Read Kahua ROMA 16 Bible Online

ROMA 16 - Kahua bible

ROMA 16

¹Inê kê hagarongogamu renia ka Paebe. Ngaia ki na goaka igê na tongesuriha. Ngaia ki na gete koro. Ngaia ki tagara igê na rotu i Kenikerea.

²Mu unia banu i pasimi, manga i marisimi, vi igamu na kariana God, suria ngaia nogana ki na kariana na Araha, ma kamu tamania igê na ani mavê na marâ, i obanigamu, vi gamu tamania renigi, renia ngaia ki bani tamanira bâraha rako na enoni, ma ki bani tamaniê bâraha nikâ inê.

³Inê kê visia “Mauri Koro” tangarerua ka Pirisila mo Akuila. Ngairerua karu tagara heniê, ma karu tarohenia o Kirisito Jesu heniê.

⁴Ngairerua karu kasi manavaterua, hanana garu hagatahiê. Inê kê visirerua koro, ma ki mareha vi inê ma, ma ngaira nikâ hete na enoni hato, ga pe Siu ma ka tongesuri.

⁵Inê kê visia “Mauri Koro” nikâ tangara na enoni, ga tongesuri ma ka rotu haku i pasiterua. Inê kê visia “Mauri Koro” nikâ tanga o Epaineto, na tamaku koro. Ngaia ki tongesuria o Kirisito hagenago tarata na enoni getera, ga tongesuri i na apanena i Asia.

⁶Inê kê visia “Mauri Koro” tangarerua o Antoroniko ma ka Junia.

⁷Ngairerua ki na Siu manga inê, ma kami tage oga i ruma ni hagaitangiha. Na enoni hato ka girarerua, garu tagara koro mangara na aposotolo, ma karu tongesuria o Kirisito hagenago taraku.

⁸Inê kê visia “Mauri Koro” tanga o Ampilato. Ngaia ki na tamaku koro, ma kamuru tage obahaku igê na Araha.

⁹Inê kê visia “Mauri Koro” tanga o Urubano, i tagara henigami, kami tarohenia o Kirisito. Ma inê kê visia “Mauri Koro” nikâ tanga o Sitako, na tamaku koro.

¹⁰Inê kê visia “Mauri Koro” tanga o Apele. Na tongesuriha iana tanga o Kirisito ki nganganihaga ngavê i pasina. Inê kê visia “Mauri Koro” tangara na kariana o Arisitobolo.

¹¹Inê kê visia “Mauri Koro” tanga o Herotione. Ngaia ki na Siu manga inê. Ma inê kê visia “Mauri Koro” tangara na goaka igê na tongesuriha i pasita na kariana o Narisiso.

¹²Inê kê visia “Mauru Koro” tangarerua ka Turipaina ma ka Turipesa, garu tagara tanga na Araha. Ma kê visia “Mauru Koro” tanga ka Perisi, na tamaku koro, i tagara bâraha tanga na Araha.

¹³Inê kê visia “Mauru Koro” tanga o Rupo, i tagara koro ngavê tanga na Araha, ma inê kê visia “Mauru Koro” nikâ tanga kenana, i katoê, manga vi o karena.

¹⁴Inê kê visia “Mauru Koro” tangara o Asunikirito mo Pelegoni mo Patorobasi mo Hemasi, ma tangara na enoni hato getera i pasita, ga tongesuria o Kirisito.

¹⁵Inê kê visia “Mauru Koro” tangara o Pilologo ma ka Julia, mo Nereo ma ka goana, mo Olimpa, ma tangara nikâ na ara ni kariana God, ga oga henira.

¹⁶Gamu hesigini mangara na ahegoata igê na tongesuriha, ma kamu hetakuiheri. Na haku hato na enoni, ga tongesuria o Kirisito, ka visia “Mauru Koro” tangagamu.

¹⁷Goaku igê na tongesuriha, inê kê kanukanugamu, mu hinarura na enoni, ga katora na enoni, ka totoko na aitangihata, ma ka hagaerasia na tongesuriha iata. Na enoni, ga urapusia na hagesuringa, mu bani têa, siana kamu hakunira.

¹⁸Suria na enoni, ga katokato manga ngekana, ngaira ka pe râ suria na Araha iaka o Kirisito, ma ka râ suri barisuta ma hete. Renia ngaira ka tamasi bâkoro ma ka rekora na enoni, ngaira ka hagahagaparura na enoni, ga pe hinahinaru.

¹⁹Na enoni hato ka bani giraragamu, vi igamu kamu gatagata igê na taroha koro. Tahema inê kê vagevage renigamu. Inê kê obanigamu, vi gamu takotako maninga renigi na marâ, ga koro, ma kamu hinarugi na marâ, ga pe koro.

²⁰Ma God, i vategia na marapeha, ki sugia ma, vi ge pumenamenaria Satana i ruguhani na êgami. Inê kê nungia na Araha o Jesu Kirisito ki mahata tangagamu.

²¹O Timoti, na tamaku igê na tagaraha, ki visia “Mauru Koro” tangagamu. Mo Lusio mo Jasoni mo Sosipatere ka visia nogata “Mauru Koro” tangagamu. Ngaira ka na Siu manga inê.

²²Inê, Teresio, kê segegi so na tamasinga iana o Paulo igê na leta ngekê, ma kê visia nogaku “Mauru Koro” tangagamu.

²³O Erasito, i bâsurigi na haga na hinua, mo Kuato, na goaka igê na tongesuriha, ngairerua nogaterua karu visia “Mauru Koro” tangagamu.

²⁴[Inê kê nungia na Araha iaka o Jesu Kirisito, ki mahata tangagamu hato. I monari.]

²⁵Ka visia raha God. Ngaia ki girara, i hagagatagatanigamu igê na tongesuriha iami, i râ suria na Taroha Koro renia o Jesu Kirisito, gê ateate renia, ma ki râ suria na tamasinga mora, i bani pinihi me kere vê noga, ma i ngekê God ki bani hagagiraragia renia.

²⁶Ma i ngekê na segesegeha iata na poropete ka bani hagabângenia mave na tamasinga mora ngekê. Ma God, i mauri tare, ki ramata, ki vi, i tuguhira na enoni hato i maveta, vi ga girara na tamasinga mora ngekê, hanana ngaira hato ka tongesuria God ma ka têtê viteana.

²⁷Igê na raramohana o Jesu Kirisito ka visia raha tare ma tarema God, i tage togo, i takotako mataha teha nga vê igê na ara ni marâ hato. I monari.