Read Kahua ROMA 15 Bible Online

ROMA 15 - Kahua bible

ROMA 15

¹Igia na enoni, ga gatagata igê na tongesuriha, ki tuguhigia, viga tamanira na enoni, ga pe gatagata igê na tongesuriha, hanana ngaira ka ama ni tongesuri nga. Siana ka hemasesi igê na marâ, ga tanugi.

²Ma ki tuguhigia, ga hagakoro obata hete na goaka ga tongesuri, ma ka tanua na marâ, i koro tangara, hanana ngaira ka nganganihaga nga igê na tongesuriha.

³Renia o Kirisito ki pe hemasesi. Renia na Buka Apuna ki vi, “Na enoni, ga guharigamu, ka guhariê nogaku.”

⁴Renia na ara ni marâ, ga bani segegi igê na Buka Apuna, ka bani segegi, ka hagesurigia, hanana igia ka raruni togo, suria na Buka Apuna ki katogia, ka togeaga, ma ki kanukanugia.

⁵Ma inê kê nungia God, ki katogia, ka togeaga, ma ki kanukanugia. Ma kê nungia God, ki vategamu, kamu obâbahaku, ma kamu arâ suria na parongana o Kirisito Jesu,

⁶hanana igamu hato haku kamu visia raha God, o Vaemana na Araha iaka o Jesu Kirisito.

⁷Hoita, mu hekomaniheri, tagenana manga o Kirisito ki komanigamu, hanana na enoni hato ka visia raha God.

⁸Renia inê kê vi tangagamu, vi o Kirisito ki komanira na Siu, hanana i hagabângenia, vi God ki hagamonarigi tare na suruha iana, i vi, vi o Kirisito ki hagamonarigi na suruha iana God tangara na êvarita.

⁹Ma o Kirisito ki râ me nikâ, ki tamanira na enoni, ga pe Siu, hanana ga visia raha God, suria ngaia ki takira. Suria na Buka Apuna ki vi, “Tahema inê be visigo koro i pasita na enoni, ga pe Siu. Inê be visigo raha igê na ki.”

¹⁰Ma ki vi nikâ, “Igamu na enoni, mu pe Siu, mu vagevage haku henira na kariana God.”

¹¹Ma ki vi nikâ, “Igamu hato na enoni, mu pe Siu, mu visia raha na Araha. Igamu hato na enoni, mu pe Siu, mu visia raha ngavê.”

¹²Mo Isaia ki vi nikâ, “Ta na raraha iana o Jese ki page vora me. Ngaia ki page arâ me, hanana i marungira na enoni, ga pe Siu. Ma ngaira ka page raruni togo renia.”

¹³God ki katogia, ka raruni togo. Inê kê nungia, ki hagakoro obami ngavê, ma ki katogamu, kamu marape ngavê, renia igamu kamu tongesuria, vi na Higona Apu kani katogamu, kamu ama ni raruni togo ngavê nga.

¹⁴Goaku igê na tongesuriha, inê kê girara bâkoro, vi igamu kamu hetakuiheri maninga, ma kamu girara maninga, vi na ta ki tuguhigamu, ma kamu girara mu hagaotogamu heri.

¹⁵Ma igê na leta ngekê inê kê tamasi ramo mataha, renia God ki bani ateê tanga na tagaraha koro ngekê:

¹⁶ngaia ki bani ateê, kê vora re na kariana o Kirisito Jesu, kê tamanira na enoni, ga pe Siu. Inê kê tagara manga na mane ni vogasiha matena gê ateate renia na Taroha Koro iana God, hanana na Higona Apu ki tagarenira na enoni, ga pe Siu, tanga God manga na vogasiha, i hagakoro obana.

¹⁷Inê kê obâbahaku henia o Kirisito Jesu, tahema inê kê girara gê ageage renia na tagaraha iaku tanga God.

¹⁸I asa be magu, ma inê kê tamasi ramo ma renigi na marâ, i bani tanugi o Kirisito: ngaia ki katoê, kê bêngenira na enoni, ga pe Siu, hanana vi ga têtê viteana God. Ngaira ka têtê viteana God renigi na tamasinga iaku ma na tagaraha iaku,

¹⁹ma renigi na marâ raha ma na mena, ma renia na Higona Apu i tagara ramo. Tahema inê kê bani tarohenia tare na Taroha Koro renia o Kirisito igê na ara ni hinua, haganega tenia i Jerusaleme tariha igê na apanena i Iliriko.

²⁰Na ani gi tage ma na marâ gê obania tare: kanigê obania, vigê tarohenia na Taroha Koro igê na agua, na enoni ka purunguni mênga igê renia o Kirisito, hanana gê pe uruia na tagaraha iana na enoni getea.

²¹Suria na Buka Apuna ki vi, “Na enoni, ga purunguni mênga renia, ngaira ka page bâsia ma ka page bâgirara. Ma na enoni, ga oga karinga raha mênga renia, ngaira ka page rongoa ma ka page tahetara renia.”

²²Tahema hagarako na tagaraha iaku ki bani hagabarasiê, vi ve vatugigamu.

²³Ma i ngekê inê kê bani hagahatungia na tagaraha iaku i na apaneni igê agê. Ma renia surigi na harisi rako inê kê bani obania, vi gê vatugigamu,

²⁴inê kê takusia, vi ve vatugigamu i na matena ngekê. Inê kê obania, vi ve vatugigamu igê na râha iaku tanga i Sipeni. Inê kê obania, vi ve oga i pasimi surigi tani na wiki, ma be vagevage henigamu. Ma hemuri be hagatoragamu, kamu tamaniê, hanana ve râ i Sipeni.

²⁵Ma i ngekê inê kê arâ noga i Jerusaleme, hanana gê tamanira igê na enoni, ga tongesuri.

²⁶Renia na haku na enoni, ga tongesuri, i Masetonia me Agaia ngaira mareta ka bani vi, vi ga hakuhaku haga, hanana vi ga tamanira na kariana God, ga oga i Jerusaleme ma ka matareha.

²⁷Ngaira mareta ka kato vikana. Ma ki monari nikâ, i tuguhira, hanana vi ga tamanira. Renia na Siu ka vatera na enoni, ga pe Siu, na marâ tenigi na marâ koro, God i bani vatera tangagi na atarota. Ma ki manga ngekê, ki tuguhira na enoni, ga pe Siu, vi ga tamanira na Siu renia na marâ, ga obania, vi ga mauri re.

²⁸Matena gê hatungia na tagaraha ngekana, gê tagarenigi tangara na ara ni haga, ga bani hakugi tangara, inê kê page arâ i Sipeni, ma igê na râhâ iaku i ngekana inê kê page vatugigamu igê.

²⁹Matena gê arâ i Sipeni, inê kê girara, gê page migirâ vê na ara ni korohana o Kirisito.

³⁰Goaku igê na tongesuriha, inê kê kanukanugamu, kamu ama ni nunginungi nga heniê, ma kamu nungia God tangê, suria igia ka tongesuria na Araha iaka o Jesu Kirisito, ma suria na Higona Apu ki katogia, ka hetakuiheri.

³¹Mu nunginungi tangê, hanana gê tahitahi tenira na enoni i Jutea ga pe tongesuri, ma hanana na kariana God i Jerusaleme ka vagevage renia na hetamaniha iaku tangara.

³²Ma hemuri ki korokoro ngavê na obaku, vi gê vatugigamu, manga vi God i obania, ma kê vagevage, matena gê gâga henigamu, ma kê mamaro i pasimi.

³³Inê kê nunginungi, hanana i gâga henigamu God, i vategia na monariha. Monari.