Read Kahua 1 KORINTO 9 Bible Online

1 KORINTO 9 - Kahua bible

1 KORINTO 9

¹Inê vari kê mareha vi na mane aharupa? Inê vari kê mareha vi na aposotolo? Inê vari kê pe bani bâsia o Jesu na Araha iaka? Igamu vari kamu pe vora re na meni na tagaraha iaku tanga na Araha?

²Henaka vi inê kê pe aposotolo tangara na enoni getera, ma inê nga kanigê aposotolo tangagamu! Igamu maremi, renia mu tongesuria na Araha, igamu kamu hagatanga monari reniê, vi inê ki na aposotolo.

³Matena na enoni ka hagaigê, inê kê ramo pusiê mareku, kê vi:

⁴I pe oto tangê vari, vi na enoni ke hagangêê ma ke vateê be totono, mena na tagaraha iaku?

⁵Igê na râha iaku ki pe oto tangê vari, vi ve merâ heniê na gete, i tongesuri, na gete iaku, mangara na ani getera na aposotolo, ma na goana na Araha, mo Petero?

⁶Se i tuguhigamirua ma, o Banebasi menê, vi gamuru tagara maremamirua vari renigi na marâ, muru mauri re?

⁷Mu takusia vari, vi na mane ni me ki vuria so marena, ma ki vurigi na marâ getigi, ma na tangaruha? Se na mane, i tagarahia na mu ni vaini, ki hega, i pe ngêngê vari na guani na vaini iana marena? Se na mane, i nahunira na sipi, ki hega, i pe totono vari na susu tenira na sipi iana marena?

⁸Na hagararinga ngegê inê kê toregi tenigi na marâ, ga bâsigi i na ara ni tangiani. Ma kê torea na Ramata nikâ, suria na Ramata ki visia vikana nogana.

⁹Na Ramata iana o Moise ki vi, “Siana kamu pagea na harana na puruka, matena i purigi na raisi.” Hoi, mu takusia vari, vi God ki tako renira na puruka?

¹⁰Se i pe tamasi oho renigia, matena i vi vikê? Mako, na ramata ngekê ki tamasi oho renigia! Na enoni, ga hikiru, ma na enoni, ga opaopa nikâ, ki tuguhira, ga tagara hagakoro, hanana ga page tongani na harisi.

¹¹Igami kami bani hasia na tongesuriha i berarogami. I hega, i bara bâraha tangagamu vari, manga vi igami kami nungigamu, kamu tamanigami?

¹²Manga vi tuguhigamu, vi gamu tamanira na ani getera, ki pe tuguhigamu ngavê vari, vi gamu tamanigami igami nogamami? Ma igami henaka i oto tangagami, ma igami kami pe katoa. Igami kami piringiape hete igê na ara ni marâ, hanana mi pe hagabarasia na Taroha Koro renia o Kirisito.

¹³Igamu kamu bani girara, vi na enoni, ga tagara igê na Ruma ni Rotu, ngaira ka mauri renigi na ngêra na rotu. Ma na enoni, ga susu igê na bea ni vogasiha, ngaira ka ngêngê tagua na marâ, ga susu renigi.

¹⁴I tagenana ma na Araha ki naka na ramata, hanana na taroheniana na Taroha Koro ki ararira, ga mauri renia.

¹⁵Na tarani ngegana ka oto tangê, ma inê kê pe katogi. Inê kê sege vikana, mareha suria vi inê kê page katogi na marâ, ga oto tangê. I asa ngavê! I araria ma, ve magahuru hete! I oto tangê, vi gê ageage renia na tauhaku, ma ki asa ta na enoni, vi ge katoê, be ageage renigi na guruni na tamasinga.

¹⁶I pe oto tangê, vi ve paroparo, suria vi gê tarohenia na Taroha Koro. Ma inê kê pe katoa hete, suria i tuguhiê. Ma ki era ngavê tangê, manga vi gê pe tarohenia na Taroha Koro!

¹⁷Manga vi inê mareku, ma kê atea na tagaraha ngekana, hoi, i arariê, vi gê naasia na meku. Ma suria inê mareku kê pe atea na tagaraha ngekana, inê kê katoa, suria i tuguhiê.

¹⁸Na vuriku ki manga i he? Ngaia ki manga ikê: ngaia ki na vagevageha igê na aitangihaku, matena gê ateate renia na Taroha Koro, ma kê pe hagaturira na enoni, ma kê pe katogi na marâ, ga oto tangê, matena gê tarohenia na Taroha Koro.

¹⁹Inê ki na mane aharupa. Inê kê katoê mareku manga na kare vurivuri iata na ara ni enoni. Inê kê katoê mareku manga vi na kare vurivuri iata na ara ni enoni, hanana gê torera rako nga na enoni tanga o Kirisito.

²⁰Matena inê kê tagara i pasita na Siu, inê kê oga mangara ngaira na Siu, hanana gê torera tanga o Kirisito. Naka ma na Ramata iana o Moise ka pe buhiê, inê kê oga manga nogaku vi na Ramata ka buhiê, matena gê tagara i pasita, hanana vi gê torera tanga o Kirisito. Mako, inê kê marupegi na ramata iana God, suria na ramata iana ki buhiê.

²¹I tagenana ma, matena gê oga i pasita na enoni, ga pe Siu: inê kê oga mangara ngaira na enoni, ga pe Siu, ma kê pe râ surigi na Ramata iata na Siu, hanana vi gê torera tanga o Kirisito.

²²Ngekana igê na ara ni tauhata inê kê mangara ngaira, hanana gê girara, gê hagatahira tani na hitangita renigi na ani mavê na tarani.

²³Inê kê katogi na marâ hato ngegana, hanana i totoko na Taroha Koro, ma ki vateê nogaku na tahinga.

²⁴Igamu kamu bani girara, vi igê na hemêmêsiana na ara ni enoni ka tangotango tagenata, ma na ani gi tage ma kani page tehateha. Tahema mu tangotango, hanana mu tehateha.

²⁵Na ara ni enoni, ga hemêmêsi, matena ga hagarêra mareta, ki tuguhira, viga tanugi tani na marâ, ma ka nakagi vê tani na marâ. Ngaira ka katokato vikana, hanana viga tehateha, ma ka nahunia na tarepuri, i page makahukahu. Ma igia ka katokato vikana, hanana ga page nahunia na tarepuri, i asa, vi ge page makahukahu.

²⁶Tahema inê kê tangotango ototo râ tanga na agua, ga hatohato igê. Tahema inê kê manga na mane, i pe atara na rimana, matena i herupu.

²⁷I tagenana manga vi inê kê rupugia na apeku mareku, hanana vi are suriê. I era ma ka kasiê hura inê, matena gê bani atera na ani getera tanga na hemêmêsiana.