Read Kahua 2 KORINTO 10 Bible Online

2 KORINTO 10 - Kahua bible

2 KORINTO 10

¹Inê Paulo, inê mareku kê nungigamu. Ga visiê, vi inê kê haritagi ma kê mane hatara, matena gê oga henigamu, ma na matena gê pe oga henigamu, inê kê tamasi ramo tangagamu. Renia o Kirisito ki haritagi ma ki mane hatara, inê kê nungigamu,

²siana kamu katoê, kê ramonigamu, matena gê vatugigamu, vi suria inê kê bani girara, vi pe asa tangê, vi ve ramonira na enoni, ga visigami, vi gami paronga suria na parongana na maveta.

³I monari, igami kami oga i maveta, ma ki mareha, vi gami heariha suria na tauhana na maveta.

⁴Na tangaruha iamami igê na hearihatana ka mareha vi na tangaruha na ani ni maveta, ma ngaigi hete ka na tangaruha iana God raramohaga hunia, ga girara, ga teharigi na marâ ramo, ga rêra pusigami. Igami kami teharigi na tamasinga hagaparu.

⁵Igami kami okegi so na ara ni marâ, ga nakagi na enoni paroparo pusia na giraraha renia God. Igami kami henahu raugi na ara ni takotako, ma kami katora, ka têtê viteana God.

⁶Ma na matena mu têtê viteana o Kirisito igê na ara ni marâ, igami kami kahu nanê, hanana vi gami hagaitangia na ani mavê na enoni, i guguruga.

⁷Mu hahutugigi maninga na marâ. I hega, ta na enoni vari i pasimi ki takusia marena, vi ngaia ki na kariana o Kirisito? Hoi, i koro ma, ma ki araria, i takusia nikâ, vi igami nogamami ka na kariana o Kirisito nikâ.

⁸Renia inê kê pe maki, henaka vi inê kê ageage bâraha vari renia na ramoha, na Araha i bani vategami renia: na ramoha ngekê igami kami hagakorogamu renia, ma ki mareha tanga vi gami aerasigamu renia.

⁹Inê kê pe obania, vi ge bâbâ, manga vi inê kê uhungia, vi gê hagamagusigamu renigi na leta iaku.

¹⁰Ta na enoni ki page vivi vari, “O Paulo ki tamasi ramo, ma ki ramonigia igê na leta iana, ma na matena i gâga henigia, ngaia ki pe tamasi ramo, ma ki pe visia rârâ ta na marâ!”

¹¹Na enoni ngekana ki araria, i girara, vi na marâ, mi segegi igê na leta iamami, matena mi pe gâga henigamu, ma na marâ, mi page tanugi, matena mi gâga henigamu, ka hetagenani ma.

¹²I monari, igami so maremami, ki pe ararigami, vi gami mangara, se vi gami maratorata na enoni, ga hagarahasira mareta bâraha. Ngaira ka beka ngavê! Renia ngaira mareta ka hagararingenira mareta so renira mareta, ma ka hagakitara mareta so renira mareta.

¹³Hoi, ma igami kami pe paroparo igê na ani mavê na marâ, ma kami ageage hete renia na tagaraha, God i bani vategami, i vi nikâ, vi na tagaraha iamami i pasimi.

¹⁴Ma suria igamu kamu oga igê na siruguhamami, igami kami pe aharê igê na ramoha ngekê, matena mi arâ me i pasimi, hanana vi gami tarohenia na Taroha Koro renia o Kirisito.

¹⁵Manga ngekana, igami kami pe aharê igê na ramoha, God i bani vategami, matena mi ageage renia na tagaraha, ga bani katoa na enoni getera. Igami kami obania, vi na tongesuriha iami ki raharaha nga, hanana igami kami girara mi katoa nga na tagaraha, i raharaha ngavê i pasimi, matena mi pe aharê igê na ramoha, God i bani vategami.

¹⁶Ma hemuri, matena i gatagata na tongesuriha iami, igami kami girara mi kahu ateate renia na Taroha Koro i na agua getigi nikâ, hanana i hatohato, vi gami ageage renia na tagaraha, ga bani katoa na enoni getera i pasita.

¹⁷Na Buka Apuna ki vi, “Manga ta na enoni, ma ki obania vi ageage, ngaia ki tuguhia, i ageage renia na Araha.”

¹⁸Renia na enoni ki korokoro maninga, manga vi na Araha, ma ki visia, vi i koro, mareha vi ngaia marena na enoni, kani vige visia marena, vi i koro.