Read Kahua 1 KORINTO 8 Bible Online

1 KORINTO 8 - Kahua bible

1 KORINTO 8

¹Hoita, i hega na ngêra na vogasiha tangara na ataro? Na enoni ka vi ngaira, “Igia hato ka nahunia na giraraha.” Ua, i monari. Ma na giraraha ki katoa na enoni ki paroparo. Na paroparoha ki pe tonga hunana, ma na hetakuiha ki hagaraha na koroha.

²Na enoni, i takusia, vi ngaia ki girara ta na marâ, ngaia ki mamênga, vi ge girara maninga, vi na giraraha iana ki pe arari.

³Ma na enoni, i takuia God, God ki girara.

⁴Hoi, na ngêra na vogasiha tangara na ataro: igia ka girara, vi na ataro ki na marâ, i pe gâga i tagua. Igia ka girara, vi God ki gi tage togo ma.

⁵Manga vige goga na marâ, ga atani hêtata ma vi na god, i vavearo se i ano, ma ka manga vi ga rako na marâ, ga atani hêtata ma vi na god ma araha,

⁶henaka ma tangagia igia, God ki gi tage togo. Ngaia ki no Vaemana o Kirisito, i hagavorara na ara ni marâ hato, ma igia tanga ngaia. Ma na Araha ki gi tage togo ma: ngaia ki no Jesu Kirisito. Ma renia ngaia, God ki hagavorara na ara ni marâ hato, ma igia ka mauri renia ngaia.

⁷Mareha vi na enoni hato kanige nahunia na monariha ngekana. Mataro me i na matena nga i ngekê tani na enoni, ga bani vogasira me tare na ataro i nago, ngaira ka takusia mênga, na matena ga ngêa igê na ngêra na vogasiha, vi na ngêra ngekana ki na ngêra iana na ataro. Renia na tongesuriha igê na aitangihata ki pe ramo, ngaira ka takusia, vi na ngêra ngekana ki erasira.

⁸Na ngêra ki asa, vi ge hagakorogia tanga God. Manga vi igia, ma ka pe ngaua, i asa, vi ge erasigia. Ma ki manga vi igia, ma ka ngaua, ngaia ki asa, vi ge hagakorogia.

⁹Mu hinaru, renia ta na marâ nikâ mu takusia. I koro tangamu, igamu na ani mu ramo igê na tongesuriha, mu katokato vikana. Ma kamu hinaru, i era ma kamu hagatasira na enoni, ga pe ramo igê na tongesuriha.

¹⁰Ata ni vi ma: manga vi igo, ma ko nahunia na “giraraha”, ma ta na enoni, i pe ramo na tongesuriha iana, ki bâsigo, go ngê igê na ngêsu tangara na ataro, ki hega, na tarana ngekana ki pe kanukanua vari, hanana vi ngêngê na ngêra na vogasiha tangara na ataro?

¹¹Tahema na “giraraha” iamu ki asa, vi ge page tahi renia na enoni ngekana, i pe gatagata na tongesuriha iana. Ma ngaia ki na goamu igê na tongesuriha, o Kirisito ki me tanga!

¹²Ma igê na tarana ngekana igo ko tasi erasia o Kirisito, suria go tasi erasira na goamu igê na tongesuriha, ma ko erasia na tongesuriha iata, i pe ramoramo.

¹³Manga vi na ngêra, ma ki hagatasia na goaku igê na tongesuriha, inê mareku ki asa hagetage nogaku vi ve ngê nikâ na ganiani, hanana siana kê hagatasia na goaku igê na tongesuriha.