Read Kahua 1 KORINTO 1 Bible Online

1 KORINTO 1 - Kahua bible

1 KORINTO 1

¹Inê ki no Paulo. God ki bani ateê ma ki bani kasiê, kê aposotolo iana o Kirisito Jesu. Inê mo Sositenesi, na goaka igê na tongesuriha, igamirua kamuru sege tangagamu.

²Igamirua kamuru sege tangagamu na haku na enoni mu tongesuria God, mu oga i hinua i Korinto, tangagamu hato, na ani God i bani ategamu, kamu vora re na kariana. Igamu ki na anina, suria mu obahaku henia o Kirisito Jesu, henira na enoni hato i na ara ni agua, ga rahesia na Araha iaka o Jesu Kirisito, na Araha iaka ma na anita nikâ.

³Igamirua kamuru nunginungi, hanana God Vaemaka ma na Araha o Jesu Kirisito karu korokoro tangamu, ma karu vategamu na marapeha.

⁴Inê kê visia koro na God iaku renigamu, suria ngaia ki bani vategamu na korohana renia o Kirisito Jesu.

⁵Suria mu obahaku henia o Kirisito, igamu kamu ruruguha ngavê igê na ara ni tarani, igê na ara ni tavatavaniha ma igê na giraraha.

⁶Na tarohana o Kirisito ki bani nganganihaga ngavê i pasimi.

⁷Tahema God ki bani vategamu na ara ni marâ koro hato, matena mu naasia na aporoha me iana na Araha iaka o Jesu Kirisito.

⁸Nikâ ngaia ki page tamanigamu, kamu ama ni nganganihaga nga tare, hanana vi igê na Tangiana Raha iana na Araha iaka o Jesu Kirisito igamu kamu page matarotaro igê.

⁹God ki bani ategamu, kamu harekonia o Karena. Ngaia ki no Jesu Kirisito, na Araha iaka. Mu hagêguritogo nga renia God.

¹⁰Goaku igê na tongesuriha, igê na raramohana na Araha iaka o Jesu Kirisito, inê kê nungigamu nga, hanana mu obâbahaku, igamu hato, igê na tamasinga iami, hanana siana kamu totora hetatari. Ma kamu obâbahaku ngavê hete igê na takoha gi tage ma na katoha gi tage.

¹¹Goaku igê na tongesuriha, suria tani na enoni igê na ahemata iana ka Koloe ka bani visia mataha tangê, vi igamu kamu hekorekore so maremi.

¹²Be naka vikê: na tamasinga iana na ara ni hitangimi ka râ hegitigi. Tani ki vivi, “Inê na kariana o Paulo”; tani ki vivi, “Inê na kariana o Apolo”; tani ki vivi, “Inê na kariana o Petero”; ma tani ki vivi, “Inê na kariana o Kirisito.”

¹³O Kirisito ka bani vuruvurusia vari? O Paulo vari ki me igê na kuruse, hanana i hagatahigamu? Mu takusia vari, vi igamu kamu batesimo igê na raramohanana o Paulo?

¹⁴Inê kê visia koro God, suria gê pe hagabatesimoa na hitangimi, nga noga ma o Kirisipo mo Kaio.

¹⁵Tahema i asa ta na enoni, vi ge vi, vi igamu kamu batesimo igê na raramohaku.

¹⁶Ua, i monari, inê kê hagabatesimora o Setepanasi ma na ahemata iana nikâ, ma inê kê pe takusia, vi inê kê hagabatesimoa ta na enoni râ nikâ.

¹⁷O Kirisito ki pe hagatorangeniê, hanana vi ve hagabatesimo. Ngaia ki hagatorangeniê, hanana vi gê tarohenia hete na Taroha Koro henigi na tamasinga, ga rongo mataha tangara na enoni. Manga inê, ma kê tamasi paroparo, inê kê hagabarasia, ki pe tagara na raramohana o Kirisito, i me igê na kuruse.

¹⁸Na enoni, ga pe tahi noga, ka takusia ma, vi na taroha renia o Kirisito, i me igê na kuruse, ki na tamasinga bekabekaga ma. Ma na taroha ngekana ki hagabângenia hete na raramohana God tangagia, igia na ani, ga tahitahi noga.

¹⁹Suria na Buka Apuna ki vi, “Inê be erasigi ngavê na takotako mataha iata na enoni, i mataha na obata. Ma be hagamagahurugi na giraraha iata na enoni, ga hagêsuri bâraha.”

²⁰Hoi, vikê i he nga na mane, i mataha na obata? I he nga na mane, ga hagesuri bâraha? Se i he nga na enoni ni tamasinga i maveta ikê? God ki bani hagabângenia, vi na tako mataha iata na enoni i maveta ki na tamasinga bekabekaga ma!

²¹God, i tako mataha ngavê, ki katora na enoni, ka pe girara, vi o ti kani ngaia renigi na takoha mataha iata mareta. God ki vi, vi hagatahira hete na enoni, ga tongesuria renia na taroha bekabekaga, igia ga ateate renia.

²²Na Siu ka obanigi na mena, ma na Ai ni Agaia ka obanigi na takoha mataha.

²³Ma tangagia igia, igia ka tarohenia o Kirisito, i me igê na kuruse. Na tarana ngekê ki hagabarasira na Siu, hanana vi ge tongesuria, ma ki vora vi na marâ bekabekaga ma i maata na enoni, ga pe Siu.

²⁴Ma tangara na enoni, God i bani atera, na Siu ma na ani, ga pe Siu nikâ, na taroha ngekê ki vi, vi o Kirisito. Ngaia ki na raramohana God, ma na takotako mataha iana God.

²⁵Suria na katoha iana God i bâ manga vi na katoha bekabekaga, ngaia ki na katoha mataha hete, i teharigi na katoha mataha iata na enoni. Ma na marâ, God i bâ manga vi mameaga igê, ngaia ki ramo teharigi hete na ramoha iata na enoni.

²⁶Goaku igê na tongesuriha, mu takusia, i na matena i nago God ki ategamu igê, igamu kamu hega? Suria na bâbâhata na enoni tani ma na hitangimi kaniga tako mataha, se ga nahuni ramoha, se ga enoni raha.

²⁷God ki kato ki atea na marâ, na enoni ga takusia, vi na marâ bekabekaga, hanana vi hagamakira na enoni, ga tako mataha; ma ki atea na marâ, na enoni ga takusia, vi mameaga, hanana i hagamakira na enoni, ga nahuni ramoha.

²⁸Ngaia ki atea na marâ, na enoni ga kikitenia ma ka ruhia, ma ka takusia, vi ngaia ki na marâ purua, hanana i katoa, ki voravora renia na marâ purua na marâ, na enoni ka takusia, vi na marâ raha.

²⁹Ngekê ki vi, vi i pe araria hagetage na enoni, vi ge paroparo i maana God.

³⁰Ma God ki katogamu, hanana mu obâbahaku henia o Kirisito Jesu, ma God ki katoa o Kirisito, ki vora re na takotako mataha iaka. Mo Kirisito ki katogia, ka koro ma ka oto i maana God, ka vora re na kariana, ma ka aharupa tenigi na eraha.

³¹Tahema na Buka Apuna ki vi, vi, “Na enoni, i obania vi ageage, ki tuguhia, i ageage renia na Araha.”