Read Kahua ROMA 10 Bible Online

ROMA 10 - Kahua bible

ROMA 10

¹Goaku igê na tongesuriha, igê na aitangihaku hagenani inê kê tangasia bâraha, vi na Siu, na ahariaku mareku, ke tahi. Inê kê nungia nga God tangara.

²Renia inê kê girara, gê visia tangagamu, vi ngaira ka na enoni, ga obania bâraha, vi ga hagakoro obana God. Ma na morana na tarana, hanana vi ge hagakoro obana igê God, ngaira ka pe girara.

³Suria ngaira ka pe girara na tarana, God i râ suria, matena i katora na enoni, ka koro ma ka oto i maana. Ma ngaira ka uhungia mareta. Tahema ngaira ka pe râ suria na tarana, God i râ suria, matena i katora na enoni, ka koro ma ka oto i maana.

⁴Renia o Kirisito ki bani hatungigi na raramohana na Ramata iana o Moise. Tahema God ki katora na enoni, ga tongesuri, ka koro ma ka oto i maana.

⁵O Moise ki segea na marâ ngekê renira na enoni, God i katora, ka koro ma ka oto i maana, renia ga marupegi na Ramata i na Buka Apuna. Ngaia ki vi: “Manga na enoni, ma ki tanugi na marâ, na Ramata ga visigi igê na Buka Apuna, na Ramata ka hagamêria.”

⁶Ma na Buka Apuna ki visia na marâ ngekana renira na enoni, God i katora, ka koro ma ka oto i maana, renia ga tongesuria. I manga ikê: “Siana kamu hagategamu so maremi i obami, vi, o ti kani page akê i pasina God?” (I vi, vi hanana i meso me o Kirisito.)

⁷“Ma nikâ siana kamu vivi, o ti kani page so me i pasita na enoni, ga me?” (I vi, vi hanana i meakê o Kirisito tenira na enoni, ga me.)

⁸Na marâ, na Buka Apuna i visia, ki manga ikê: “Na taroha iana God ki hagarangigamu, ki gâga i harami ma igê na aitangihami.” Na taroha ngekê ngaia ki na taroha na tongesuriha, igia ga tarohenia.

⁹Manga mu tarohenia i harami, vi, “O Jesu ki na Araha,” ma kamu tongesuria, vi God ki hagamêria tenira na enoni, ga me, igamu kamu page tahi.

¹⁰Suria igia ka tongesuri igê na aitangihaka, God ki katogia, ka korokoro ma ka ototo i maana. Igaia ka tarohenia na tongesuriha iaka, tahema igia ka tahi.

¹¹Renia na Buka Apuna ki vi, “Na ani mavê na enoni i tongesuria, ki asa, vi ge raruni era renia.”

¹²Ngaia ki vi, vi na ani mavê na enoni, renia i tagenana ma tangara na Siu ma na enoni, ga pe Siu. Na Araha gi tage togo ma ki tangara na enoni hato, ma ki korokoro nga vê tangara na enoni hato, ga avarasia.

¹³Renia na Buka Apuna ki vi, “Na ara ni enoni, i avarasia na Araha, ki page tahi.”

¹⁴Manga vi ngaira, ma ka pe tongesuria, manga i he kaniga girara, vi ga avarasia? Ma ki manga vi ngaira, ma ka pe rongoa na taroha, manga i he kaniga girara, vi ga tongesuria? Ma ki manga vi ngaira, ma ka pe tarohenia na taroha tangara, manga i he kaniga girara, vi ga rongoa?

¹⁵Ma ki manga ga pe hagatorangenira na enoni tanga ge tarohenia, ki asa, vi ge oga na enoni tanga ge tarohenia. Renia na Buka Apuna ki vi, “I koro era, ka râ me na enoni, ga torea me na taroha koro!”

¹⁶Ma tani ma kaniga têa na Taroha Koro. O Isaia, na poropete, ki bani visia, ki vi: “Araha, ti kani tongesurigami, matena mi tarohenigo?”

¹⁷Hoita, na enoni ka tongesuria o Kirisito, suria ga rongoa na taroha, ma na taroha ki râ me tangara, suria ta na enoni ki tarohenia o Kirisito.

¹⁸Ma be hagate: I monari, vi ngaira ka pe rongoa na taroha? Mareha! Ngaira ka rongoa, suria na Buka Apuna ki vi: “Na enoni hato i maveta ka bani rongora ga tarohenia. Ma na tarohata ki bani tarahua na maveta hagenani.”

¹⁹Ma be hagate nikâ: I hega, na Isiraelita ka pe rongogirara vari? Mareha. Ngaira ka rongogirara. Suria o Moise ki hagenago ki aramia na hagatenga, urusia God, ki vi: “Inê kê page katora na kariaku, ka hengarira na enoni, ga pe Siu, ma kê page katora na kariaku, ka mangariaga tangara na enoni, ga tako purupuru.”

²⁰Mo Isaia ki tamasi urusia God, ma ki pe magu, vi ge tamasi, ke vi: “Na enoni, ga pe gariê, ka tarahuê. Inê kê hagabângeniê mareku tangara na enoni, ga pe hagate reniê.”

²¹Ma renira na Isiraelita God ki tamasi, ki vi: “Tare, ma i na ara ni tangiana inê kê karuhira na enoni, ga guguruga, ma ngaira ka hagau.”