Read Kahua ROMA 11 Bible Online

ROMA 11 - Kahua bible

ROMA 11

¹Hoi, be hagate: God ki kasi renira vari na kariana? Mareha ve! Inê mareku ki na Isiraelita. O Abaramo ki na êvariku. Menê ki na raraha tenia na varo iana o Benamino.

²God ki pe kasi renira na kariana, i bani atera i nago kere vê noga. Igamu kamu bani girara na sihonga renia o Elia igê na Buka Apuna. O Elia ki tamasi ramo tanga God, matena i ranganira na Isiraelita.

³Ngaia ki vi: “Araha, ngaira ka bani nahuira na poropete iamu ma ka bani hogegi na agua, ga vogasi tangago igê. Inê gi tageku ma kê hita râ, ma ngaira ka rapasia, vi ga nanahuiê nogaku.”

⁴God ki aramia bâ hega? God ki arami vikê, ki vi: “Inê kê bani nakara tangê mareku na rehagaro gi pi na mane, ga pe vogasia na ataro o Baala.”

⁵I ngekê ki tangenana ma: ga hita râ ta kereani na enoni, God i bani atera, renia ngaia ki koro ma ki mahata.

⁶God ki atera, suria ngaia ki mahata, ma ki mareha vi surigi na tagaraha iata. Renia manga vi God, ma ki atera na enoni surigi na tagara iata, ngaia ki pe mahata monari.

⁷Ma ki hega? Na Isiraelita ka pe tarahua vari na marâ, ga garia. Na kereani na enoni, God i bani atera, ngaira nga kani ga tarahua, ma na ani getera, God i unira, ka hagau.

⁸Renia na Buka Apuna ki vi, “God ki hagabonogi na aitangihata ka pe girara. Ma ki taha me i ngekê, ki asa iata, vi ge bâgirara, se vi ge rongohagagara.”

⁹Mo Tavite ki vi: “I araria, God ke suta karira ma ke tura, matena ga magoto. Ngaia ki araria, ge hagavotarira ma ke hagaitangira.

¹⁰I araria, God ke hagagurura, siana ke bâbâ. Ma ki ararira, ge tarahura na bagabevoani, ke hagamamasiagara tare.”

¹¹Hoi, be hagate: Matena na Siu ka tari purupuru, ngaira ka vota ngavê vari, ma ki asa iata vari, vi ge aharaga aporo? Mareha vê! Renia ngaira ka tasi, God ki hagatahira na enoni, ga pe Siu, hanana na Siu ka hengarira.

¹²Renia na Siu ka tasi, tahema ka rako na marâ koro, ga râ me tangara na enoni getera i maveta. Ma suria na Siu ka hagêrahu, tahema ka rako na marâ koro, ga râ me tangara na enoni, ga pe Siu. Hoi, ga page rakorako teha ngavê na marâ koro, matena na Siu hato ka hakunira!

¹³Hoita, be tamasi i ngekê tangagamu na enoni, mu pe Siu. Renia gê aposotolo tangara na enoni, ga pe Siu, inê kê age renia na tagaraha iaku.

¹⁴Inê kê girara vari, gê katora na kariaku na Siu ka hengarira na enoni, ga pe Siu, ma ki manga ngekana, vari inê kê girara, gê hagatahira na hitangita.

¹⁵Renia na matena God i usitenira igê na Siu, ngaia ki katora na enoni getera i maveta, ka vora re na kariana. Hoi, i page manga i he igê na matena, God i page torera aporo igê tanga ngaia marena? Ngaia ki manga vi na enoni, ga me, ka mauri aporo.

¹⁶Manga na enoni, ma ki tagarenia na apigana hagenago na bereti tanga God, i ngekana ngaia na guana hagenani na bereti ki vora re na anina God nikâ. Ma ki manga vi ngaia, ma ki tagarenigi na vagani na apinige tanga God, na arani ka vora re na anina God nikâ.

¹⁷Ga bani uvegi tani na arani na apinige na olive, ga bani hasia, ma ka ratoa renia na arana na apinige na olive ni bemu. Igamu na enoni, gamu pe Siu, kamu manga na apinige na olive ni bemu. Ma i ngekê igamu kamu mêri renia na mêriha iata na Siu, ma kamu nganganihaga renia.

¹⁸Tahema siana kamu kikitenira na enoni, ga mangara na arani na apinige, ga bani retegi. Manga i he kanimu girara vi gamu paroparo? Igamu kamu manga na arana na apinige. Igamu kamu pe hagamêrigi na vagana na apinige, ma na vagana ki hagamêrigamu.

¹⁹Ma igamu kamu vi vari, “I monari, igami ka na urusini na arani na apinige, ga bani uvegi.”

²⁰I monari! Ga bani retegi râ, suria ngaira ka pe tongesuri, ma igamu ki mareha, suria igamu kamu tongesuri. Ma siana kamu paroparo renia. Ma ki tuguhigamu hete, mu hinaru.

²¹God ki retera râ na Siu, ga mangara na arani mareni na apinige. Mu takusia, God ki pe retegamu vari?

²²Mu bâsia, God ki koro tangara tani ma ki raramohaga tangara tani. Ngaia ki raramohaga tangara na enoni, ga vota igê na tasi, ma ki korokoro tangagamu, manga vi igamu, ma kamu ama ni hagakoro obana nga. Ma ki manga i mareha, igamu ka page retegamu râ nogami.

²³Ma ki manga na Siu, ma ka tongesuri aporo, God ki page ratora aporo igê na atohata urusigamu, suria i pe bara tanga God, vi ge ratora aporo.

²⁴Igamu na enoni, mu pe Siu, kamu manga na arana na apinige na olive ni bemu, ga uvea râ ma ka ratoa renia na apinige, na olive, ga hasia, ma ka hagareha. Na Siu ka manga na apinige, ga hasia, ngekê. Ma ki mataku ngavê tanga God, vi ratogi na arani mareni na apinige, ga bani uvegi.

²⁵Goaku igê na tongesuriha, inê kê obania, vi gê hagagiraragamu renia na marâ, i pinihi tenigamu mênga. Manga mu girara na marâ ngekê, i asa iami, mu vi, vi igamu kamu girara teha. Manga ngekana: na guguruganiha iata na Isiraelita ki pe gâga tare, ma ki page gâga rârâ, mataro me ka arari na enoni, ga pe Siu, ga têtê viteana God.

²⁶God ki page hagatahira na Isiraelita hato igê na tarana ngekana. Renia na Buka Apuna ki vi: “Na Hagamauri ki page arâ me tenia i Sione. Ngaia ki page toregi vê na eraha hato tenira na raraha iana o Jakobo.

²⁷Inê kê page naka na suruheri ngekê henira, matena gê bonotenigi igê na tasi iata.”

²⁸Renia na Siu ka usitenia na Taroha Koro, ngaira ka vora na merongana God. Ma na tarana ngekana ki tamanigamu, na enoni mu pe Siu. Ma renia God ki bani atera, tahema ngaira ka vora re na kariana God renia na suruha iana God tangara na êvarita.

²⁹Renia God ki pe urisi parongana renira na enoni, i bani atera ma ki mahata tangara.

³⁰Hoi, ma igamu, i nago igamu kamu guguruga tanga God, ma i ngekê God ki takigamu, renia na Siu ka guguruga.

³¹I tagenana ma, renia God ki takigamu, na Siu ka guguruga tanga God i ngekê, hanana vi God nikâ ke takira i ngekê.

³²Renia God ki katoa na guguruganiha, ki marungira na enoni hato, hanana vi takira na enoni hato.

³³E, na mahatanga iana God ki raha teha ngavê! E, na takotako mataha iana ma na giraraha iana karu raha teha ngavê! I asa vê ta na enoni, vi ge girara, ge hagararingenia na katoha iana. I asa vê ta na enoni, vi ge girara, ge rongogiraragi na tauhana!

³⁴Renia na Buka Apuna ki vi: “O ti ki girara na parongana na Araha? O ti ki girara i hagaotoa?

³⁵O ti ki girara i vatea God ta na marâ, hanana vi God ke barua aporo tanga?”

³⁶God ki hagavorara na ara ni marâ hato, ma na ara ni marâ hato ngegana ka gâga renia ngaia ma tanga ngaia. Ka visia raha God tare ma tarema! Monari!