Read Kahua 1 KORINTO 12 Bible Online

1 KORINTO 12 - Kahua bible

1 KORINTO 12

¹Hoi, na tarana renigi na votovoto iana na Higona Apu. Goaku igê na tongesuriha, inê kê obanigamu, vi gamu giraragi.

²Mu bani girara, matena mu ahuroto mênga, ka marungigamu na ataro purua, ga hagatasigamu tare.

³I ararigamu mu girara maninga, vi i asa ta na enoni, vi ge tamasi erasia o Jesu, matena na Higona Apu iana God ki angaria, ma nikâ i asa ta na enoni, ge tarohenia, vi o Jesu ki Araha, manga vi na Higona Apu ma ki pe angaria.

⁴Na votovoto iana na Higona Apu ka hehegitigi, ma na Higona Apu, i votogi, ki gi tage togo ma.

⁵Na tarani, ga tagara tanga na Araha, ka hehegitigi, ma na Araha ki gi tage togo ma.

⁶Na giraraha igê na tagaraha ka hehegitigi, ma God, i votoa na giraraha igê na tagaraha hato tanga na ara ni enoni, ki gi tage togo ma.

⁷Igê na tarana God i katoa ngekana, na ara ni enoni ki hagabângenia igê, vi na Higona Apu ki angaria, hanana i tamanira na enoni hato.

⁸Na Higona Apu ki votoa na takoha mataha tanga ta na enoni, hanana i tamanira na enoni getera. Ma tanga ta na enoni na Higona Apu ngekê ki votoa tanga na giraraha, hanana i hagesurira na enoni getera.

⁹Nikâ na Higona Apu, i gi tage togo ngekê, ki votoa na tongesuriha ramo teha tanga ta na enoni hanana i hagagatagatanira na enoni getera renia. Ma tanga ta na enoni na Higona Apu ngekê ki votoa na ramoha tanga, hanana i hagakomagara na enoni.

¹⁰Na Higona Apu ki votoa na ramoha tanga ta na enoni, hanana i tanugi na mena. Ma tanga na ani getea ngaia ki votoa tanga na tarana i girara i tarohenia na tamasinga iana God. Ma nikâ tanga ta na enoni ngaia ki votoa na giraraha tanga, hanana i hagararingenigi hegitigi na votovoto, ga râ me tenia na Higona Apu, ma na ani ga mareha. Ngaia ki votoa na giraraha tanga ta na enoni hanana i tamasi renigi na tamasinga, ga râ getigi, ma tanga tani nikâ ngaia ki votoa na giraraha tanga, hanana i visigi mataha na girarani na tamasinga ngegana.

¹¹Na Higona Apu, i katogi na ara ni marâ hato ngegana, ki gi tage togo ma. Ngaia ki vatea na ara ni enoni na votovoto, ga râ hehegitigi, manga hanana i obania.

¹²O Kirisito ki manga na apena na enoni: ngaia ki gi tage togo ma i heratorato. Henaka vi i heratorato, ma na apena ki gi tage togo ma.

¹³I tagenana ma igia hato, na Siu ma na enoni, ga pe Siu, na kare vurivuri ma na enoni aharupa, igia hato ka bani batesimo, ma suria na Higona Apu ki gi tage togo, igia ka vora na haku gi tage togo manga na apena na enoni, ma na Higona Apu, i gi tage togo, ki angarigia hato, ka mauri.

¹⁴Na apena na enoni ki asa, vi ge pe heratorato. Na apena na enoni ki heratorato hete.

¹⁵Manga vi na êgana, ma ki vi, “Suria inê ki mareha vi na rimana, inê ki mareha vi tagua na apena.” Ma ki henaka ma i tamasi vikana, ma ngaia kini tagua hete na apena.

¹⁶Manga vi na karingana, ma ki vi, “Suria inê ki mareha vi na maana, inê ki mareha vi tagua na apena.” Ma ki henaka i vi vikana, ma ngaia kini tagua hete na apena.

¹⁷Manga vi na apena hagenani ki na maana ma, manga i he kani girara vi i rongorongo? Manga vi na apena hagenani ki na karingana ma, manga i he kani girara vi i sigini?

¹⁸I monari, God ki katoa na apena ki heratorato suria na tarana, ngaia i obania.

¹⁹Manga vige pe heratorato, vikê ki asa, vi ge vora na apena!

²⁰I monari, na apena ki heratorato, ma ngaia ki gi tage togo ma.

²¹Tahema na maana ki asa, vi ge vi tanga na rimana, ke vi, “Inê kê pe obanigo!” Ma nikâ na bêna ki asa, vi ge vi tanga na êgana, ke vi, “O, inê kê pe obanigo!”

²²Hoi, na apeka na agua, ga pe ramo, igia ka obanigi hete.

²³Ma na apeka na agua, igia ka takusigi, vi ngaigi ka na agua purua ma, igia ka marupegi hete. Ma na apeka na gua, igia ka maki surigi, igia ka pinihigi.

²⁴Ma na apeka na agua, ga bâkoro, igia ka pe pinihigi. God ki ratogi haku na agua igê na apeka, ma igê na tarana ngekana God ki katogi na apeka na agua, ga bâ purupuru, ka vora vi na marâ raha nikâ.

²⁵Tahema na apena na enoni ki asa, vi ge hevoavoa so marena, ma na agua hato igê na apeka ka hekomani heri maninga hete.

²⁶Manga ta na agua igê na apena, ma ki mamasiaga, na agua getera nikâ ka mamasiaga nogata. Manga ga visia raha tagua igê na apena, na agua hato getera ka ageage henia.

²⁷Hoi, igamu hato haku kamu manga na apena o Kirisito, ma na ara ni hitangimi kini tagua na apena.

²⁸Ngekana igê na haku na enoni, ga tongesuri, God ki vatera na enoni hato na tagaraha iata: hagenago na aposotolo, na ruata me na poropete, ma na oruta me na mane ni hagesuringa; ma hemuri me na enoni, ga katogi na mena; ma hemuri me nikâ na enoni, ga girara ga hagakomagara na enoni, ga maeha, se ga tamanira na enoni, se ga hagaotora, se ga tamasi igê na tamasinga getigi.

²⁹Ngaira hato ka pe aposotolo, se vige poropete, se vige mane ni hagesuringa. Ngaira hato ka pe girara, vige katogi na mena,

³⁰se vige hagakomagara na enoni, ga maeha, se vige tamasi igê na tamasinga getigi, se vige urusigi na girarani na tamasinga ngegana.

³¹Hoita, mu tangasigi na votovoto na ani ga teha. Hoi, be hagabâsigamu renia na tarana, na ani i teharigi.