Read Kahua GALASIA 3 Bible Online

GALASIA 3 - Kahua bible

GALASIA 3

¹Igamu, na Ai ni Galasia, mu beka! O ti kani hagabekasigamu? I tanu hega? Suria inê kê bani visia mataha tangagamu, vi manga i he kano Jesu Kirisito i me igê na kuruse!

²Be hagategamu renia na ani gitage na marâ: na Higona Apu iana God ki angarigamu vari, suria vi gamu katogi na marâ, na Ramata ga bonasigamu renigi, se suria vi gamu tongesuria na Taroha Koro?

³Inê kê pe tongesuria, vi igamu kamu beka ngavê. Na Higona Apu iana God ki bani haganega na mêriha haoru i pasimi. I hega, i ngekê kamu obania vari, vi gamu mauri maremi?

⁴Na ara ni marâ, ga voravora me tangagamu, vari ga voravora me purua ma? I asa!

⁵I hega? God ki ama ni vategamu nga vari na Higona Apu, ma ki katogi vari na meni i pasimi, renia vi gamu katogi na marâ, na Ramata iana o Moise ga bonasigamu renigi, se renia vi igamu kamu rongoa ma kamu tongesuria na Taroha Koro renia Kirisito?

⁶Hoi, bâsia o Abaramo. Na Buka Apuna ki tamasi vikê renia, ki vi: “O Abaramo ki tongesuria God, ma renia na tongesuriha iana tahema God ki visia, vi na parongana ki koro ma ki oto i maana.”

⁷Hoi, i tuguhigamu, vi gamu girara, na raraha monari iana o Abaramo ngaira ki na enoni hato, ga tongesuria God.

⁸Na Buka Apuna ki bani visia i nago, vi God ki page katora na enoni, ga pe Siu, hanana ga korokoro ma ka ototo i maana, renia ga tongesuria God. Tahema na Buka Apuna ki bani tamasi i nago renia na Taroha Koro tanga o Abaramo, ki vi: “God ki page hagakorora na enoni hato i maveta renigo igo.”

⁹O Abaramo ki tongesuria God, tahema God ki hagakoroa. Tahema God ki hagakorora na enoni hato, ga tongesuria, tagenana ma manga i hagakoroa o Abaramo.

¹⁰Na enoni, ga takusia, vi ga koro ma ka oto i maana God, suria vi ga râ surigi na Ramata iana o Moise, ngaira ka mauri, ma ka girara tare, vi God ki page surira ki hagaitangira. Renia na Buka Apuna ki vi: “God ki surira ki hagaitangira na anima na enoni, ga pe arâ tare surigi na ara ni Ramata iana o Moise.”

¹¹Tahema i rongo mataha, vi mareha rârâ ta na enoni, vi ge koro ma ke oto i maana God, suria vi ngaia ki râ surigi na Ramata iana o Moise. Renia na Buka Apuna ki vi: “Na enoni, i koro ma ki oto i maana God, renia i tongesuria God, ngaia ki page nahunia na mauriha mora.”

¹²Ga arâ suria na Ramata iana o Moise ma ka tongesuria God, na tarana gi rua ngegê karu tora hegitigi. Ma kamu bâ, na Buka Apuna ki vi, “Na enoni, i marupegi nga na ara ni marâ, na Ramata ga visigi, ngaia ki page mauri renigi.”

¹³Ma o Kirisito ki me renigia manga vi ngaia nga ka na enoni era. Tahema ngaia ki rupasigia tenia na suriha, i râ me tenia na Ramata. Suria na Buka Apuna ki vi: “God ki bani suria ki hagaitangia na ani mavê na enoni, i kavire igê na apinige tarataravoro.”

¹⁴O Kirisito ki kato vikana, hanana renia o Kirisito Jesu God ki vatera na enoni, ga pe Siu, na marâ koro, i bani surugi tanga o Abaramo, ma hanana na Higona Apu, God i bani surua, ki angarigia, renia igia ka tongesuria o Kirisito.

¹⁵Goaku igê na tongesuriha, be hagararingenia vikê na tarana ngekê tangagamu. Matena na enoni gi rua karu henganingani igê ta na marâ, ma karu surusuru heri, ki apu hagetage na hitangiterua, vi ge aharêngia na suruheri ngekana, se vi ge naka banu me igê ta na tarana getea.

¹⁶Hoita, God ki naka na suruheri henia o Abaramo ma henia na vere tage togo tenia na raraha iana. Na Buka Apuna ki pe vi, vi “tangara ma na raraha iana”, i vi rako na enoni. Ngaia ki vi ma hete “tanga ma na vere tage togo tenia na raraha iamu”, i vi, vi na ani gi tage togo ma, ngaia ki no Kirisito.

¹⁷Na marâ, gê bani visia, ki manga ikê: God ki naka na suruheri henia o Abaramo, ma ki vi, vi i page hagamonaria na suruha iana. Na suruha iana God ki râ me hagenago, ma i murini na tangarê ge he matara na tangahuru gi oru na harisi ka kahu vora me na Ramata iana o Moise. Na Ramata ngegana ki asa, vi ge aharêngia, se vige naka vê na suruha iana God.

¹⁸Manga vi na votovoto iana God, ma ka arâ me tangagia, suria vi igia ka râ surigi na Ramata iana o Moise, ngekana ngaigi ki pe râ me tangagia suria na suruha iana God. Ma renia God ki bani surugi na marâ koro tanga o Abaramo, tahema ngaia ki votogi tanga.

¹⁹Hoi, ma suria na ta kaniga oga na Ramata iana o Moise? Na Ramata ka banu me ma henia na suruheri, hanana ga hagagirarara na enoni, vi ngaira ka tasi monari, matena ga tanugi na tarana, ga pe koro. Ma God ki obanigi na Ramata ngegana, vi ga gâga, mataro me na matena i arâ me igê o Kirisito, na raraha iana o Abaramo, na ani God i bani surua tanga. Na angelo ka hagatarêngenigi na Ramata tanga o Moise, ma o Moise ki hagatarêngenigi tangara na enoni.

²⁰Na hagatora tamasinga ki arari i berarogaterua na vererua, ma ki manga vi na vere tage togo na enoni, ki asa. Ma God ki na vere togo ma.

²¹I monari vari, vi na Ramata ka urapusigi na suruha iana God? Mareha vê! Manga vi God, ma ke bani vatera na enoni na ramata, ga girara ga vatera na enoni na mauriha mora, ngekana, na enoni ki korokoro ma ki ototo i maana God, suria vi ngaia ki râ surigi na Ramata.

²²Ma na Buka Apuna ki vi, na enoni hato i maveta ka vanasigi na tasi, hanana God ki girara i vatera na enoni, ga tongesuria, na marâ, ngaia i bani surugi tangara. Ma ki tarahura na tarani ngegana, suria ma ngaira ka tongesuria o Jesu Kirisito.

²³Ma i nago matena na tongesuriha renia o Kirisito ki mamênga, na Ramata iana o Moise ka rakugia hato mangara na enoni, ga oga igê na ruma ni hagaitangiha, mataro me na matena God i hagabângenia igê na tongesuriha ngekê.

²⁴Hoita, na Ramata iana o Moise ka bonasigia ma ka hagesurigia mataro me na matena, i râ me igê o Kirisito, hanana igia ka girara ga korokoro ma ka ototo i maana God renia na tongesuriha iaka.

²⁵Ma i ngekê na matena, ga tongesuria igê o Kirisito, ki bani râ me. Tahema na Ramata ka hato, vi ge bonasigia, se vi ge hagesurigia nikâ.

²⁶Renia na tongesuriha iami igamu hato kamu vora re na karena God, ma kamu obahaku henia o Kirisito Jesu.

²⁷Renia mu batesimo, igamu kamu obahaku henia o Kirisito. Ma ngekana igamu kamu bani atea, vi gamu maratorana o Kirisito.

²⁸Tahema, henaka ga oga na Siu ma na enoni, ga pe Siu, na enoni vurivuri ma na enoni aharupa, na mane ma na gete, igamu kamu tagenami ma. Igamu hato kamu oga igê na obahahaku henia o Kirisito Jesu.

²⁹Manga o Kirisito ma ki nahunigamu, igamu ki na raraha iana o Abaramo, ma kamu page taugi na marâ, God ki bani surugi.