Read Kahua 1 KORINTO 16 Bible Online

1 KORINTO 16 - Kahua bible

1 KORINTO 16

¹Hoi, i ngekê be tamasi sisite renia na hakuha ni haga, hanana ga tamanira renigi na kariana God i Jutea. I tuguhigamu, mu katoa na tarana, gê bani bonasira renia na haku na enoni, ga tongesuri, ga goga i Galasia.

²Na ara ni Sate na ara ni hitangimi ki tuguhia, i bani nakanaka kasigi tani na haga, ga araria na haga, i nahunia, hanana mu pe hakuhaku haga, matena gê page vatugigamu igê.

³Matena gê vatugigamu, inê kê page hagatorara na mane, mu hagêguritogo renira, hanana ga torea na mahatanga ni haga iami tanga i Jerusaleme. Ma inê kê page vatera na leta, ga hagagirarara renira.

⁴Manga i arariê, vi gê arâ nogaku, hanana mi tage arâ.

⁵Inê be vatugigamu, matena gê vatugia hato i Masetonia, suria inê kê page vatugia i Masetonia.

⁶Inê be oga henigamu arihu sisite vari, vari igê ki na matena hagenani na gari, ma hemuri igamu kamu girara mu kahu tamaniê, hanana gê uria na râha iaku. Ma i ngekê inê kê pe girara mênga, vi i he kanigê page arâ nikâ igê.

⁷Suria inê kê pe obania, ve riritare tenigamu. Inê kê obania, ve oga arihu henigamu, manga vi na Araha ma ki hagamarumungeniê.

⁸Ma inê kê kato, vi gê gâga ikê i Epeso mataro me na tangiana na Pentekosite.

⁹Renia ikê i Epeso ki hagagara koro tangê, vi gê tarohenia igê o Kirisito, henaka ga rako na enoni, ga ura pusiê.

¹⁰Manga o Timoti, ma ki vatugigamu, ki ararigamu, vigamu manatangenia, hanana i obâbakoro, suria ngaia ki tagara tanga na Araha manga inê.

¹¹Siana ta na enoni ki ruhia. Ma ki tuguhigamu hete, mu tamania, hanana i uria na râha iana, ma siana ta na tarana ki hagabarasia, matena vi aporo me i pasiku, renia inê ma na goaka igê na tongesuriha ikê kami naasia.

¹²Hoi, ta na marâ renia o Apolo, na goaka igê na tongesuriha. Inê kê bani kanukanua hagarako, hanana vige vatugigamu, i takura tani na goaka igê na tongesuriha, ma ngaia ki vi, vi mamênga na matena iana, vi ge arâ igê. Ma ngaia ki page arâ, manga vi ngaia ma ki nahunia na matora.

¹³Mu hinaru. Mu nganganihaga igê na tongesuriha. Mu ramoramo. Mu nganganihaga.

¹⁴Mu hagabângenia na takuiha igê na ara ni marâ, mu tanugi.

¹⁵Igamu kamu bani girara o Setepana ma na ahemata iana. Ngaira ka hagenago ka têa na tongesuriha i Agaia, ma ka tagara bâraha, hanana ga tamanira na kariana God. Goaku igê na tongesuriha, inê kê nungigamu nga,

¹⁶hanana mu têtê viteata na enoni mangara na ani ngegê, ma na viteata na enoni hato, ga tagara bâraha manga ngaira.

¹⁷Inê kê vagevage, renia ga râ me o Setepana, mo Fotunato mo Agaiko. Ngaira ka hagakoro obaku, suria inê kê arisigamu.

¹⁸Ma ngaira ka nganinganiê, tagenana manga ga bani nganinganigamu igamu. I tuguhigamu, vigamu visira koro na enoni mangara na ani ngegana.

¹⁹Na haku na enoni, ga tongesuri i na apanena i Asia ka hagamauru koro tangagamu. O Akuila ma ka Pirisila ma na haku na enoni, ga tongesuri, ga râ me haku i ruma iaterua tanga na hagarahenga, ka hagamauru koro tangagamu, suria igia ka obahaku henia na Araha.

²⁰Na goaka hato igê na tongesuriha, ga oga ikê, ka hagamauru koro tangagamu. Mu nunugugamu heri, manga i marisita na enoni, ga tongesuri.

²¹Inê mareku kê sege: “Inê Paulo kê hagamauru koro tangagamu.”

²²I page tarahua na eraha na ani mavê na enoni, i pe takuia na Araha. Ga nungi: Araha, gu râ me!

²³Inê kê nungia na Araha o Jesu, ki korokoro tangagamu.

²⁴Inê kê takuigamu hato, suria igia ka obahaku henia o Kirisito Jesu.