Read Kahua 1 KORINTO 7 Bible Online

1 KORINTO 7 - Kahua bible

1 KORINTO 7

¹Hoi, ge bâsigi na marâ, mu bani sege renigi. I koro tanga na mane, manga vi pe auragi.

²Ma suria i raha na gamogamoha, tahema i koro teha, vi na ara ni mane ki nahunia na gete iana marena, ma na ara ni gete ki nahunia na mane iana marena.

³Na mane ki tuguhia i mahatangenia na tarana, i oto tanga na gete iana. Ma na gete ki tuguhia i mahatangenia na tarana i oto tanga na mane iana hanana ngairerua heri karu takotako vê.

⁴Na gete ki pe nahunia marena na apena, ma na mane hete. I tagenana ma na mane, ki pe nahunia marena na apena, ma na gete hete.

⁵Siana igamu na enoni êragi kamu manimanigamu heri tenia na mêruha haku. Manga mu katokato vikana, hagenago kamu agana heri, ma kamu uhungia suria na kere matena, hanana mu takusia noga na nunginungiha igê na kere matena ngekana. Ma hemuri kamu kahu gâga aporo mangara na enoni êragi, hanana siana Satana ki hagatasigamu, manga mu pe girara, mu hagaotogamu maremi.

⁶Na marâ inê kê visigi tangagamu, inê kê pe bonasigamu renigi, ma igamu maremi.

⁷Ma tangê inê, manga mu hagateê, inê mareku kê obania, vi na enoni hato ka gâga manga inê. Ma na ara ni enoni ki nahunia getea na votovoto God i bani vatea renia. Tani na enoni ki nahunia na ani ngekê na votovoto, ma tani ki nahunia na ani getea râ na votovoto.

⁸Hoi, tangara na enoni, ga pe êragi, ma tangara na gete, ga nâ, inê kê vi vikê: Inê kê takusia, vi i koro tangagamu, mu gâga getegamu nga manga inê.

⁹Ma ki manga i bara tangagamu, vi gamu gatagata pusigi na teniha, ua, ki ararigamu ma, vigamu auragi, suria na êragiha ki koro teharigi na teniha, ga erasigamu.

¹⁰Tangara na enoni êragi be visia ta na ramata. Na ramata ngekê ki mareha vi teniê inê mareku. Ngaia ki na ramata i râ me hete tenia na Araha. Ngaia ki manga ikê: siana na gete êragi ki kasia na mane iana.

¹¹Manga i katokato vikana ki tuguhia, i gâga getea nga, se manga i mareha, ngaia ki tuguhia, i hekorokoro aporo henia na mane iana. Ma na mane siana ki kasia na gete iana.

¹²Tangara na ani getera na enoni inê kê vi vikê, inê mareku, mareha vi na Araha: manga na mane, i tongesuri, ma ki bani torea na gete, i pe tongesuri, ma na gete ki agana, hanana vi gâga nga henia, siana na mane ki kasia.

¹³Ma ki manga na gete, i tongesuri, ma ki bani êragia na mane, i pe tongesuri, ma na mane ki agana, hanana vi gâga nga henia, siana na gete ki kasia.

¹⁴Renia na mane, i pe tongesuri, ki koro i maana God, suria ngaia ki oga haku henia na gete, i tongesuri. Ma na gete, i pe tongesuri, ki koro i maana God, suria ngaia ki oga haku nga henia na mane, i tongesuri. Manga i pe manga ngekana, na kareterua ka page ahuroto. Ma na kareterua ngaira ka koro hete i maana God.

¹⁵Hoi, manga vi na hitangiterua i pe tongesuri, ma ki obania, vi kasia na tamana, i tongesuri, i koro ma. Igê na tarana ngekê na tamana, i tongesuri, na mane se na gete, ngaia ki asitatara, renia God ki obanigamu, vi gamu marape heri.

¹⁶Hoi, igo na gete, go tongesuri, manga i he kanigo girara nga, vi igo ko page hagatahia na mane iamu, i pe tongesuria o Kirisito? Se vi igo na mane, go tongesuri, manga i he kanigo girara nga, vi igo ko page hagatahia na gete iamu, i pe tongesuri?

¹⁷Na ara ni enoni, i tongesuri, ki tuguhia, i ama ni mauri nga suria na obaniha iana na Araha tanga, ma ki arâ nga suria na tagaraha, i nahunia, matena God i atea moramora, ki tongesuri. Inê kê bonasira na ara ni haku na enoni, ga tongesuri, renia na tarana ngekê.

¹⁸Manga vi na mane, ga bani retea râ na gavona na varana, ma ki taua na tongesuriha, matena God i atea, siana ki uhungia, vi hagamagahurugi na oreni na agua, ga retegi. Manga vi na mane, ga pe retea râ na gavona na varana, ma ki taua na tongesuriha, matena God i atea, siana ki nungia na reteha.

¹⁹Suria na reteha, se na pe reteha, ki na marâ purua ma. Ma na marâ i raha hete, ngaia ki manga ikê: i tuguhigia, ga marupegi na ramata iana God.

²⁰Na ara ni enoni ki tuguhia, i gâga nga manga bani hanana, matena i taua moramora igê na tongesuriha, bevoana God i atea.

²¹Manga vi igo ki na kare vurivuri, matena God i atego, henaka i manga ngekana, siana ko takotako renia. Ma ki manga igo, ma ko girara, vi go vora re na enoni aharupa, gu katoa.

²²Renia na kare vurivuri, na Araha i bani atea, ngaia ki na kariana aharupa na Araha. I tagenana ma na enoni aharupa, o Kirisito i bani atea, ngaia ki na kare vurivuri iana.

²³God ki bani vurigamu renia na mena raha. Tahema siana kamu voravora re vi na kare vurivuri iata na enoni.

²⁴Goaku igê na tongesuriha, na ara ni enoni, i tongesuri, ki tuguhia, i gâga nga igê na obahahaku henia God manga bani hanana, matena God i atea moramora igê.

²⁵Hoi, na Araha ki pe vateê na ramata tangara na enoni, ga pe êragi. Ma na takotako iaku mareku ma, kani ikê. Ma suria na Araha ki takuiê, mu girara, mu hagêguritogo reniê.

²⁶Matena gê bâsigi na mamasiaganiha i na matena i ngekê, inê kê takusia, vi na enoni ki araria, i gâga manga bani hanana.

²⁷Manga vi igo, ma ko nahunia na gete, siana ko uhungia, vi go kasia. Manga vi igo, ma ko pe êragi, siana ko uhungia, vi go torea na gete.

²⁸Ma ki manga vi igo, ma ko auragi, igo ki mareha vi gu tasi. Ma ki manga vi na gete, i tatara, ma ki auragi, ngaia ki mareha vige tasi. Inê kê obania ma, vi gê rêra pusigi tenigamu na mamasiaganiha, ga tarahura na enoni ngegana i na ara ni tangiana.

²⁹Goaku igê na tongesuriha, na marâ, gê visia, ki manga ikê: i abubu noga na matena. Haganega tenia i ngekê, na mane êragi ki ararira, ga mauri mangara ga mauri mangara vi ga pe êragi.

³⁰Na ani, ga angiangi, manga vi ga pe angiangi. Na ani, ga vagevage, manga vi ga pe vagevage. Na ani, ga vurivuri, manga vi ga pe nahunigi na marâ, ga bani vurigi.

³¹Na ani, ga aruma renigi na marâ ni maveta, manga vi ga pe aruma tare renigi, suria na maveta, na ani i ngekê, ki sugi magahuru.

³²Inê kê pe obanigamu, vi gamu takotako bâraha renigi tani na marâ. Na mane tatara ki naka marena igê na tagaraha tanga na Araha, suria ngaia ki uhungia, vi hagakoro obana na Araha.

³³Ma na mane êragi ki naka marena igê na marâ ni maveta, suria ngaia ki obania, vi hagakoro obana na gete iana.

³⁴Manga ngekana ngaia ki têtê ruarua. Na gete, i pe êragi, se i tatara, ki naka marena igê na tagaraha tanga ma na Araha, renia ngaia ki obania, vi tototo suria na Araha renia na apena ma na atarona nikâ. Ma na gete êragi ngaia ki naka marena igê na marâ ni maveta, suria ngaia ki obania, vi hagakoro obana na mane iana.

³⁵Inê kê vi vikê, suria gê obania, gê tamanigamu. Inê kê pe uhungia, hanana vi ve ramatenigamu. Inê kê obanigamu hete, vi gamu tanugi na marâ, ga oto ma ka koro, ma kamu nakagamu maremi ngavê igê na tagaraha tanga ma na Araha. Siana kamu têtê ruarua.

³⁶Manga vi na arua garu heobani, ma karu atea, vi garu pe auragi, karu hega? Manga vi na mane, ma ki pe êragia, ma ki takusia, vi na tauhana ngekana ki pe koro tanga na gete taura; manga na teniha iana, ma ka gatagata tanga, ma ki takusia, vi i koro ma, vigaru auragi, hoi, i tuguhirerua, vigaru auragi, manga i obania. Na tarana ngekana ki mareha vi na tasi.

³⁷Ma ki manga vi na mane, ngaia marena, ma ki bani takusia gatagata, vi pe auragi; ma ki manga vi ngaia marena, mareha vi ta na enoni, se vi ta na marâ, vi ge tuguria, ma ki bani takusia, ki uhu, hoi, ngaia ki kato koro, manga vi pe auragia na gete taura.

³⁸Vikana na mane, i auragia na kere gete, i bani atengenia, ngaia ki katoa na tarana koro; ma ki manga i pe êragia, ngaia ki katoa na tarana i koro teha.

³⁹Na gete êragi ki pe asitatara, matena na mane iana ki tahitahi mênga. Manga vi na mane iana, ma ki me, ngaia ki kahu asitatara, hanana i auragia na mane, ngaia marena i obania, ma ki araria, vi na mane kirisitiano, renia i tuguhia, vi arâ suria na obaniha iana na Araha.

⁴⁰Ngaia ki babarisi ngavê, manga vi ngaia ma ki gâga getea. Na takotako iaku ngekê ma kê takusia, vi na Higona Apu iana God kani angariê nikâ.