Read Kahua 2 KORINTO 1 Bible Online

2 KORINTO 1 - Kahua bible

2 KORINTO 1

¹Inê ki no Paulo. God ki bani ateê ma ki kâsiê, kê aposotolo iana o Kirisito Jesu. Inê mo Timoti, na goaka igê na tongesuriha, igamirua kamuru sege tangagamu, igamu na enoni, mu tongesuria God, mu oga i Korinto, ma tangara hato na kariana God, ga oga i na apanena i Agaia.

²Inê kê nunginungi, hanana God Vaemaka ma na Araha iaka o Jesu Kirisito karu korokoro tangagamu, ma karu vategamu na marapeha.

³Ka visia koro God, o Vaemana na Araha iaka o Jesu Kirisito, o Vaemaka i takuigia, na God i hagaramonigia tare igê na ogaha iaka.

⁴Ngaia ki tamanigami tenigi na ara ni mamasiaganiha iamami, hanana vi igami kami girara, mi tamanira na enoni getera tenigi na ani mavê na mamasiaganiha iata renia na hetamaniha, God i bani vategami nogamami.

⁵Rako na mamasiaganiha iana o Kirisito ka tarahugami nogamami, ma nikâ renia o Kirisito God ki tamanigami bâraha.

⁶Manga i tarahugami na mamasiaganiha, na mamasiaganiha ngekê ki tamanigami, ma ki hagatahigamu. Manga vi God, ma ki tamanigami, igami kami girara mi tamanigamu nogami, ma kami hagaramonigamu nogami, hanana mu piringiape, matena ga tarahugamu na mamasiaganiha, ga tarahugami nogamami.

⁷Manga ngekana, igami kami takotako togo renigamu, suria igami kami girara, vi ga tarahugamu nogami na mamasiaganiha iamami, ma nikâ i tarahugamu nogami na hetamaniha, i tarahugami nogamami.

⁸Goaku igê na tongesuriha, igami kami obania, vigami hagarongogamu renigi na mamasiaganiha, ga tarahugami i na apanena i Asia. Na tarani ga higegami ngavê, ma kami pe raruni ni tahi nga renigi.

⁹Igami kami takusia, vi sugia ma vigami meme. Na tarani ngegana ka katogami, kami pe hagêguri koro renigami maremami, ma kami hagêguri togo ma renia God, i hagamêrira na enoni, ga me.

¹⁰Ngaia ki hagatahigami tenigi na marâ, mi haga ni me renigi ngegana. Ngaia ki page hagatahigami, ma igami kami bani hagêguri togo renia, vi ngaia ki page hagatahigami nikâ,

¹¹manga vi igamu, ma kamu tamanigami renigi na nunginungiha iami tangagami. Ngekana God ki page aganarigi na nunginungiha iami tangagami, ma ki page tamanigami; ma na enoni rako ka page visia koro God renigami.

¹²Ikê na marâ mi ageage renia: igê na aitangihamami igami kami bani girara, vi na ogaha iamami i maveta ikê ma na parongamami tangagamu ka koro i maana God, suria igami kami tamasi mave tare tangagamu, ma ki asa, vi gami hagaparugamu. Igami kami kato vikana, suria God ki tamanigami, hanana vi siana kami nakanaka igê ta na marâ getea.

¹³Igami kami segegi ma tangagamu na marâ, mu girara mu tomanigi, ma kamu rongorongogiraragi. Ikê inê kê naasia, vi igamu kamu page rongogiraragi ngavê,

¹⁴na marâ, mu pe rongo mataha maninga renigi i ngekê, hanana mu page ageage renigami igê na Tangiana ni râha me iana na Araha o Jesu, tagenana ma igami kami page ageage renigamu nogamami.

¹⁵Inê kê bani giraragi na marâ ngegana, matena gê kato hagenago vi gê vatugigamu igê hagerua, hanana vi gê tamanigamu.

¹⁶Suria inê kê bani kato hagenago, vi gê vatugigamu, matena gê râ i Masetonia, ma nikâ matena gê aporo me, hanana vi gê nungigamu, kamu tamaniê igê na râha iaku tanga i Jutea.

¹⁷Matena gê katoa na suruha ngekana, mu takusia vari, vi inê kê suru purupuru ma? Matena gê katogi na suruha iaku, mu takusia vari, vi inê kê takusiê mareku ma, matena gê surusuru, hanana vi ve girara ve vivi “Ua” ma “Mareha” igê na matena gi tage.

¹⁸Inê kê tohe renia God, matena inê kê surusuru tangagamu, vi inê kê pe visia “Ua” ma “Mareha” igê na matena gi tage.

¹⁹Renia o Jesu Kirisito, o Karena God, igami o Sailasi mo Timoti menê kami bani tarohenia tangagamu, ngaia ki pe visia “Ua” ma “Mareha” igê na matena gi tage. Ngaia hete ki na “Ua” iana God.

²⁰Ngaia ki na “Ua”, suria ngaia ki hagamonarigi na suruha hato iana God. Tahema renia o Jesu Kirisito igia ka visia “Amen”, ma ka visia raha God renia.

²¹Suria God ngaia marena ki hagagiraragia maninga, igami megamu nogami, vi igia ka obahaku henia o Kirisito. God ngaia marena ki bani monegia.

²²Ngaia ki bani pusigia renia na segesegeha iana, ma ki bani vategia na Higona Apu, ki oga igê na aitangihaka. Na girarana, vi God ki page vategia na ara ni marâ, i bani nakagi tangagia.

²³Inê kê tohe renia God, suria ngaia ki girara na parongaku! Suria inê kê pe obania, vi ve ramonigamu, tahema inê kê pe râ tanga i Korinto.

²⁴Igami kami pe obania, vi gami bonasigamu, hanana vi gamu tongesuri, suria mu bani nganganihaga igê na tongesuriha. Ma kami tagara henigamu hete, hanana vi gamu vagevage.