Read Kahua GALASIA 1 Bible Online

GALASIA 1 - Kahua bible

GALASIA 1

¹Inê Paulo kê sege tangagamu. Inê ki na aposotolo. I mareha ta na enoni, vi ge ateê be aposotolo, ma ki mareha ta na enoni, vi ge hagatorê. Ngairerua ma o Jesu Kirisito ma God Vaemana, i hagamêria aporo o Jesu tenira na enoni, ga me, kani garu ateê.

²Na goaka hato igê na tongesuriha, ga oga heniê, ka obania, vi korokoro na ogaha iami na haku na enoni i Galasia, mu tongesuria o Jesu Kirisito.

³Igami kami nungirerua God Vaemaka ma na Araha o Jesu Kirisito, karu takuigamu, komanigamu, ma karu korokoro tangagamu.

⁴O Kirisito ki agana ki me, ma ki hagatahigia tenigi na tasi iaka, hanana i rupasigia tenigi na eraha i maveta. Igê na tarana ngegana ngaia ki râ suria na obaniha iana God Vaemaka.

⁵Ge visia raha God tare ma tare ma! I monari!

⁶Inê kê konetenigamu! I pe arihu, megamu kamu pania God, i bani ategamu renia o Kirisito, i takuigamu bâraha, ma kamu rongoa na taroha getea, na taroha na enoni ka visia, vi na taroha koro.

⁷I asa, vi ge oga tani na taroha koro, vi na ani getea. Ma inê kê visia vikê, suria tani na enoni ka haganumanumagamu, ma ka uhungia, vi ga erasia na Taroha Koro renia o Kirisito.

⁸Ma ka ata ni vi ma, manga vi igami, se vi ta na angero iana God, ma kami ateate tangagamu renia na taroha, i râ hegitigi tenia na taroha, mi bani ateate renia tangagamu, igami ki ararigami vi God ki hagaitangigami ngavê.

⁹Igami kami bani visia i nago, ma inê kê visia nikâ i ngekê: manga vi ta na enoni, ma ki ateate tangagamu renia na taroha, i râ hegitigi tenia na Taroha Koro, mu bani tongesuria, ngaia ki araria, vi God ki hagatangia ngavê!

¹⁰Mu takusia vari, gê tamasi vikê, hanana vi gê hagakoro obata na enoni? I asa vê! Inê kê obania, vi gê hagakoro obana God ma! Mu takusia vari, vi inê kê uhungia, vi gê hagakoro obata na enoni? Mareha vê! Manga vi inê, ma kê ama ni uhungia nga, vi gê katokato vikana, inê ki asa, vi na kariana o Kirisito.

¹¹Goaku igê na tongesuriha, inê kê obania be visia tangagamu, na Taroha Koro, gê ateate renia, ngaia ki pe râ me tenia na enoni.

¹²Mareha ta na enoni, vi ge vateê na Taroha Koro, ma ki mareha nikâ ta na enoni, vi ge hagesuriê renia. O Jesu Kirisito ngaia ma marena kani hagagirarê renia.

¹³Igamu kamu bani girara na mêriha iaku, matena gê rotu mênga henira na Siu, ma ki tanu hega kanigê merongasia ngavê na haku na enoni, ga tongesuria God, ma kê uhungia bâraha, vi gê aerasia ngavê hagetage.

¹⁴Inê kê teharira rako era na tamaku na Siu, mi vetage kare igê na tagaraha na rotu iata na Siu. Menê kê râ surigi na ramata iata na êvarimami teharira.

¹⁵Ma God ki takuiê bâraha, ma ki ateê, i nago tarana gê voravora igê, ma ki uniê, kê tagara tanga.

¹⁶Ma na matena ngaia ki hagagirarê maninga renia o Karena, hanana vi gê ateate renia na Taroha Koro tangara na enoni, ga pe Siu, inê kê pe hagatea rârâ ta na enoni renigi na tarana ngegana.

¹⁷Ma nikâ inê kê pe meratamasi rârâ na mane i Jerusaleme, ga bani aposotolo hagenago taraku. Ma inê kê oto râ ma i Arabia, ma hemuri kê aporo i hinua i Tamasiko.

¹⁸I murini na harisi gi oru inê kê râ i Jerusaleme, kê metamasi igê o Petero, ma kê oga i pasina surigi na wiki gi rua.

¹⁹Inê kê pe bâsia rârâ ta na aposotolo getea. Inê kê bâsia ma o Jakobo, na goana na Araha.

²⁰Inê kê tohe renia God, vi inê kê pe hagaparu. Na marâ, gê segea, ki monari!

²¹Hemuri inê kê vatugigi na hinua i Siria me Silisia.

²²I na matena ngekana na haku na enoni i Jutea, ga tongesuria o Kirisito, ka pe bâsiê.

²³Ngaira ka girara ma na tamasinga, na enoni ka visia reniê, ka vi, “I na matena ikê na mane, i merongasigia i nago, ngaia ki ateate tangara na enoni, vi ge tongesuria o Kirisito, ma i nago ngaia ki uhungia, vi aerasira na enoni, ga tongesuri!”

²⁴Ma i ngekana ngaira ka visia koro God reniê.