Read Kahua 1 KORINTO 4 Bible Online

1 KORINTO 4 - Kahua bible

1 KORINTO 4

¹I tuguhigamu, mu takusigami, manga vi igami ka na kariana o Kirisito. God ki bani hagêgurigami, kami bâbâ surigi na morani na monariha, ngaira ma na enoni, ga tongesuri, ga giraragi.

²Manga igo, ma ki hagêgurigo na araha iamu renia ta na marâ, ki tuguhigo, vi go têtê viteana bâkoro, hanana ngaia ki hagêguritogo renigo.

³Hoi, inê kê pe tako renigi na hagakitana iami, se na enoni getera, tangê. Inê kê pe hagakitê mareku nikâ.

⁴Igê na aitangihaku inê kê girara, vi inê kê pe tasi. Ma na tarana ngekana ki pe vi, vi inê kê pe tasi ngavê. Na Araha ngaia nga kani suriê.

⁵Tahema, siana kamu suria rêrê ta na enoni, matena i mamênga na bevoana tanga. I tuguhigamu, mu naka ma vê na suriha tanga na tangiana, na Araha i page arâ me igê. Ngaia ki page ranganigi mave na marâ, ga pinihi, ma nikâ na katoha, ga pinihi igê na aitangihata na enoni. Ma i na matena i ngekana God ki page kasia akê na ara ni enoni renia na tagaraha iana.

⁶Goaku igê na tongesuriha, na ara ni marâ hato ngegana, ka maratoramirua, o Apolo menê, manga na hagararinga, hanana gê tamanigamu. Inê kê hagararigamirua manga na hagararinga, hanana igamu kamu girara na girarana na tamasinga ikê, “Mu marupegi maninga na ramata na ani ga koro.” Siana na hitangimi ki paroparo renia na ani gi tage na mane, ma ki ruhia tani.

⁷O ti kani katogamu, kamu teharira na enoni getera? God ki pe vategamu vari na ara ni marâ, mu nahunigi? Hoita, manga i he kamu girara, mu paroparo, manga vi na marâ, mu nahunigi, ka pe vora vi na votovoto?

⁸Ma igamu, igamu kamu bani nahunigi na ara ni marâ, mu obanigi! Igamu kamu bani ruruguha! Igamu kamu bani vora re na maneraha, ma igami ki mareha. E, inê kê obanigamu, vi gamu maneraha monari. Manga vi gamu manga ngekana, e, igami kami maneraha henigamu.

⁹Suria tangê inê ki bâ manga, vi igami, na aposotolo, God ki bani nakagami i matakere so nga. Igami kami mangara na manero, ga surira ka hagaitangira ma ka nahuira ka me i maata na enoni: na marâ na maveta hagenani, na angero hato, ma na enoni hato ka obania bâraha, vi ga boretenia.

¹⁰Igami ka visigami, vi igami kami bekabekaga, suria mi tagara tanga o Kirisito, ma igamu, e, igamu kamu tako mataha ngavê! Igami kami pe ramo, ma igamu, e, igamu kamu ramo ngavê! Na enoni ka ruhigami, ma igamu, e, na enoni ka hagahigasigamu!

¹¹I tariha igê nga na matena i ngekê igami kami magê, ma kami pasi tono bâraha. Igami kami hagesuru renigi na kakagani na gahu. Ka ramusigami. Igami kami pe oga tonge igê na agua gi tage.

¹²Igami kami tagara bâraha maremami renigi na marâ, mi mauri re. Matena na enoni ka visigami bera, igami kami visera koro. Matena na enoni ka merongasigami, igami kami piringiape.

¹³Matena ga guharigami, igami kami aramira bê aporo renigi na tamasinga koro. Na enoni ka katogami manga na roro. I tariha me i ngekê nga igami kami manga na momogani na mako!

¹⁴Inê kê sege vikê tangagamu, mareha suria vi inê kê obania, vi gê hagamakigamu, ma kê kato vikê, suria hete gê hagesurigamu, manga vi igamu ki na kareku hetakui.

¹⁵Henaka vi na rehagaro tangahuru gi tage na enoni ka hagesurigamu, hanana vi gamu obâbahaku henia o Kirisito, o vaemami ki gi tage togo ma. Igê na apanena na mauriha iami i Kirisito Jesu, inê nga ki no vaemami, suria inê nga kanigê hagarongogamu moramora renia na Taroha Koro.

¹⁶Inê kê nungigamu nga, hanana mu amaka suriê.

¹⁷Tahema inê kê hagatorangenia o Timoti tangagamu. I na Araha ngaia ki na kareku hetakui, gê hagêguritogo renia. Ngaia ki page hagamarakegamu renigi na hagesuringa, gê râ surigi igê na mauriha haoru i Kirisito Jesu, ma kê hagesurira na haku hato na enoni, ga tongesuri, i na ara ni agua renigi.

¹⁸Tani na hitangimi ka vi ma, vi inê kê pe arâ me be vatugigamu, ma ka hagarahasira mareta.

¹⁹Manga vi na Araha, ma ke hagamarumungeniê, inê be vatugigamu rêrê, ma i ngekana inê mareku kê page tarahugi na ani ta na marâ ka na ani, ga paroparo ka girara ga tanugi, mareha vi na marâ, ga girara vi ga visigi ma i harata.

²⁰Suria na Arahanga iana God ki mareha vi na tamasinga ma, ma ngaia hete ki na tagaraha igê na raramohana God.

²¹Na ta kanimu obania? Mu obania vari, vi gê ramonigamu, matena gê vatugigamu? Se mu obania, vi gê takuigamu ma kê megamu marape?