Read Kahua 1 KORINTO 6 Bible Online

1 KORINTO 6 - Kahua bible

1 KORINTO 6

¹Manga na hitangimi, ma ki tuguria na goana igê na tongesuriha, manga i he kani girara vi arâ igê na tamasinga i pasita na mane ahuroto, ga hagatamasi? Ma ki pe nakara hete na kariana God, ke tagarahia ngaira?

²Mu pe girara vari, vi na kariana God ka page suria na maveta? Hoita, manga igamu, ma kamu page suria na maveta, mu pe girara vari, vi gamu surigi na ani ga sisite na marâ?

³Mu pe girara vari, vi igia ka page surira na angelo? Hoita, manga ngekana, igia ka surigi nga na marâ, ga sisite igê na mêriha i ngekê!

⁴Hoi, manga vi na kere tarani ngegana, ma ka akê me, ki hega, mu tagarenigi vari tangara na enoni purua igê na haku na enoni, ga tongesuri, hanana vi ga tagarahigi?

⁵Mu maki! Ai, ta na mane, i tako mataha, ki gâga igê na haku iami, ma ki girara i tagarahia na hetuguriana i berarogaterua na hegoana igê na tongesuriha!

⁶Ma igamu kamu kato vikê: ta na enoni, i tongesuri, ki torea na tamana igê na tongesuriha igê na tamasinga ma ki nakara na enoni ahuroto, ka tagarahia. Na tarana ngekana ki pe koro!

⁷Suria na hagatamasiha ga oga i berarogami, ki na girarana, vi igamu kamu tasi bâraha. Tanu hega kanimu pe piringiape, matena ga erasigamu? Tanu hega kanimu pe piringiape, matena ga hanago tenigamu?

⁸Ma suria igamu kamu pe kato vikana, tahema igamu kamu erasigamu heri, ma kamu hanago heri, henaka vi na goami nga igê na tongesuriha!

⁹Igamu kamu bani girara, vi na enoni era ki asa, vi ge page oga i pasina God na Araha. Siana kamu hagabekasigamu maremi! Na enoni, ga paronga era, se ga vogasira na ataro, se ga gamogamo, se na mane garu varangi heri, se na gete garu varangi heri,

¹⁰se na enoni ga hanago, se ga hagatage, se ga ruguhira tare na tonoha, se na enoni ga tamasi erasira na enoni, se na enoni ga aharê igê na ramata, na enoni ngegana ki asa hagetage, vi ge page oga i pasina God na Araha.

¹¹Tani na hitangimi ka manga ngegana i nago. Ma God ki bani bonotenigi na tasi iami, ma ki nahunigamu. Na Araha o Jesu Kirisito ma na Higona Apu iana na God iaka karu bani katogamu, kamu koro ma kamu oto i maana God.

¹²Ta na enoni ki vi vari, “Inê ki arariê ma, vigê katogi na ani mavê na marâ.” Ua, ma ki mareha vi na ara ni marâ ke koro tangago. I monari, inê kê girara gê vivi, “Inê ki arariê ma, vigê katogi na ani ma vê na marâ.” Ma inê kê usi, vi ta na marâ ke aharêsiê.

¹³Tani nikâ ki vi vari, “Na ngêra ki na marâ tanga na bahurina na enoni, ma na bahurina ki tanga na ngêra.” I monari! Ma God ki page hagamagahururerua. Na apena na enoni ki mareha vi na marâ tanga na tauha era, ma tanga hete na Araha. Ma na Araha ki marupea na apena.

¹⁴God ki hagamêria aporo na Araha tenira na enoni, ga me, ma suria ngaia ki raramohaga hunia, tahema ngaia i page hagamaurigia aporo nogaka.

¹⁵Mu bani girara, na apemi kani tagua na apena o Kirisito. I hega? I arari ma vari, vi inê kê tavoa tagua na apena o Kirisito, ma kê ratoa henia na apena na êra? I asa ngavê.

¹⁶Se mu pe girara vari, vi na mane, i paronga henia na êra, na apena ki tagenana ma henia? Na Buka Apuna ki visia mataha ngavê, ki vi, “Ngairerua karu vora manga na vere tage togo ma.”

¹⁷Ma na enoni, i hakunia na Araha, ngaia ki obahaku henia, ma karu vora manga na vere tage togo ma.

¹⁸Siana kamu gamogamo. Na ani mavê na tasi getigi, na enoni ki tanugi, ki pe tanugi renia na apena. Ma na enoni, i gamogamo, ngaia ki tasi erasia na apena marena.

¹⁹Mu pe girara vari, vi na apemi ka manga na ruma apuna iana na Higona Apu, i oga i pasimi, suria God ki bani vategamu? Igamu kamu pe nahunigamu maremi, ma ngaia hete nga God kani nahunigamu.

²⁰Ngaia ki bani vurigamu renia na mena raha. Tahema i tuguhigamu, vi gamu hagahigasia renigi na tagaraha na apemi.