Read Kahua 1 KORINTO 15 Bible Online

1 KORINTO 15 - Kahua bible

1 KORINTO 15

¹Hoita, goaku igê na tongesuriha, i ngekê inê kê obania, gê hagatakusigamu renia na Taroha Koro, gê bani tarohenia tangagamu, ma igamu kamu bani têa. Na Taroha Koro ngekê ki na hunana na tongesuriha iami.

²Igamu kamu tahi renia na Taroha Koro, manga vigamu taua gatagata na Taroha Koro, gê bani ateate renia tangagamu, manga vi igamu ma kamu pe tongesuri purupuru ma.

³Inê kê hagatarêngenia tangagamu na tarana i raha teha, na enoni getera ga hagatarêngenia tangê. Ngaia ki manga ikê: o Kirisito ki me renigi na tasi iaka, tagenana manga na Buka Apuna i vi:

⁴Ga naka, ma ngaia ki mêri aporo igê na oruta na tangiana, ma ki manga na Buka Apuna i bani visia.

⁵Ngaia ki vora tanga o Petero, ma hemuri tangara na aposotolo hato tangahuru matarerua.

⁶Ma hemuri ngaia ki vora tangara na kariana tangarê gi rima ma ki asiba. Tani na hitangita ka mauri mênga, ma tani ka bani me.

⁷Ma hemuri ngaia ki vora tanga o Jakobo, ma hemuri tangara na aposotolo hato.

⁸Ma i hemuri tagana ngaia ki vora tangê nogaku, henaka vi inê kê manga na ataka vê ma na marâ, ga apara me.

⁹Inê ki na ataka mavê na enoni i berarogata na aposotolo hato. I pe arariê, vi ge visiê, vi na aposotolo, suria inê kê merongasira na haku na enoni, ga tongesuria God.

¹⁰Ma suria God ki takiê ma ki tamaniê, tahema inê kê manga ngekê. Ma na takuiha ma na hetamaniha iana ka pe tagara purua ma i pasiku. Inê kê bani tagara raha teharira hato na aposotolo getera. I monari, inê mareku kê pe tanugi, ma God ma, kani takuiê ma ki tamaniê.

¹¹Vikê, henaka vi râ me teniê inê, se vi tenira ngaira, igami hato kami tarohenia tagenamami na tarana ngekê, ma na taroha ngekê igamu kamu tongesuria.

¹²Hoi, manga na taroha iamami, ma ki vi, vi o Kirisito ki bani mêri aporo tenia na mera, tanu hega, tani na hitangimi kaniga vi, vi na enoni, ga me, ki asa iata, vi ge page mêri aporo?

¹³Manga vi na enoni, ga me, ma ki asa iata, vi ge page mêri aporo, o Kirisito ki asa vige mêri aporo nogana.

¹⁴Ma ki manga vi o Kirisito, ma ki pe mêri aporo tenia na mera, na ateateha iamami ki vora vi na marâ purua ma, ma na tongesuriha iami ki vora vi na marâ purua ma nogana.

¹⁵Ma ta na tarana nikâ: na tarana ngekê ki visigami, vi gami hagaparu renia God, suria igami kami bani visia, vi ngaia ki hagamêria aporo o Kirisito tenia na mera. Ma ki asa, vi ge hagamêria aporo, manga vi na enoni, ga me, ka pe mauri aporo.

¹⁶Suria manga vi na enoni, ga me, ma ka pe mauri aporo, o Kirisito ki asa vige bani mêri aporo nogana.

¹⁷Ma ki manga o Kirisito, ma ki pe bani mêri aporo, i ngekana na tongesuriha iami ki vora re na marâ purua ma, ma na tasi iami ka rakugamu mênga.

¹⁸Ma nikâ i vi, vi na enoni ga bani me, ga tongesuria o Kirisito, ka magahuru ngavê.

¹⁹Manga vi igia, ma ka naasigi na marâ koro tenia o Kirisito igê na mêriha iaka i ngekê ma, manga ngekana igia ka era ngavê teharira na enoni getera i maveta.

²⁰Ma ki monari, o Kirisito ki bani mêri aporo tenia na mera, hagenago tarata na enoni, ga me, ka page mauri aporo nogata.

²¹Na mera ki râ me i maveta tenia na mane. Ma ki tagenana ma na mêriha aporo ki râ me tenia na mane.

²²Na enoni hato ka page me, suria ga usuria o Atama, ma ki tagenana ma na enoni hato ka page mauri aporo, suria ga usuria o Kirisito.

²³Ma na ara ni hitangita ki nahunia na matena iana, i araria: o Kirisito ki hagenago tarata; ma i hemuri na kariana o Kirisito igê na râha aporo me iana.

²⁴Hemuri ki page râ me na hagahatungina. O Kirisito ki page teharira ma ki page hagamagahurura na marâ hato, ga araha ma ka ramata, ma ka nahuni ramoha, ma ki page hagatarêngenia na Arahanga tanga God Vaemana.

²⁵Suria o Kirisito ki araria, i araha mataro me na matena God ki teharira igê na merongana hato, ma ki purira so i ano.

²⁶Ma i hemuri tagana ngaia ki page teharia na merongana, ngaia ki na mera.

²⁷Suria na Buka Apuna ki vi, “God ki vatea, ki marungigi na ara ni marâ hato.” Na tamasinga i vi “na ara ni marâ hato”, ga rongo mataha, ga pe hagatarobêa God suria God ki atea o Kirisito, ki marungigi.

²⁸Ma na matena na ara ni marâ hato ka gâga i marungana o Kirisito, hemuri o Karena God ngaia marena ki naka marena i marungana God, i bani nakagi na ara ni marâ hato i marungana, ma God ki page marungira hagenani na marâ hato.

²⁹Hoita, i hega, manga vi na enoni, ma ka têa na batesimo tangara na enoni, ga me? Ngaira ka kato vikana tanga na ta? Ngaira ka vi, vi na enoni ga me ki asa, vi ge mêri aporo. Manga vi monari, tanu hega kaniga têa na batesimo tangara na enoni, ga me?

³⁰Ma ki hega igami? Suria i hega igami kami aganarigi tare na mamasiaganiha na mera?

³¹Goaku igê na tongesuriha, na mamasiaganiha na mera ki tarahuê tare i na ara ni mateni. Inê kê tamasi vikê, suria inê kê ageage renigamu, renia igia ka obahaku henia o Kirisito Jesu na Araha iaka.

³²Manga inê, ma be meheariha ta na marâ vasiga ikê i hinua i Epeso, suria vi gê takuiê mareku ma, na marâ koro ta, kani vigê page nahunia renia, manga vi na enoni, ga me, ma ka pe mauri aporo? Manga ngekana, igia ka arâ suria na tamasinga, i vi, “Nika, ge ngê ma ke tono, suria i gomaha igia ka page meme!”

³³Siana na enoni ka hagabekasigamu. “Na enoni era ka hagatasira na enoni koro.”

³⁴Mu urisi parongami, ma siana kamu tasitasi nikâ. Be vi hagamakigamu: tani na hitangimi ka pe girara God.

³⁵Ta na enoni ki hagate vari, ki vi, “Manga i he na enoni ga me kaniga girara viga mauri aporo? Na apeta ka page bâbâ manga i he?”

³⁶Igo ko hagate beka! Matena go hasia na marâ manga na pini, ki asa, vi ge baogo, manga vi ngaia ma ki pe meme.

³⁷Ma na marâ, go hasia, ngaia ki na maana ma, vari na maana na koni, se na marâ vigana, ma ki mareha vi gu hasia na ani, i bani baogo ma ki bani akê.

³⁸God ki katoa na maana, go hasia, ki baogo ma ki voravora na apena, i obania. Ngaia ki katogi na maani na ara ni marâ hegitigi, ka baogo ma ka voravora na apeni, ga ararigi hegitigi.

³⁹Tahema na hasigota na marâ, ga mauri, ka pe râ haku. Ngaira hato ka tora hegitigi: na hasigota na enoni, ma na hasigota na marâ i bemu, ma na hasigota na manu, ma na hasigota na siare.

⁴⁰Ga oga na marâ i vavearo, ma ka oga na marâ i maveta. Na bâkorohata na marâ i vavearo ma na bâkorohata na marâ i maveta ka bâ hegitigi.

⁴¹Na bâkorohana na arito, ma na bâkorohana na hageha, ma na bâkorohata na higu ka bâ hegitigi; ma nikâ na bâkorohata mareta so na higu ka bâ hegitigi.

⁴²Matena na enoni, ga me, ka mauri aporo, ki page manga ngekana nikâ. Na marâ, i girara i meme, ka naka, ma na marâ, i mauri aporo, ki asa, vi ge page me.

⁴³Matena ga naka, ngaia ki bâbâ mamêkuga ma ki pe ramoramo. Matena i mauri aporo, ngaia ki na apena i bâkoro ma ki ramoramo.

⁴⁴Matena ga naka, ngaia ki na apena, i girara i meme. Matena i mauri aporo, ngaia ki na apena i mauri tare, suria i gâga na apena, i girara i meme, tahema i gâga nikâ na apena, i asa, vi ge page meme.

⁴⁵Renia na Buka Apuna ki vi: “God ki hagavora hagenago na mane o Atama. Ngaia ki na marâ mamauri.” Mo Atama, i hagemuri, ngaia ki na Higona, i hagamauri.

⁴⁶Na apena, i asa, vi ge page me, ki arâ me hagemuri; ma ki hagenago na apena, i girara i meme, ma hemuri na apena, i asa, vi ge page me.

⁴⁷O Atama, i hagenago, ki vora me tenia na mako; na ruata o Atama ki râ me tenia God.

⁴⁸Na ani i maveta ka usuria na ani, i vora me tenia na mako; ma na ani i pasina God ka usuria na ani, i râ me tenia God.

⁴⁹Matena igia ka gâga i maveta ikê, igia ka na nununa na mane, i vora me tenia na mako; ma ki tagenana ma, i muri me, igia ki na nununa na Mane, i râ me tenia God.

⁵⁰Gaku igê na tongesuriha, na takotako iaku ki manga ikê: na enoni, i tonga na hasigona ma na gapuna, ki asa, vi ge oga igê na Arahanga iana God. Ma na marâ, i girara i meme, ki asa, vi ge page mauri tare.

⁵¹Mu rongo! Be visia tangagamu ta na marâ, i pinihi tenira na enoni, ga pe tongesuri: i asa, vi igia hato ke me, ma igia hato ka page paraparama, ma ka riariaga;

⁵²i rêrê, manga na matena go piringi maa, matena na ahuri ki angi ma ki arâ su. Suria na matena i angiangi igê na ahuri, na enoni, ga me, ka page mauri aporo, ma ki asa, vi ge page me nikâ, ma igia hato ka page riariaga.

⁵³Suria na marâ, i girara i meme, ki tuguhia, i voravora renia na marâ, i asa, vi ge page me. Ma na marâ, i girara i magahuru, ki tuguhia, i voravora renia na marâ, i asa, vi ge page magahuru.

⁵⁴Matena na marâ, i girara i meme, ki bani voravora renia na marâ, i asa, vi ge page me, ma matena na marâ, i girara i magahuru, ki bani voravora renia na marâ, i asa, vi ge page magahuru, na tarana ngekana ki page hagamonaria na tamasinga igê na Buka Apuna, i vi: “Na mera ki hato! Igia ka teharia!

⁵⁵E, Mera, igo ko teha vari, iê? E, Mera, i he na tangaruha iamu?”

⁵⁶Na tangaruha iana na mera ki na tasi, ma na raramohana na tasi ki râ me tenia na Ramata.

⁵⁷Ga visia koro God, i katogia, ka teha igê na raramohana na Araha iaka o Jesu Kirisito!

⁵⁸Tahema goaku hetakui igê na tongesuriha, mu ramoramo, ma kamu rêra gatagata. Mu arumasigi tare na tagaraha iami tanga na Araha, suria mu bani girara, vi manga mu tagara tanga na Araha, igamu ki asa, vi gamu tagara purua ma.