Read Kahua GALASIA 6 Bible Online

GALASIA 6 - Kahua bible

GALASIA 6

¹Goaku igê na tongesuriha, manga mu tarahua ta na enoni, i tasitasi igê tani na tarana, i pe koro, na enoni i pasimi ki tuguhira, ga tanugi na marâ, na Higona Apu i obanigi, ka hagaotoa. Ma kamu hagaotoa maninga ma. Ma kamu hinaru, hanana igamu nogami siana kamu tasitasi.

²Igamu kamu hetamaniheri igê na ara ni marâ, ma igê na tarana ngekê igamu kamu râ suria na ramata iana o Kirisito.

³Manga ta na enoni, ma ki hagarahasia marena purua ma, ngaia ki hagaparua marena.

⁴Na ara ni enoni, ki tuguhia, i bâsia so na parongana marena, manga vi i koro, se i pe koro. Manga i koro, ua, i araria, i ageage renia na parongana, ma siana hagetage henia na parongana na enoni getea.

⁵Na ara ni enoni ki tuguhia, i katoa na tagaraha iana marena.

⁶Na enoni, i hagesuringenia na hagesuringa iana o Kirisito, ki tuguhia, i meratongani na mane ni hagesuringa iana renigi na ara ni tarana koro i pasina.

⁷Siana kamu bagatatako! I asa ta na enoni, vi ge hagabekasia God. Na enoni ki opaopa nga na marâ, i hasigi marena.

⁸Suria na tamasinga maramaraveta ngekê, na enoni, i arâ surigi na teniha era iana, ki page tarahua na mera. Ma ki manga i arâ surigi na obaniha iana na Higona Apu, ngaia ki page tarahua na mauriha mora ma tarema.

⁹Tahema, siana ki meme na apeka, vi ge hekomaniheri. Vikana, manga vi igia, ma ka ama ni hekomaniheri nga, i muri me igia ka page tarahua na harisi koro.

¹⁰Hoita, i tuguhigia, ga komanira na goaka igê na tongesuriha i na ara ni matena, ma na enoni hato getera nikâ.

¹¹Mu bâsigi na segesegeha, ga raha. Inê kê sege mareku tangagamu i ngekê.

¹²Na enoni, ga uhungigamu ma ka bonasigamu, vi ga retegi râ na gavoni na varami, ngaira ki na enoni, ga hagarahasira mareta, ma ka tamasi paroparo renigi na apeta. Ngaira ka paronga vikana, suria ngaira ka pe obania, vi ge hatamia na mamasiaganiha renia na mera iana o Kirisito igê na kuruse.

¹³Ma na enoni, ga obania, vi ga retegamu, ka pe râ surigi na Ramata iana o Moise nikâ. Ngaira ka obania ma, vi ga retegamu, hanana vi ga tamasi paroparo, renia mu hagamarumungenira, ga retegi râ na gavoni na varami.

¹⁴Ma tangê inê mareku, inê be ageage ma renia na mera iana na Araha iaka o Jesu Kirisito igê na kuruse. Renia o Kirisito ki me igê na kuruse, na tarani, na enoni ga takusigi, vi ga raha, ka bani me teniê, ma inê kê bani me tenigi.

¹⁵I tagenana ma, henaka manga vi ga retea râ na gavona na varana na enoni, se mareha. Na tarana purua ma ngekana. Ma na marâ, i raha hete, ki manga ikê: God ki hagahârungigia, hanana vi igia ka korokoro ma ka ototo i maana.

¹⁶Inê kê nungia God, ki vatea na korohana ma na takuiha iana tangara na enoni, ga râ suria na takoha ngekê, ma tangara na kariana hato God nikâ!

¹⁷Na tarana gi tage be visia nikâ: siana ta na enoni ki hagamamasiaga apeku nikâ, suria na oreku ka hagabângenia, vi inê ki na kare vurivuri iana o Jesu.

¹⁸Goaku igê na tongesuriha, inê kê nungia na Araha iaka o Jesu Kirisito, ki komanigamu ma ki koro tangagamu hato. Vikana nga.