Read Kahua GALASIA 5 Bible Online

GALASIA 5 - Kahua bible

GALASIA 5

¹Igia ka aharupa ngavê, renia o Kirisito i bani rupasigia! I manga ngekê mu ramoramo, kamu aharupa tare, hanana siana ka rakugamu aporo.

²Mu rongo! Inê, Paulo, be vi tangagamu, manga mu hagamarumungenira na enoni, ka retegi râ na gavoni na varami, hoi, o Kirisito ki asa hagetage, vi ge page tamanigamu.

³Nikâ be visia tangagamu aporo, na anima na mane, i hagamarumungenira na enoni, ka retea râ na gavona na varana, ki tuguhia, i arâ surigi na Ramata hato iana o Moise.

⁴Na enoni i pasimi, ga uhungia, vi ga voravora koro ma ka oto i maana God, renia vi ga arâ surigi na Ramata iana o Moise, ngaira ka bani râ tenia o Kirisito. Igamu kamu bani hura tenia na korohana God.

⁵Ma igami, igami kami girara, ma mi naasia, vi God ki page hagakorogami. Ma na tarana ngekana igami kami naasia, suria na Higona Apu iana God ki tamanigami renia na tongesuriha iamami.

⁶Matena igami kami obahaku henia o Kirisito Jesu, ki tagenana ma, henaka ga retegami se ga pe retegami. Ma na tarana hete i raha, ngaia ki na tongesuriha, i hagabângenia marena igê na hetakuiha.

⁷I nago igamu kamu tavoraha bâkoro era! O ti ki hagabarasigamu, kamu naka vê na morana na Taroha Koro? Manga i he kani kanukanugamu?

⁸God ki mareha, suria ngaia ki bani ategamu.

⁹Mu girara na tarana ikê, “Na kere isiti sisite ki ahunga renia na makona, ma ka raharaha na bereti.”

¹⁰Ma inê kê tako togo renigamu mênga. Renia igia hato ka haku henia na Araha, inê ke tako togo renigamu, vi igamu kamu pe râ surigi na takotako getigi, ma kê girara bâkoro, vi God ki page hagaitangia na mane, i erasigamu, henaka vi o ti kani ngaia.

¹¹Ma tangê inê mareku, goaku igê na tongesuriha, manga inê, ma kê ama ni ateate nga, vi na enoni ki tuguhira viga retegi râ na gavoni na varata, suria hega kaniga merongasiê? Manga ve kato vikana, na ateateha iaku renia na mera iana o Kirisito igê na kuruse ki asa, vi ge hagamangariagara.

¹²Inê kê takusia ma, vi na enoni, ga aerasigamu, ki ararira nga: viga retegi râ na gavoni na varata, ma ka voera mareta nikâ!

¹³Ma igamu, goaku igê na tongesuriha, God ki bani obanigamu bâraha, vi gamu aharupa. Ma renia mu aharupa igê na tarana ngekana, siana kamu takusia, vi i koro ma, kani vigamu arâ surigi na tarani era, na apemi ga tenigi. Mareha! Mu hetakuiheri ma kamu hekomaniheri.

¹⁴Na ramata gi tage ki hagatarobêgi na Ramata hato iana o Moise. Na ramata ngekê ki vi: “Go takuira na enoni getera manga igo maremu.”

¹⁵Manga mu mauri manga na o vasiga, ga hegaragara ma ka ngaura na tamata, hoi, mu hinaru, manga i mareha, igamu kamu page erasigamu maremi hagetage.

¹⁶Na takotako iaku ki manga ikê: na Higona Apu ki araria, i hagaotogi na mêriha iami, ma siana kamu arâ surigi na teniha era i obami.

¹⁷Renia na teniha era i obana na enoni ki rêrapusigi na marâ, na Higona Apu i obanigi. Ma na marâ na Higona Apu i obanigi, ka rêrapusigi na teniha era i obana na enoni. Ngairerua karu hemeronge. Tahema i pe ararigamu, vi gamu tanugi na tarani, mu tenigi.

¹⁸Manga na Higona Apu, ma ki hagaotogamu, na Ramata iana o Moise ki asa, vi ge bonasigamu.

¹⁹Na ara ni enoni ka bani giraragi na marâ, ga voravora me tenia na teniha era i obana na enoni. Renigi na teniha era ngegana i obata na enoni, ngaira ka gamogamo ma ka paronga era, ma ka tatagara bera.

²⁰Ngaira ka vogasira na ataro, ma ka hekuasi. Na enoni ka hemeronge, ka heariha, ka hemangari, ma ka heparoparo. Ngaira ka hevoavoa so mareta tani ma tani.

²¹Ngaira ka hengarira na enoni getera, ka totono papasi ma ki ruguhira, ka tono ma ka ngêngê papasi, ma ka mâmâ bera, ma ka tanugi na ani getigi na marâ, ga mangagi na tarani ngegana. Inê kê vi tangagamu, manga gê bani vi tangagamu i nago: na enoni ga katogi na tarani ngegana, ki asa iata, vi ge page têa na tamasinga iana God na Araha.

²²Ma na Higona Apu ki katora na enoni, ka hetakuiheri, ka vagevage monari i obata, ka marape, ka piringiape, ka hekomaniheri, ka hekorokoro, ka hetongesurige,

²³ka haritagi, ma ka hagaotora mareta. I asa na ramata, vige tamasi pusigi na tarani mangagi na ani ngegana.

²⁴Ma na kariana o Kirisito Jesu ka bani hagamesigi na parongata era henigi na teniha era ma na obaniha era.

²⁵Na Higona Apu ki bani votoa na mauriha tangagia. Tahema i koro, ki hagaotogi na mêrihaka.

²⁶Siana igia ka paroparo, se viga hemangari, se viga hengari.