Read Kahua 2 KORINTO 2 Bible Online

2 KORINTO 2 - Kahua bible

2 KORINTO 2

¹Tahema inê kê tako vikê: inê kê pe vatugigamu, suria inê kê pe obania, vi ve hagarugu obami nikâ.

²Manga vi inê, ma kê hagarugu obami, ti kani hitahita râ, hanana vi page hagakoro obaku? Ngaira ma na enoni, gê bani hagarugu obata!

³Tahema inê kê bani segea na leta ngekana tangagamu. Inê kê pe obania, vi ve vatugigamu, renia gê pe obanigamu, vi gamu hagarugu obaku, suria igamu nga ka na enoni, i ararigamu, vi gamu hagakoro obaku. Suria inê kê bani girara, vi matena gê vagevage, igamu nogami kamu vagevage.

⁴Matena gê sege tangagamu, inê kê tako makira, ma ki hataera no obaku, ma kê angi, ma kê pe obania, vi ve hagarugu obami, ma kê obania ma hete, vi ve hagagiraragamu reniê, gê takuigamu bâraha ngavê, igamu hato.

⁵Hoi, manga ta na enoni, ma ki hagarugu obana ta na enoni getea, ngaia ki pe hagarugu obaku inê, ma igamu hete; se ngaia ki hagarugu obata na hitangimi ma, suria i era ma, kê katoa, ki aera ngavê.

⁶I uhu noga na hagaitangiha, i hagarangia, vi igamu hato kamu bani vatea na mane ngekana.

⁷Hoi, i ngekê ki tuguhigamu, vigamu bonotenigi na marâ era, i tanugi, ma kamu hagaramonia nga, hanana siana ki bonobono na obana, ma ki rumakaka ngavê.

⁸Inê kê nungigamu nga, hanana mu hagabângenia tanga, vi igamu kamu takuia monari.

⁹Tahema inê kê segea na leta ngekana: inê kê obania, ve uhungigamu, hanana ve girara, vi igamu kamu agana tare, hanana mu arâ surigi na tamasinga iaku.

¹⁰Manga vi igamu, ma kamu bonotenigi na marâ era, i tanugi, inê nikâ kê bonotenigi nogaku. Suria matena gê bonotenia na eraha, manga vi gâga ta na eraha, ki tuguhiê, vi gê bonotenia, inê kê katoa vikana i maana o Kirisito, hanana gê tamanigamu,

¹¹hanana siana Satana ki teharigia, suria igia ka bani giraragi na katoha iana.

¹²Matena inê kê ata i hinua o Toroasi, hanana vi gê ateate igê renia na Taroha Koro renia o Kirisito, inê kê tarahua, vi na Araha ki bani hagarêa i ngekana, hanana vi inê kê tagara igê.

¹³Ma inê kê tako makira ngavê, suria inê kê pe tarahua o Tito, na goaka igê na tongesuriha. Tahema inê kê arira na enoni i ngekana, ma kê uria na râha iaku tanga i Masetonia.

¹⁴Ge visia koro God. Manga vi igami, ma kami obahaku henia o Kirisito, God ki bêngenigami tare mangara na enoni vurivuri, hanana mi arâ suria o Kirisito. O Kirisito ki teha. God ki hagatagarahigami, hanana igami kami hagagirarara na enoni hato renia o Kirisito. Igami kami manga na marâ, i sigini koro, ma na vanuhana ki manasigi na ara ni agua.

¹⁵Suria igami kami manga na vanuhana koro na marâ, i sigini koro, o Kirisito i sungia tanga God. Na vanuhana ki arâ tangara na enoni, ga tahitahi, ma tangara na enoni, ga pe tahitahi.

¹⁶Tangara na enoni, ga pe tahitahi, na vanuhana ki aera ngavê, ma ki nanahuira; ma tangara na enoni, ga tahitahi, ngaia ki na vanuhana koro, i hagamêrira. Hoi, ti kani araria na tagaraha ngekana?

¹⁷Igami kami pe mangara rako na enoni, ga hagavuringenia na tamasinga iana God, hanana vi ga hagarahagi na haga. Ma suria God ki bani hagatorangenigami, igami kami ateate ototo ma, ma kami pe nakanaka igê ta na marâ getea, suria igami kami oga i maana God, ma nikâ igami ka na kariana o Kirisito.