Read Kahua 2 KORINTO 6 Bible Online

2 KORINTO 6 - Kahua bible

2 KORINTO 6

¹Ngekana igami, mi tagara henia God, kami kanukanugamu, siana ki tâtâ purua ma i pasimi na votovoto, God i bani vategamu.

²Suria God ki tamasi vikê: “Inê kê aganarigi na nunginungiha iami igê na matena gê obania, vi gê tamanigamu. Inê kê tamanigamu igê na tangiana ni tahinga iami.” Mu rongo! I ngekê nga ki na matena God i obania, vi tamanigamu igê. I ngekê nga ki na tangiana, mu girara mu tahitahi igê.

³Igami kami pe obania ta na enoni, vi ge kitakita na tagaraha iamami. Tahema igami kami uhungia nga, hanana vi gami pe nakanaka rârâ igê na ani mavê na marâ getigi, ga hagabarasira na enoni.

⁴Igê na ara ni marâ, mi tanugi, igami kami hagabângenia hete, vi igami ki na kariana God, suria igami kami piringiape bâraha, matena na enoni ka erasigami, ma ka hagamamasiagagami, ma ka hagabarasigami.

⁵Ga tahurugami, ma ka kasigami i ruma ni hagaitangiha, ma ka katoa na perenga tangagami. Ki mangusi ngavê na apemami. Ki barabara tangagami na mêruha ma na ngêra.

⁶Igami kami hagabângenigami maremami, vi igami ki na kariana God, suria igami kami pe nakanaka râ igê na marâ getigi, suria igami kami hagabângenia na takotako mataha, suria igami kami piringiape, ma kami haritagi; renia na Higona Apu, renia na hetakuiha monari iamami,

⁷renia na ateateha iamami renia na monariha, ma renia na raramohana God. Na otoha ki manga na tangaruha iamami i otomami ma i mahamami.

⁸Ga visigami koro ma ka visigami bera. Ga guharigami ma ka hagahigasigami. Ga katogami manga vi igami ka na enoni, ga hagahagaparu, ma igami kami tamasia hete na monariha.

⁹Ga katogami manga vi igami ka na enoni mahuara, ma na enoni hato hete ka giraragami. Ga katogami manga vi igami ka na enoni, ga me, ma ke bâ, igami kami mauri mênga hete. Henaka viga nahuigami, ma igami kami pe meme.

¹⁰Henaka viga hagabono obamami, ma igami kami vagevage tare. Henaka vi igami kami matareha, ma igami kami katora rako na enoni, ka ruruguha. Henaka vi i pe tongasigami ta na marâ, ma igami kami nahunigi nga hete na ara ni marâ hato.

¹¹Goaku hetakui igê na tongesuriha i hinua i Korinto! Igami kami bani tamasigi mave na mêrihamami tangagamu. Igami kami takuigamu i mêrihamami hagenani.

¹²Manga vi na hetakuiha heri iaka, ma ki pe tâtâ manga hanana, ngaia ki mareha vi suria igami, ma suria hete igamu.

¹³Hoi, inê kê tamasi tangagamu, manga vi igamu ki na kareku: mu takuigami tagenana manga igami mi takuigamu. Mu hetakuiheri i mêrihami hagenani!

¹⁴Siana kamu hakunira na enoni, ga pe tongesuri. I pe arari, suria na koroha ma na eraha ki bara, vi garu gâga haku. Manga i he na marara ma na mengo karu girara, vi garu goga haku?

¹⁵Manga i he o Kirisito ma Satana karu girara, vi garu obâbahaku? Manga i he na enoni, i tongesuri, ma na enoni, i pe tongesuri, karu girara, vi garu obâbahaku?

¹⁶Manga i he na ruma iana God ma anina na ataro iata na enoni ahuroto kani girara, vi garu obâbahaku? Suria igia ka na ruma iana na God mamauri. Suria God marena ki vi: “Ngaira kini i pasiku, ma inê kani i pasita. Inê ka na God iata, ma ngaira ka na kariaku.”

¹⁷Tahema na Araha ki vi: “Mu panira ma kamu nakara vê. Siana kamu taugi na tauhata na ahuroto, hanana gê page nahunigamu.

¹⁸Inê ka na vaemami, megamu ki na kareku. Na Araha raramohaga hunia ki tamasi vikana.”