Read Kahua 2 KORINTO 5 Bible Online

2 KORINTO 5 - Kahua bible

2 KORINTO 5

¹Ikê i maveta ki manga ga oga igê na ruma na gahu: ngaia ki na apeka. Matena ga gaia râ na ruma na gahu tenigia, igia ka girara, vi God ki page vategia na ruma i pasina, ga gâga igê na ruma, ngaia marena i bani tagarahia, na ruma i page gâga hagahu.

²I maveta ikê igia ka gegege, ma ka angisia, viga oga igê na ruma iaka i pasina God.

³Suria na matena ga gâga i rarona, ki asa, vi ge pe tongatonga na apeka.

⁴Matena ga oga igê na ruma na gahu ikê i maveta, igia ka gegege, suria i higegia; mareha i suria, vi igia ka obania, viga tasigi râ na apeka, ga tonga renigi i maveta ikê, ma suria ga obania hete, viga tuguni harigapi renigi na apeka, ga page tongatonga renigi i pasina God, hanana na mêriha ki unumia na marâ, i girara i meme.

⁵Ngaia nga God kani bani hagarêgia tanga na urisiha ngekê, suria ngaia ki vategia na Higona Apu, i vi, vi ngaia ki page vategia na ara ni marâ, ngaia i bani nakagi tangagia.

⁶Tahema igami kami ramoramo tare nga. Igami kami girara, matena mi oga i pasimami, ngaia ki na apemami, igami kami hagatê tenia i pasina na Araha.

⁷Na marâ, mi tongesurigi, ka hagaotogi na mêriha iamami, ma ka mareha vi na marâ, mi bâsigi.

⁸Igami kami ramoramo nga. Ma ki manga i pe asa, igami kami obania, vi gami pania i pasimami, ngaia ki na apemami, ma kami bê banu i pasina na Araha.

⁹Ma na marâ igami kami obania ngavê teharigi na marâ getigi, ki manga ikê: igami kami obania, vi gami hagakoro obana na Araha i pasimami ikê, se i pasina.

¹⁰I tuguhigia, igia hato, vi ga rêra i maana o Kirisito, hanana i surigia, hanana vi na ara ni hitangika ki tavoa na mena, i ararigi na parongana, koro se ga pe koro, matena i gâga i maveta ikê.

¹¹Igami kami magutenia na Araha. Tahema igami kami uhungia, hanana vi na enoni ke tongesuri. God ki giraragami ngavê, ma inê kê takusia, vi igê na aitangihami igamu kamu aitangisiê inê nogaku vari.

¹²Igami kami pe obania, vi gami tamasi tangagamu renigami maremami nikâ, ma kami obania hete, vi i tuguhigamu, vi gamu ageage renigami, hanana mu page girara mu aramira na enoni, ga tamasi paroparo renia na bâbâhana na enoni, ma ki mareha vi renia na aitangihana.

¹³I hega, igami kami bekabeka vari? Ua, i vora me, hanana vi gami tamanigamu.

¹⁴Na takuiha iana o Kirisito ki bonasigami, suria igami kami girara, vi na vere tage togo ma na mane kani me urusira na enoni hato. Na tarana ngekana ki vi, vi na enoni hato ka me.

¹⁵Ngaia ki me tangara na enoni hato, hanana na enoni, ga mauri, siana ka mauri tangara ngaira mareta, ma tanga ma hete na ani, i meme ma ki mauri aporo, hanana i tamanira.

¹⁶Tahema i haganega tenia i ngekê, igia ka pe suria ta na enoni surigi na tauhata na enoni. I monari, i nago igia ka suria o Kirisito surigi na tauhata na enoni, ma i ngekê ki mareha.

¹⁷Manga vi ta na enoni, ma ki obahaku henia o Kirisito, ngaia ki hahaoruga aporo: i bani hato na bani marâ ma ki bani râ me na marâ haoru.

¹⁸God nga kani katogi na marâ hato ngegana. I nago igia ki na merongana, ma renia o Kirisito ngaia ki katogia ka vora na kariana, ma ki hagatoragia, ka katora na enoni getera, ka voravora re nogata na kariana.

¹⁹Tahema igami kami vi, vi renia o Kirisito God ki katora na enoni hato, ka vora re na kariana. Ngaia ki bonotenigi na tasi iata, ma ki bani kasigami, kami hagarongora na enoni, renia vi ngaia ki katora, ka vora re na kariana.

²⁰Ma i ngekê, igami ki na urusina o Kirisito. I manga God ngaia marena i unigamu renigami igami. Igami, na urusina o Kirisito, kami kanukanugamu nga, hanana vigamu aganaria God, i katogamu, kamu vora re na kariana, suria igamu ki na merongana.

²¹O Kirisito ki asa hagetage, vi ge tasi, ma God ki katoa, ki hakunira na enoni tasi, hanana vi igia ka obâbahaku henia, ka voravora koro ma ka ototo i maana God.