Read Kahua 2 KORINTO 3 Bible Online

2 KORINTO 3 - Kahua bible

2 KORINTO 3

¹I hega, igami kami haganega vari kami tamasi renigami maremami nikâ? I hega, igami kami turigi vari na leta tangagamu, se tenigamu, mangara tani na enoni getera?

²Igamu maremi nga ki na leta, mi turia tangagamu: ga bani segea igê na obamami, hanana vi na ara ni enoni ki bâsia ma ki tomania.

³I rongo mataha, vi o Kirisito ngaia marena kani segea na leta ngekê, ma ki hagatorangenigami henia. Ga pe segea renia na inki igê na hê, ma igê hete na obata na enoni renia na Higona Apu iana God mamauri.

⁴Igami kami vi vikê, suria igami kami hagêguri togo renia God igê na raramohana o Kirisito.

⁵I asa hagetage, vi igami maremami, vi gami girara mi vi, vi igami kami girara mi tanua na tagaraha ngekê. Igami kami girara, suria God ki tamanigami.

⁶Ngaia nga kani katogami, kami araria, hanana mi tagara tanga na suruheri haoru, mareha vi tangagi na ramata, ga bani segea so, ma tanga hete na Higona Apu. Na ramata, ga bani segegi so, ka torea me na mera; ma na Higona Apu ki torea me na mêriha.

⁷Na Ramata ga tarigi igê na hê, ma God ki hagabângenia igê na raramohana, matena i tagarenigi tanga o Moise. Na togatogana na maana o Moise ki togatoga ngavê. Tahema na Isiraelita ki asa, vi ge boretenia. Ma na togatogana ki magahuru. God ki hagabângenia na raramohana raha, matena i tagarenigi na Ramata, ga torea me na mera.

⁸Ma ki hega, na tagaraha iana na Higona Apu ki pe hagabângenia vari, vi na raramohana ki raha teha ngavê?

⁹Na tagaraha iana na Ramata, ga surira ka hagaitangira na enoni, ki hagabângenia na raramohana raha God. Ki hega, na tagaraha iana na Higona Apu, i visira na enoni, vi ga koro ma ka oto, ki pe hagabângenia vari, vi na raramohana ki raha teha ngavê?

¹⁰I ararigia ma, vi ga vi, vi na ramoha, ga bani oga me i nago, ka bani hato suria na ramoha, i oga i ngekê, ki raha teharigi.

¹¹Suria manga vi na marâ i pe gâga arihu, ma ki nahunia na ramoha, ki hega, na marâ, i gâga tare, ki pe nahunia vari na ramoha, i raha teha?

¹²Renia igami kami naasia na tarana ngekana, igami kami nganganihaga bâraha.

¹³Igami kami pe manga o Moise, i buhia na maana, hanana vi na Isiraelita ka pe rigia na togatogana, i mameaga ma ki magahuru.

¹⁴I monari, i bono na obata, ma ki mataro me i ngekê nga ki bonobono mênga na obata, matena ga tomanigi na buka na bani suruheri. Ngaira ki roto na aitangihata manga na maana o Moise, i buhia. Na roto ngekana ki magahuru renia ma na matena na enoni i tongesuria o Kirisito.

¹⁵I ngekê nikâ ki rotoroto mênga na obata i na ara ni matena, ga tomanigi igê na Ramata iana o Moise.

¹⁶Ma na roto ngekana ki hato, suria na Buka Apuna ki vi: “Ga gaia na gahu tenigi na maana na enoni, matena i matuia na Araha.”

¹⁷Hoi, igê na segesegeha ngekê na tamasinga i vi “Araha”, ki vi, vi na Higona Apu. Ma na ani mavê na enoni, i angarira na Higona Apu, ngaira ka aharupa.

¹⁸Na ara ni hitangika ki togatoga, renia na raramohana na Araha i takiria, suria igia ka pe buhigi na maaka ma na raramohana na Araha ngekê, i Higona Apu, ki katogia ka ama ni bâ nga manga ngaia.