Read Kahua 1 KORINTO 5 Bible Online

1 KORINTO 5 - Kahua bible

1 KORINTO 5

¹Inê kê tahetara renia na marâ, gê bani rongoa. Ngaia ki na paronga era i pasimi. Ta na mane ki torea na gete iana o vaemana. Na tarana ngekana ki era ngavê. Na enoni ahuroto nikâ ngaira ka vi, na tarana ngekana ki apu ngavê.

²Manga i he kanimu girara vigamu vagevage? I tuguhigamu hete, vi aera na obami renia, ma kamu paia hura tenigamu na mane, i katoa na tarana ngekana!

³Tangê inê, henaka vi inê kê ma be pe oga henigamu, ma igê na aitangihaku inê kê oga henigamu. Ma igê na raramohana na Araha iaka o Jesu inê kê bani suria noga na mane, i katoa na tarana, i era ngavê ngekana, tagenana manga vi inê kê oga henigamu.

⁴Matena mu oga haku, ma inê kê oga henigamu igê na aitangihaku, igê na raramohana na Araha iaka o Jesu, i gâga henigia,

⁵ki tuguhigamu, vigamu mahatangenia na mane ngekana tanga Satana, hanana i hatohato na teniha era na apena tenia, hanana i tahitahi igê na tangiana, i arâ me igê na Araha.

⁶I pe ararigamu, vi gamu vagevage. Igamu kamu bani girara, vi na kere agua na isiti ki katoa na makona na palaoa, ki ahunga.

⁷I tuguhigamu, mu tavoa hura na bani isiti na tasi ngekê, hanana igamu kamu page matarotaro ngavê. Manga ngekana, igamu kamu page manga na makona haoru na palaoa, ga pe aroa henia na isiti. Inê kê girara, igamu kamu manga ngekana monari, suria na Paseka iaka ki bani haganega, renia ga bani nahuia na karena sipi na Paseka iaka: ngaia ki no Kirisito.

⁸Ka hagarahasia na tangiana raha iaka, mareha vi renia na bereti, ga aroa henia na bani isiti, i vi, vi na isiti na tasi ma na paronga, i era, ma renia hete na bereti, ga pe aroa henia na isiti, i vi, vi na bereti ni matarotaroha ma na monariha.

⁹Igê na leta, gê bani segea tangagamu, inê kê bani vi tangagamu, vi siana kamu hakunira na enoni, ga tanu era.

¹⁰Hoi, inê kê pe vi, vi na enoni ahuroto, ga paronga era, se ga hagatage, se vi ga aharê igê na ramata, se vi ga vogasira na ataro. Manga mu nakara vê, ki asa, suria mu katokato vikana, igamu kamu huhura hagetage tenia na maveta.

¹¹Ma na marâ, gê visia, ki manga ikê: siana kamu hakunia na mane, i hêtana marena, vi ngaia ka na goami igê na tongesuriha, ma ki paronga era, se i hagatage, se i vogasira na ataro, se i tamasi erasira na enoni, se i ruguhia tare na tonoha, se i aharê igê na ramata. Siana kamu ngêngê henia nikâ na enoni ngekana.

¹²Hoita, ga surira na enoni, ga pe oga igê na haku na enoni, ga tongesuri, i mareha vi na tagaraha iaku. God hete kani page surira ngaira. Ma ki tuguhigamu, mu surira na tamami igê na tongesuriha. Suria na Buka Apuna ki vi, “Mu paia hura na mane era tenia na haku iami.”