi tangagamu, siana kamu hagapepera na mane ngegana. Nakara so mareta. Suria i manga na katoha ngekê ma na tagaraha iata, ma ka râ me tenia na enoni, ngaira ka page magahuru.

³⁹Ma ki manga, vi ga râ me tenia God, i asa hagetage, vi gamu girara mu hatungigi. Vari mu page tarahugamu maremi, vi igamu kamu urapusia God!” Na Kaunselo ki râ suria na tamasinga iana o Gamaliele.

⁴⁰Ngaira ka unira banu me aporo na aposotolo, ma ka bonasira na mane ni me, ga anumasia na Ruma ni Rotu, ka ramusira, ma ka hagapêpura na aposotolo, vi siana hagetage, vi ga tamasi nikâ tangara na enoni igê na raramohana o Jesu. Ma hemuri ngaira ka nakara vê ka râ.

⁴¹Na aposotolo ka panira na Kaunselo, ma ka vagevage bâraha, suria ga hatamia na mamasiaganiha renia o Jesu.

⁴²Ma igê na ara ni tangiani, igê na Ruma ni Rotu ma igê na ruma iata na enoni, ngaira ka ama ni hagesurira nga na enoni, ma ka ama ni ateate nga renia na Taroha Koro renia o Jesu na Mesaia.