Read Kahua 1 KORINTO 13 Bible Online

1 KORINTO 13 - Kahua bible

1 KORINTO 13

¹Ata ni vi ma: manga vi inê, ma be tamasi igê na tamasinga iata na enoni, se vi na tamasinga iata na angelo nikâ, ma na hetakuiha ki pe oga i pasiku, na ringeku, gê tamasi, ki vora re na marâ purua ma, manga na ringena na gogo, se na belo, i angiangi.

²Ata ni vi ma: manga vi God, ma ki ateê, kê poropete; manga vi inê, ma kê giraragi ma kê rongogiraragi na ara ni marâ, ga pinihi; manga vi inê, ma na tongesuriha iaku ki gatagata, ngaia ki girara i gurugi râ na hungani, manga vi na hetakuiha, ma ki pe gâga i pasiku, inê kê re vora na marâ purua ma.

³Ata ni vi ma: manga vi inê, ma kê votogi purua na ara ni marâ iaku, ma nikâ gê hagamarumungenira, ka sungia na apeku, ma na hetakuiha ki pe oga i pasiku, inê kê tagara purua ma.

⁴Manga vi na hetakuiha, ma ki gâga i pasimu, igo ko piringiape, ma ko haritagi. Manga vi na hetakuiha, ma ki gâga i pasimu, igo ki asa, vi gu hengari, se vi gu ura haha, se vi gu paroparo.

⁵Manga vi na hetakuiha, ma ki gâga i pasimu igo, ki asa, vi gu suraga, se vi gu hagatage, se vi gu bagamangamangariaga. Manga vi na hetakuiha, ma ki gâga i pasimu, igo ko bonotenira na enoni, ga erasigo.

⁶Manga vi na hetakuiha, ma ki gâga i pasimu, igo ki asa, vi gu vagevage renigi na eraha, ma ko vagevage renia ma hete na monariha.

⁷Manga vi na hetakuiha, ma ki gâga i pasimu, igo ki asa, vi gu rumakaka, ma ko ama ni tongesuri nga, ma ko ama ni hagêguritogo nga, ma ko ama ni piringiape nga hete.

⁸Na hetakuiha ki gâga tare, ma ki asa, vi ge page hato. Na tamasinga iata na poropete ka page hato. Na votovoto na ringeni na tamasinga, ga râ hehegitigi, ka page magahuru. Na giraraha ki page hato.

⁹Na giraraha iaka ma na tamasinga iata na poropete ka buhigi tani ma na marâ.

¹⁰Na matena i arâ me na marâ, na ani i koro teha, na ani, i koro sisite, ki page magahuru.

¹¹Matena gê sisite, inê kê tamasi manga na kare, inê kê hata manga na kare, ma kê takotako manga na kare. Ma i ngekê inê kê bani vora re na enoni raha, ma inê kê bani kasigi râ na tauhata na kare.

¹²Na marâ, igia ka bâsigi i ngekê, ka mangagi na nununi, ga bâsigi i ve, ma ka pe marava. Ma hemuri me igia ka kahu bâ togotogo renigi. Matena i ngekê na giraraha iaku ki sisite ma. Ma hemuri ngaia ki page teha ngavê, tagenana ma manga na giraraha iana God reniê.

¹³Ma i ngekê mênga, na ani gi oru igê ka gâga mênga: na tongesuriha, na naasiha, ma na hetakuiha. Ma na ani, i raha ngavê i berarogani ngaia ka na hetakuiha.