Read Kahua TAGARAHA IATA NA APOSOTOLO 9 Bible Online

TAGARAHA IATA NA APOSOTOLO 9 - Kahua bible

TAGARAHA IATA NA APOSOTOLO 9

¹O Saulo ki ama ni hagamakukira bâraha nga na kariana na Araha, ki vi nahuira ka me. Ngaia ki râ i pasina na mane ni vogasiha i teha,

²ma ki nungia na leta tenia, hanana vi hagamarumu tanga, ki arâ i pasita na hakuta na Siu i Tamasiko. Ma i ngekana ki girara, i rakura igê na enoni, na mane ma na gete, ga râ suria na Hagesuringa iana na Araha. Manga vi tarahura, ngaia ki rakura, ma ki torera aporo tanga i Jerusaleme.

³Igê na râha iana tanga i Tamasiko ngaia ki râ me hagarangia na hinua raha. Ki parama na marâ, i manga na marangea, ma ki takiria me.

⁴Ma ngaia ki vota so i ano, ma ki rongoa na ringena na Araha, ki tamasi tanga, ki vi: “Saulo! Surie hega kanigo merongasiê?”

⁵Ma ngaia ki vi: “O ti kani igo Araha?” Ma na Araha ki aramia, ki vi: “Jesu, kani inê. Igo ko merongasiê.

⁶Gu aharaga, ma ko bêbanu igê na hinua raha, ma i ngekana igo ko page girara igê na marâ, i tuguhigo, vi go tanua.”

⁷Ma na mane, ga râ henia, ka ura so, ma ka muni ma. Ngaira ka rongoa na ringena, ma ka pe bâsia ta na enoni.

⁸O Saulo ki aharaga akê, ki ehasi na maana, ma ki bara tanga, vi ge rigia ta na marâ, renia i guruha na maana. Tahema ngaira ka urua, ma ka mebanu i Tamasiko.

⁹Ngaia ki guruha na maana surigi na tangiani gi oru, ma i na matena ngekana ngaia ki pe tono ma ki pe ngê rârâ.

¹⁰I ngekana i Tamasiko ki oga igê ta na mane, i tongesuria o Kirisito, o Anania na atana. Ngaia ki marute, vi na Araha ki unia, ki vi: “Anania!” Ma ngaia ki aramia, ki vi: “Inê ikê, Araha.”

¹¹Na Araha ki vi tanga, ki vi: “Gu nanê, ma ko arâ tanga na Tara Oto, ma ko arâ i ruma iana o Juta, ma ko hagate renia o Saulo, na mane i Tareso. Ngaia ki nunginungi,

¹²ma ki marute, vi bâsia o Anania, i banu me ma ki têbuhia, hanana vi marava aporo na maana.”

¹³O Anania ki arami, ki vi: “Araha, na enoni rako ka bani hagarongoê renia na mane ngekana. Ngaia ki na mane, i merongasira bâraha na kariamu i Jerusaleme.

¹⁴Ma ngaia ki râ me ikê i Tamasiko, suria na mane ni vogasiha ga teha ka hagatorangenia, hanana vi rakura na enoni hato, ga tongesurigo.”

¹⁵Na Araha ki vi tanga, ki vi: “Gu râ, renia inê kê bani atea, ki tagara tangê, hanana i ateate reniê tangara na enoni hato, ga pe Siu, ma tangara na maneraha igê na gavumane, ma tangara na Isiraelita.

¹⁶Ma inê mareku be hagabâsia renigi na mamasiaganiha, i page hatamigi reniê inê.”

¹⁷Hoi, o Anania ki râ, ki banu i ruma ma ki têbuhia o Saulo, ma ki vi: “Goaku, Saulo! Na Araha ki hagatorangeniê. O Jesu ngaia marena. Go bani bâsia i tara, matena go râ me. Ngaia ki hagatorangeniê, hanana i marava aporo na maamu, ma ki angarigo na Higona Apu.”

¹⁸Ki parama na marâ, i manga na ênahina na siare, ma ki vota tenia na maana o Saulo, ma ki kahu marava aporo na maana. Ngaia ki aharaga, ma ki batesimo.

¹⁹Ma na matena i ngê hato, ngaia ki ramo aporo na apena. O Saulo ki oga na tangiani haritamani i Tamasiko henira na enoni, ga tongesuri.

²⁰Ngaia ki oto râ i ruma ni sukuru, ma ki haganega ki ateate renia o Jesu. Ngaia ki vi: “O Jesu ki no Karena God.”

²¹Na enoni hato, ga rongoa, ka kone, ma ka hehagateri, ka vi: “Ngaia ki na mane, i nahuira na enoni i Jerusaleme, ga tongesuria o Jesu, iê? Ma ngaia ki râ me ikê, hanana vi rakura na enoni, ga tongesuri, ma ki torera tangara na mane ni vogasiha ga teha i Jerusaleme, iê?”

²²Ma na ateateha iana o Saulo ki raramohaga teha. Ngaia ki hagatanga monari, renia vi o Jesu ki na Mesaia. Ma na Siu i Tamasiko ki asa, vi ge aramia bê aporo rârâ.

²³I murini na tangiani rako na Siu ka haku, ma ka kato, vi ga nanahuia o Saulo.

²⁴Ma ngaia ki bani rongoa na katoha iata. Igê na tangiani ma na bungiani ngaira na Siu ka bâbâ renia tare, vi ge huhura me igê na maa ni para na hinua, ma hanana vige nanahuia.

²⁵Ma ta na bungiana na kariana o Saulo ka merâ, ma ka kunia vato igê na mabaha na para, ka kunia so hura igê na erere.

²⁶O Saulo ki râ i Jerusaleme, ma ki uhungia, vi hakunira na enoni, ga tongesuri. Ma ki kere bara tangara, vi ge tongesuria, vi o Saulo ki tongesuria o Jesu, ma ngaira hato ka magutenia.

²⁷Mo Banebasi ki tamania o Saulo, ma ki merâ i pasita na aposotolo. Ngaia ki hagarongora renia, vi o Saulo ki bâsia na Araha i tara i Tamasiko, ma na Araha ki tamasi tanga. Ma ngaia ki hagarongora nikâ renia, vi o Saulo ki ramo, ki ama ni ateate nga i Tamasiko igê na raramohana o Jesu.

²⁸Ma i ngekana o Saulo ki oga henira, ma ki râhia i Jerusaleme hagenani, ma ki ramo, ki ama ni ateate nga igê na raramohana na Araha.

²⁹Nikâ ngaia ma na Siu, ga tamasi igê na tamasinga i Agaia, ka mehetamasi ma ka mehetuguri, ma ngaira ka kato, vi ga nanahuia.

³⁰Matena na enoni, ga tongesuri, ka girara na katoha ngekana, ngaira ka meso o Saulo i Sesarea, ma ka kasia vê ki râ i Tareso.

³¹Hoita, ma ngekana na enoni, ga tongesuri, i Jutea hagenani, me Galilea, me Samaria ka kahu oga bâkoro. Ngaira ka nganganihaga, ma ka ama ni tataka nga, renia na Higona Apu ki tamanira, suria ngaira ka hanetasia na Araha igê na ogaha iata.

³²O Petero i râhigi na ara ni hinua, ma i ta na tangiana ngaia ki râ, ki vatugira na kariana God, ga oga i hinua i Lita.

³³Ma i ngekana ngaia ki tarahua igê ta na mane, o Eneasi na atana. Ngaia ki meapeape, ma ki bani tâ me i ruma surigi na harisi ge varu.

³⁴O Petero ki vi tanga, ki vi: “Eneasi, o Jesu Kirisito ki hagakomagago. Gu aharaga, ma ku rumia na banamu.” Ki parama o Eneasi, ma ki aharaga.

³⁵Ngaira hato na enoni, ga oga i Lita ma igê na bena i Sarone, ka bâsia, ma ka tongesuria na Araha.

³⁶I Jopa ki oga igê tani na gete, ka Tabita na atana. Ngaia ki tongesuria na Araha. (Igê na tamasinga ni Agaia ka hêtana vi ka Torekasi, na girarana ki vi “Nanigoti”.) Ngaia ki komanira ma ki tamanira tare na enoni, ga matareha.

³⁷I na matena ngekana ngaia ki maeha ma ki me. Na gete na nâ ka manuhia na gahuana, ma ka hagatâhia igê na kiboru i haha.

³⁸I Jopa ki pe hagatê tenia i Lita. Ma na matena na enoni i Jopa, ga tongesuri, ka rongoa, vi o Petero ki oga i Lita, ngaira ka hagatorangenirerua na mane gi rua, karu torea na tamasinga ikê tanga o Petero, karu vi: “Gu râ me rêrê i pasimami.”

³⁹Ngekana o Petero ki nanê, ma ki arâ henirerua. Matena i ata vê, ngaira ka me akê igê na kiboru i haha. Na ara ni gete na nâ ka hakuria me. Ngaira ka angiangi, ma ka hagabâsia o Petero renigi na gahu ma na tuguni, i bani tagarahigi ka Torekasi, matena i mauri mênga.

⁴⁰O Petero ki vi tangara na enoni hato, ka hura tenia na kiboru. Ma ngaia ki susure, ma ki nunginungi. Hemuri ki ahoro râ tanga na gahua, ma ki vi: “Tabita, gu aharaga!” Ma ngaia ki ehasi na maana, ma na matena i bâsia o Petero, ngaia ki oga aharaga.

⁴¹O Petero ki tagare râ ma ki here i rimana, ki tamania, ki ura aharaga. Ma hemuri ki unira me na enoni, ga tongesuri, ma na gete na nâ, ma ki hagabâsira renia ka Tabita, i mêri aporo.

⁴²Na rongoha ngekê ki râhia i Jopa hagenani, ma ka rako na enoni ga tongesuria na Araha.

⁴³O Petero ki oga i Jopa surigi na tangiani rako. Ngaia ki oga i pasina o Simone, na mane i maningaigi na gavota na puruka.