Read Kahua 2 KORINTO 8 Bible Online

2 KORINTO 8 - Kahua bible

2 KORINTO 8

¹Goamami igê na tongesuriha, igami kami obanigamu, vi gamu girara, vi manga i he kani God i hagabângenia na korohana i pasita na haku na enoni i Masetonia, ga tongesuri.

²Henaka vi ngaira ka bani hatamigi bâraha na mamasiaganiha, ma ngaira ka vagevage bâraha, naka ma ngaira ka matareha bâraha, ma ngaira ka mahata ngavê.

³I monari, be vi tangagamu: ngaira ka mahatangenigi ngavê na haga i pasita, ma tani nikâ na haga iata, vi ga mauri re. Ngaira mareta

⁴ka nungigami nga, ma ka obanigami, vi gami hagamarumungenira, ka tamanira na kariana God i Jutea.

⁵Igami kami pe naasira, vi ge tavogi na haga rako vigana! I nago ngaira ka tagarenira mareta tanga na Araha, ma hemuri suria na obaniha iana God ngaira ka tagarenira mareta tangagami nogamami.

⁶Tahema igami kami kanukanua o Tito, i bani haganega na tagaraha ngekê, hanana i uria na tagaraha, ma ki tamanigamu, hanana mu hagahatungia na tagaraha raha na hetakuiha ngekê.

⁷Igamu kamu ruruguha ngavê renigi na ara ni marâ, mu nahunigi: igê na tongesuriha iami, igê na tamasinga iami, igê na giraraha iami, igê na marumuha na hetamaniha iami, ma igê na hetakuiha iami tangagami. Tahema igami kami obanigamu, vi gamu mahata nikâ igê na tagaraha na hetakuiha ngekê.

⁸Inê kê pe bonasigamu. Inê kê hagabângenia ma, vi manga i he na enoni getera kaniga agana ka hetamani. Tahema inê kê uhungia, hanana ve girara, vi na hetakuiha iami ki monari, se mareha.

⁹Renia igamu kamu bani girara na mahatangana iana na Araha iaka o Jesu Kirisito: henaka vi ngaia ki ruruguha ngavê, ma ngaia ki katoa marena ki matareha, hanana i tamanigamu, ma ki katogamu, kamu ruruguha renia na matarehaganiha iana.

¹⁰Na takotako iaku ki manga ikê: i ararigamu, vi gamu hatungia nga na marâ, mu bani haganega i na harisi hato. Igamu kamu haganega kamu mahata, ma nikâ igamu kamu haganega kamu agana, kamu mahata.

¹¹Hoita, mu uria na tagaraha, ma kamu hatungia. Matena mu haganega, kamu agana ngavê. I ararigamu vigamu agana ngavê nikâ, hanana mu hatungia, ma kamu hatungia renigi na marâ, mu nahunigi.

¹²Manga vi igamu, ma kamu agana kamu mahata, God ki page aganarigi na mahatanga iami, manga vi gamu mahatangenigi na marâ, mu nahunigi, suria ngaia ki pe nungigi tenigamu na marâ, ga pe tongasigamu.

¹³Inê kê pe vi, vi ve hagamamasiaga apemi, hanana vigamu tamanira na enoni getera. Ma kê obanigamu ma hete, vi gamu hetagenani henira.

¹⁴Igamu kamu tamanira na enoni, ga matareha, suria i ngekê ka tongasigamu na marâ rako. Ma hemuri vari, manga igamu, ma kamu matareha, ma ngaira ka nahunigi rako na marâ, ngaira ka page tamanigamu nogata. Igê na tarana ngekana igamu kamu hetagenani henira.

¹⁵Renia na Buka Apuna ki vi, “Na enoni, i ruguni rako, ki uhu tanga. Ma na enoni, i ruguni sisite, ki pe marehasia.”

¹⁶Igami kami visia koro God, suria i katoa o Tito, ki agana, ki tamanigamu, manga igami nogamami mi agana, kami tamanigamu.

¹⁷Ngaia ki aganaria na obaniha iamami. Ma suria ngaia ki agana ngavê, ki tamanigamu, tahema ngaia marena ki atea, hanana vi vatugigamu.

¹⁸Henia o Tito igami kami hagatorangenia na goaku igê na tongesuriha, na haku hato na enoni, ga tongesuri, ka hagahigasia bâraha igê na tagaraha iana, i ateate renia na Taroha Koro.

¹⁹Ma nikâ na haku na enoni, ga tongesuri, ka bani atea, ma ka bani kasia, ki takugami igê na râha iamami, ma ki tamanigami, matena mi uria na tagaraha na hetakuiha ngekana, hanana mi hagarahasia na Araha, ma kami hagabângenia, vi igami kami obania, vi gami hetamani.

²⁰Igami kami hagatogo suria, hanana siana na enoni ka visigami, vi gami pe bâsuria bâkoro na mahatanga raha ngekana.

²¹Igami kami obania ma na tarana, i oto i maana na Araha, ma i maata na enoni nikâ.

²²Henirerua igami kami hagatorangenia nikâ ta na goaka igê na tongesuriha. Igami kami bani uhungia hagarako, ma kami tarahua, vi ngaia ki agana ngavê tare, ki hetamani. Ma suria ngaia ki hagêguritogo bâraha renigamu, tahema ngaia ki agana ngavê, ki hetamani teharia i nago.

²³Hoita, o Tito, ngaia ki na tamaku, i tagara heniê, kamuru tamanigamu. Ma na goaka getera igê na tongesuriha, garu râ henia, karu urusira na haku na enoni, ga tongesuri, ma karu hagarahasia o Kirisito.

²⁴Mu hagabângenia, vi gamu takuira, ma kamu hagatanga monari tangara na haku hato na enoni, ga tongesuri, vi i oto tangagami, vi gami ageage renigamu.