Read Kahua TAGARAHA IATA NA APOSOTOLO 8 Bible Online

TAGARAHA IATA NA APOSOTOLO 8 - Kahua bible

TAGARAHA IATA NA APOSOTOLO 8

¹Ma ki koro na obana o Saulo, renia ga nahuia. Igê nga na tangiana ngekana na enoni i Jerusaleme, ga tongesuri, ka haganega ka hatamia na mamasiaganiha, suria na merongata ka hagamakukira bâraha. Na enoni hato, ga tongesuri, ka gava pania i Jerusaleme, ma ka totoko i Jutea me Samaria, nga noga ma na aposotolo kaniga pe gava.

²Ma tani na enoni, ga rotu koro, ka bagia o Setepano, ma ka angisia bâraha.

³Mo Saulo ki uhungia, vi aerasia hagetage na hakuta na enoni, ga tongesuri. Ngaia ki râ surigi na ara ni ruma, ma ki ragera hura na enoni, ga tongesuri, ma ki kasira igê na ruma ni hagaitangiha, na mane ma na gete.

⁴Na enoni, ga tongesuri ga totoko, ka râ surigi na hinua, ma ka ateate renia na Taroha Koro.

⁵O Pilipo ki râ i hinua raha i Samaria, ma ki ateate renia na Mesaia tangara na enoni i ngekana.

⁶Na enoni ka karinga bâkoro, matena o Pilipo i tamasi tangara. Ngaira hato ka rongoa ma ka bâsigi na mena, i katogi.

⁷Na ataro era ka ngerengere raha, matena ga huhura me tenira na enoni rako. Rako na enoni, ga meapeape ma ka tavi, ka komaga aporo nikâ.

⁸Ma na Ai ni Samaria ka vagevage bâraha.

⁹Igê na hinua ngekana ki oga igê na mane, o Simone na atana. Ngaia ki na mane ni haritavo ma ni mangata, i bani hagakonera me na Ai ni Samaria i nago râ ki râ me. Ngaia ki hagarahasia marena.

¹⁰Ma na enoni i hinua raha i ngekana, na enoni raha ma na enoni purua, ka karinga maninga, ma ka vi: “Na god, ga hêtana Ramoha Raha, ki maramara enoni i pasina o Simone.”

¹¹Ngaia ki bani hagakonera bâraha arihu me noga, renia i haritavo ma ki mangata. Tahema ngaira ka karinga maninga.

¹²Ma na matena ga tongesuria na ateateha iana o Pilipo renia na Taroha Koro renia na Arahanga iana God ma renia na raramohana o Jesu Kirisito, ngaira ka batesimo, na mane ma na gete nikâ.

¹³Ma ngaia marena nikâ o Simone ki tongesuri. Ma i murina na batesimo iana ngaia ki tari suria o Pilipo, ma ki kone bâraha, matena i bâsigi na tagaraha raha ma na mena, i katogi o Pilipo.

¹⁴Na aposotolo i Jerusaleme ka rongo, vi na Ai ni Samaria ka tongesuria na tamasinga iana God. Tahema ga hagatorangenirerua o Petero mo Joane tangara.

¹⁵Matena garu ata vê, ngairerua karu nunginungi tangara na enoni, ga tongesuri, hanana vi na Higona Apu ke angarira.

¹⁶Renia na Higona Apu ki mamênga, vi ge angaria ta na hitangita. Ngaira ka batesimo ma igê na raramohana na Araha o Jesu.

¹⁷Ma hemuri o Petero mo Joane karu têbuhira, ma na Higona Apu ki angarira.

¹⁸O Simone ki bâsia, God ki vatera na Higona Apu, matena na aposotolo karu têbuhira. Tahema ngaia ki obania, vi tagarenigi na haga tangarerua o Petero mo Joane.

¹⁹Ma ngaia ki vi: “Muru vateê nogaku na ramoha ngekana, hanana na Higona Apu ke angaria na ani mavê na enoni, gê page têtêbuhia.”

²⁰Mo Petero ki arami, ki vi: “Gu râ ku migime na haga iamu, suria go takusia, vi go girara go vuria na votovoto iana God renia na haga!

²¹Igo ki mareha vi na tamamamirua igê na tagaraha iamamirua, suria na aitangihamu ki pe koro i maana God.

²²Gu urusia na katoha era iamu, ma ko nungia na Araha, ki bonotenia na tasi iamu, suria go tako vikana.

²³Renia inê kê girarago, go hengari ngavê, ma na tasi ki bani rakugo.”

²⁴O Simone ki vi tangarerua o Petero mo Joane, ki vi: “I ararigamurua, muru nungia na Araha tangê, hanana i asa, vi ge page tarahuê ta na hitangini na marâ muru visigi.”

²⁵Matena o Petero mo Joane karu tarohenia hato o Jesu, ma karu ateate hato renia na taroha iana na Araha, ngairerua karu aporo i Jerusaleme. Igê na aporoha iaterua ngairerua karu ateate renia na Taroha Koro igê na hinua rako i Samaria.

²⁶Na angelo iana na Araha ki tamasi tanga o Pilipo, ki vi: “Gu nanê, ma ko soso suria na tara tenia i Jerusaleme tanga i Gasa.” (Na tara ngekana ka bani kasia i na matena i ngekê.)

²⁷Ngekana o Pilipo ki nanê, ma ki tavoraha. Hoita, ta na mane ni Etiopia ki aporo i pasina. Ngaia ki na vâ mavo. Na mane ngekê ki na enoni raha igê na gavumane. Ngaia ki bâbâsurigi na haga iana ka Kantase, na gete i marungia i Etiopia. Ngaia ki bani râ i Jerusaleme ki rahesia God, ma ki tage ki bêa aporo igê na kaati iana.

²⁸Matena i tage ki arâ i tara, ngaia ki tomania gogogo na buka iana o Isaia na poropete.

²⁹Na Higona Apu ki tamasi tanga o Pilipo, ki vi: “Gu râ tanga na kaati, ma ko arâ hagarangia na akerena!”

³⁰O Pilipo ki tango râ tanga na kaati, ma ki rongoa râ, i tomania na buka iana o Isaia na poropete. Ma ngaia ki hagatea, ki vi: “Go rongogirara vari na marâ, go tomania?”

³¹Na mane ki arami, ki vi: “Gê rongorongogirara bâ hega, suria i mareha ta na enoni, vi ge hagararia tangê?” Ma ngaia ki vi tanga o Pilipo, ki hane ki oga henia igê na kaati.

³²Na tomatomaha igê na Buka Apuna ngekê ki vi: “Ngaia ki manga na sipi, ga torea ka nahuia ki me. Ngaia ki manga na karena sipi, i pe angiangi, matena ga tapurua. Ngaia ki munimuni ma.

³³Ga kitenia, ka memarabe, ma ka kasi renia. Ma ki mareha ta na enoni, vi ge tamasi renira na karena, suria na mêriha iana i maveta ki hato.”

³⁴Na mane ki vi tanga o Pilipo, ki vi: “Gu visia me: na poropete ki tamasi vikana renia o ti? Renia ngaia marena, se renia ta na enoni getea?”

³⁵O Pilipo ki haganega ki tamasi. Ngaia ki hagararingenigi na tomatomaha ngegana i na Buka Apuna, ma hemuri ki kahu hagarongoa renia na Taroha Koro renia o Jesu.

³⁶Matena garu tage karu soso vê i tara, ngairerua karu tarahua na marave, ma na mane ki vi: “Na kere ve ikê. Na ta kani vi hagabarasiê tenia vi ve batesimo?” [

³⁷O Pilipo ki vi tanga, ki vi: “I ararigo, gu batesimo, manga vi go tongesuri igê na mêrihamu hagenani.” Ngaia ki arami, ki vi: “Inê kê tongesuri! Ma kê tongesuria o Jesu Kirisito, vi ngaia ki no Karena God.”]

³⁸Na enoni raha ki tamasi ma ki tâ so na kaati. Ma ngairerua o Pilipo ma na mane karu reke vato, ma karu so i ve, mo Pilipo ki hagabatesimoa igê.

³⁹Matena garu akê me tenia na ve, na Higona Apu iana na Araha ki torea vê o Pilipo. Na mane ki bâ marehasia nikâ, ma ki tavoraha vê nikâ ki râ, ma ki vagevage bâraha.

⁴⁰O Pilipo ki girara marena, vi oga i Asoto. Ma igê na râha iana tanga i Sesarea ngaia ki ateate renia na Taroha Koro surigi na ara ni hinua.