Read Kahua ROMA 12 Bible Online

ROMA 12 - Kahua bible

ROMA 12

¹Hoita, goaku igê na tongesuriha, renia God ki takuigia ngavê, inê be kanukanugamu vikê: mu tagarenigamu maremi manga na vogasiha tanga God, ma igê na mêrihami hagenani mu tagara koro tanga God, ma kamu hagakoro obana. Na morana na hagarahenga kani ikê: i tuguhigamu, vi gamu tanua.

²Siana ka arâ na bâhanami surigi na tauhata na enoni, ga pe tongesuri, ma kamu hagamarumungenia hete God, ki urisigi na aitangihami, hanana na parongami ka arâ getea hagetage tenia i nago. Manga ngekana, hanana mu page giraragi na obaniha iana God, ma na ta ki koro, ma na ta ki hagakoro obana God, ma na ta ki arari ngavê.

³Hoi, suria God ki mahata tangê, inê be vi tangagamu, igamu hato: Siana kamu hagarahasigamu maremi. Mu takotako maninga. Mu maresuria nga, ma kamu haritagi. Na ara ni hitangimi ki tuguhia, i suria so marena suria na tongesuriha, God i bani vatea renia.

⁴Na apena na enoni ki gi tage ma, ma ki nahunigi rako na agua, ga nahunigi na tagaraha, ga râ hegitigi.

⁵I tagenana ma tangagia igia. Henaka vi igia ka rako, ma igia ki na haku gi tage, ga obahaku henia o Kirisito, ma igia ka heratorato igê na haku gi tage mangagi na agua i na apena gi tage na enoni, ga heratorato.

⁶Igia hato ka nahunigi hegitigi na votovoto, ga tora hegitigi. I tuguhigia, ga hagatagarahigi na mahatanga iana God ngegê suria na tarana, God i obania. Manga vi igia, ma ka nahunia na votovoto, ga tarohenia na tamasinga iana God, ki tuguhigia, vi ga tarohenia suria na tongesuriha iaka.

⁷Manga vi igia, ma ka nahunia na votovoto ni hagesuringa, ki tuguhigia, ga hagesurira na ani getera.

⁸Manga vi igia, ma ka nahunia na votovoto, ga kanukanura na enoni getera, ki tuguhigia, ga kanukanura. Na enoni, i nahunia ta na marâ, ma ki metongani râ ta na enoni, ki tuguhia, i mahata. Na enoni, i araha, ki tuguhia, i tagara ramo. Na enoni, i korokoro tangara na ani getera, ki tuguhia, i vagevage renia.

⁹Siana kamu hagaparu, vi igamu kamu hetakuiheri. Mu kikitenia na eraha, ma kamu taua gatagata na koroha.

¹⁰Igamu kamu hetakuiheri bâraha mangara na hegoata, ga obahaku i Kirisito, ma kamu agana kamu hagabângenia, vi igamu kamu hehanetasige.

¹¹Mu tagara ramo. Siana kamu marababaga. Mu tagara tanga na Araha i mêrihami hagenani.

¹²Mu ama ni vagevagesia nga na nasiha iami. Mu piringiape, matena ga tarahugamu na bagabevoani. Ma kamu nunginungi tare.

¹³Mu meratongani na goami igê na tongesuriha na nahuninga iami, ma kamu unira banu i pasimi na enoni mahuara.

¹⁴Mu nungia God, hanana i korokoro tangara na enoni, ga hagamamasiagagamu. I monari, mu nungia God, ki korokoro tangara. Ma siana kamu nungia, ki aerasira.

¹⁵Matena na enoni ka vagevage, mu vagevage nogami henira. Matena i rugurugu na obata na enoni, i rugurugu nogami na obami henira.

¹⁶Mu obâbahaku. Siana kamu paroparo. Mu haritagi. Siana kamu hagarahasigamu maremi, vi igamu ka na enoni takotako.

¹⁷Manga ta na enoni, ma ki erasigamu, siana kamu barua aporo na eraha tanga. Ma kamu uhungia nga hete, kamu tanugi na marâ, na enoni ga takusigi, vi ga koro.

¹⁸Igamu maremi, mu ama ni uhungia nga, hanana mu komanira na enoni hato.

¹⁹Tamaku koro, siana hagetage, kamu usumia ta na enoni. Mu naka ma vê na siva tanga God, hanana i hagaitangia na enoni. Renia igê na Buka Apuna na Araha ki vi, “Inê be katoa na siva; inê be barua.”

²⁰Ma igamu siana, renia na Buka Apuna ki vi: “Manga na merongami, ma ki magê, mu hagangêa. Manga vi ngaia, ma ki mamata na riona, mu vatea ki totono. Igê na tarana ngekê igamu kamu katoa, ki takotako rugu ma ki maki.”

²¹Siana kamu hagamarumungenia na eraha, ki teharigamu. Ma ki tuguhigamu hete, mu teharia na eraha renia na koroha.