Read Kahua ROMA 2 Bible Online

ROMA 2 - Kahua bible

ROMA 2

¹Igamu, na tamaku, mu surira vari na enoni getera? Naka ma o ti igamu, manga mu surira na enoni, i asa iami, vi gamu tora pusigamu maremi. Renia na matena mu surira na enoni getera, ma igamu nogami kamu tanugi na marâ, ga tanugi ngegana, igamu kamu surigamu mu hagaitangigamu so maremi.

²Igia ka girara, vi God ki oto na parongana, matena i surira na enoni, ga tanugi na marâ manga ngegana.

³Ma igamu maremi, tamaku, kamu katogi nogami na tarani nga ngegana, mu surira na enoni getera renigi. Mu takusia vari, vi na suriha iana God ki page tihigamu?

⁴Se mu pe takotako bâkoro vari renia na korohana raha God, i hatara ma ki piringiape. I monari, igamu kamu girara, vi God ki koro, renia ngaia ki uhungia, vi katogamu, kamu urisi parongami.

⁵Ma igamu kamu guguruga ma kamu togeaga. Tahema igamu kamu hagaraha tangagamu maremi na hagaitangiha igê na Tangiana, God ki page hagabângenigi igê na mangariaganiha renigi na tasi iata na enoni ma na suriha oto iana.

⁶Renia God ki page vatea na ara ni enoni na meni na tagaraha iana.

⁷Tani na enoni ka ama ni paronga koro nga, ma ka uhungia maninga, hanana vi God ki kasira akê, ma ki visira raha, ma ki vatera na mauriha, i asa, vi ge page hato. God ki page votoa na mêriha mora ma tarema tangara na enoni nga ngegana.

⁸Ma tani na enoni ka takusira mareta ma, ma ka usitenigi na marâ, ga tuguhira, vi ga tanugi, suria ga obania viga katogi ma na tarani ga era. Tangara na ani nga ngegana God ki page mangariaga bâraha, ma ki page hagaitangira ngavê.

⁹Na hagaitangiha ma na mamasiaganiha ka page tarahura na enoni hato, ga tanugi na tarani ga era, na Siu ma nikâ na enoni, ga pe Siu.

¹⁰Ma na enoni hato, ga tanugi na tarani ga koro, God ki page kasira akê, ma ki page visira raha, ma ki page votoa na marapeha iana tangara, na Siu ma nikâ na enoni, ga pe Siu.

¹¹Renia na suriha iana God ki tagenana ma tangara na enoni hato.

¹²Na enoni, ga pe Siu, ka pe nahunigi na Ramata iana o Moise. Ngaira ka tasi ma ka pe tahi, naka ma ngaira ka pe nahunigi na Ramata iana o Moise. Na Siu ka nahunigi na Ramata iana o Moise, ma ngaira ka tasi, ma na Ramata ngegana ka surira.

¹³Na enoni ka koro ma ka oto i maana God, mareha vi suria ga rongogi na Ramata iana o Moise, ma suria ga tanugi hete na marâ, na Ramata ga bonasira renigi.

¹⁴Na enoni, ga pe Siu, ka pe nahunigi na Ramata iana o Moise. Na ara ni matena na aitangihata ka bonasira, ka tanugi na marâ, ga râ surigi na Ramata iana o Moise, na aitangihata ka ramata tangara, henaka ngaira ka pe nahunigi na Ramata iana o Moise.

¹⁵Na poropete ka hagabângenia, vi na marâ, na Ramata iana o Moise ga visigi, ga oga igê na aitangihata. Na aitangihata ka hagabângenia nikâ, vi na tarana ngekana ki monari, renia i ta na matena na takotako iata ka vi, vi i pe koro na parongata, ma i ta na matena ka vi, vi i koro na parongata.

¹⁶Tahema, suria na Taroha Koro, gê ateate renia, ki page manga ngekana igê na Tangiana ngekana, matena God i katoa igê o Jesu Kirisito, ki surigi na ara ni takotako pinihi i obata na enoni.

¹⁷Ma tangagamu igamu, igamu kamu hega? Igamu kamu hêtami maremi vi na Siu. Igamu kamu ngahi renigi na Ramata iana o Moise, ma kamu tamasi paroparo, vi igamu nga ka na kariana God.

¹⁸Igamu kamu giraragi na marâ, God ki obanigamu, vi gamu tanugi, ma renia na Ramata iana o Moise ki bani hagesurigamu, kamu giraragi na marâ, ga oto.

¹⁹Igamu kamu hagêguri, vi igamu kamu baura na enoni, ga guru, ma kamu mavesira na enoni, ga oga roto.

²⁰Igamu kamu hagêguri, vi igamu kamu hagaotora na enoni, ga pe takotako bâkoro, ma kamu hagesurira na enoni haoru. Ma renia igamu kamu nahunigi na Ramata iana o Moise, igamu kamu hagêguri, vi igamu kamu giraragi hato na ara ni marâ ma na monariha hagenani.

²¹Igamu kamu hagesurira na enoni getera, ma ki hega, igamu kamu pe hagesurigamu so maremi? Igamu kamu ateate, kamu vi, “Siana ko hanago.” Ma igamu maremi kamu pe hanago vari?

²²Igamu kamu vi, “Siana ko gamogamo.” Ma igamu maremi kamu pe gamogamo vari? Igamu kamu tamasi pusira na nunuta na ataro, ma igamu maremi kamu pe hanago vari igê na ngêsu?

²³Igamu kamu hagêguri, vi igamu kamu nahunigi na Ramata iana God. Ma igamu maremi kamu pe katora vari na enoni, ke ruhia God, suria igamu kamu aharê igê na ramata iana?

²⁴Renia na Buka Apuna ki vi, “Renigamu igamu na Siu na enoni, ga pe Siu, ka tamasi erasia God.”

²⁵Ga bani retegi râ na gavoni na varami. Na tarana ngekana ki koro tangagamu, manga vi gamu arâ surigi na Ramata iana o Moise. Ma ki manga mu pe arâ surigi na Ramata ngegana, na tarana ngekê ki vora re na marâ purua ma.

²⁶Na enoni, ga pe Siu, ka pe retegi râ na gavoni na varata. Ma ki manga vi ngaira, ma ka arâ surigi na Ramata iana o Moise, ki hega, God ki pe katora vari mangara na enoni, ga bani retegi râ na gavoni na varata?

²⁷Na enoni, ga pe Siu, ka page surigamu ka hagaitangigamu igamu nga na Siu. Renia igamu kamu aharêngigi na Ramata iana o Moise, henaka vi igamu kamu nahunia na Buka ni Ramata ma ka bani retegi râ na gavoni na varami. Ma na enoni, ga pe Siu, ka arâ surigi na Ramata, henaka ma ga pe nahunigi na oreni, suria viga pe retegi râ na gavoni na varata.

²⁸Hoita, o ti ki na Siu monari? Ma na ta ki na girarana na reteha ngekana? Na mane ki pe vora re na Siu, suria vi ga bani retea râ na gavona na varana, se suria vi ngaia ki nahunia na orena.

²⁹Na Siu monari hete ki na mane, i Siu i mêrihana hagenani, i vi, vi ngaia ki tê viteana God. Na tarana ngekê ki na tagaraha iana na Higona Apu iana God, mareha vi na tagaraha igê na Ramata i na Buka Apuna. God ngaia getea ma ki kasia akê na mane ngekana mareha vi o ti nikâ.