Read Kahua EPESO 1 Bible Online

EPESO 1 - Kahua bible

EPESO 1

¹Inê Paulo. God ki bani ateê, kê aposotolo iana o Kirisito Jesu. Inê kê sege tangagamu, na kariana God, mu oga i hinua i Epeso, ma kamu hagabângenia na tongesuriha iami igê na mêrihami, mu obahaku henia o Kirisito Jesu.

²Inê kê nungirerua God Vaemaka ma na Araha iaka o Jesu Kirisito karu korokoro tangagamu, ma karu vategamu na marapeha.

³Ge visia koro God, Vaemana na Araha iaka o Jesu Kirisito. Renia ngaia ki bani koro tangagia, renia igia ka obahaku henia o Kirisito, suria tenia i pasina ngaia ki vategia na ara ni marâ koro tangagi na ataroka.

⁴Matena i mamênga, vi ge hagavora na maveta, God ki bani ategia, ka vora na anina i Kirisito, hanana vi igia ka korokoro ma ka ototo, ma ka matarotaro i maana. Suria ngaia ki takuigia,

⁵God ki bani kato, hanana vi ngaia ki toregia tanga ngaia marena, ka vora re na kare têtê iana renia o Jesu Kirisito.

⁶Ge visia raha God renia na korohana raha teha tangagia, i bani mahatangenia renia o Karena hetakui.

⁷Suria o Kirisito ki me, God ki bani bonotenigi na tasi iaka, ma igia ka aharupa. I raha teha na korohana God,

⁸i mahatangenia ngavê tangagia. God ki tako mataha teha, ma ki giraragi na ara ni marâ hato.

⁹Tahema ngaia ki tanugi na marâ, ngaia i bani katogi, ma ki hagagirararagia renia na katoha pinihi iana, ngaia i bani naka, hanana i hatongia renia o Kirisito.

¹⁰God ki page hatongia na katoha iana igê na matena, i araria. Na katoha ngekana ki manga ikê: ngaia ki page hakura na ara ni marâ hato, i bani hagavorara, na ara ni marâ hato i vavearo ma i maveta, ma ki page naka o Kirisito, ki marungira.

¹¹Na ara ni marâ hato ka vora me surigi na katoha ma na obaniha iana God. Ma God ki ategia na kariana marena, ga obahaku henia o Kirisito, suria na katoha iana marena, i bani naka me i nago kere vê noga.

¹²Tahema igami, na ani mi hagenago, kami naasia o Kirisito, kami visia raha God raramohaga hunia.

¹³Ma igamu nikâ mu bani vora re na kariana God, matena igamu kamu rongoa na tamasinga monari, na Taroha Koro, i vategamu na tahinga. Igamu kamu bani tongesuria o Kirisito, ma God ki bani segegamu, kamu vora na anina, renia i bani vategamu na Higona Apu, i bani surua.

¹⁴Renia God ki bani vategia na Higona Apu, igia ka girara bâkoro, vi igia ka page nahunigi na marâ, God i bani surugi tangara na kariana, ma igia ka girara bâkoro nikâ, vi God ki page katora na kariana, hanana ga aharupa hagenani ngavê. Ge visia raha na korohana ma na raramohana God.

¹⁵Tahema, matena gê haganega kê rongo, vi igamu kamu tongesuria na Araha o Jesu, ma kamu takuira na kariana hato God,

¹⁶inê kê ama ni visia koro nga God renigamu. Inê kê takusigamu tare igê na nunginungiha iaku,

¹⁷ma kê nungia God raramohaga hunia, Vaemana na Araha iaka o Jesu Kirisito, ki vategamu na Higona Apu, ki page hagatako obami, ma ki page hagagiraragamu renia God, hanana igamu kamu aitangisia God.

¹⁸Inê kê nungia God, ki mavesigi na aitangihami, hanana mu page girara na marâ, mu naasia, vi gamu page nahunia suria na suruha iana tangagamu; hanana mu page giraragi, vi ga raha ma ka koro teha ngavê na votovoto, i surugi tangara na kariana;

¹⁹hanana mu page girara, vi i raha teha na raramohana, i tagara i pasika na enoni, ga tongesuria o Kirisito. Na raramohana ngekê i pasika ki na raramohana raha hunia,

²⁰God ki hagamêria aporo o Kirisito renia, ma ki kasia ki Araha i pasina.

²¹I ngekana o Kirisito ki marungigi na atohata na ara ni ramoha hato i vavearo, na ani ga nahuni ramoha, na ani ga ramata tangara na enoni ma na ani ga araha. Ngaia ki teharira na ara ni araha hato i maveta ikê ma i muri me.

²²God ki nakagi na ara ni marâ hato i ruguhana o Kirisito, ma ki naka o Kirisito manga na Araha, i teha ma ki marungia na haku na enoni, ga tongesuri, ma ki marungigi na ara ni marâ hato. O Kirisito ma na haku na enoni, ga tongesuri, ki manga na apena hagenani na enoni. O Kirisito ki manga na bêna.

²³Na haku na enoni, ga tongesuri, ki manga na apena, i hagauhua o Kirisito na bêna, i hagauhugi nogana na ara ni marâ hato i na ara ni agua.