Read Kahua EPESO 2 Bible Online

EPESO 2 - Kahua bible

EPESO 2

¹I nago igamu kamu me surigi na guguruganiha ma na tasi iami.

²Igê na matena ngekana igamu kamu râ suria na tarana na eraha ni maveta. Igamu kamu tê viteana na araha iata na ataro era i bevoa purua. I ngekê na ataro ngekana ki marungira na enoni, ga guguruga tanga God.

³I monari, i nago, igia hato, ka mangara ngaira, ma igia ka râ surigi na teniha era iaka, ma ka katogi na ani mavê na marâ era, na apeka ma na aitangihaka ga tenigi. Tagenana mangara na enoni hato getera, igia nogaka ki ararigia, vi hagaitangigia God.

⁴Na takuiha iana God ki raha teha, ma ngaia ki takuigia ngavê.

⁵Tahema, matena igia ka me renigi na guguruganiha iaka, ngaia ki hagamêrigia aporo henia o Kirisito. Renia na korohana nga God ngaia ki bani hagatahigamu.

⁶Renia igia ka obahaku henia o Kirisito Jesu, tahema God ki hagamêrigia aporo henia, hanana igia ka araha henia i pasina.

⁷Ngaia ki kato vikana, hanana i hagabângenia tare nga na korohana, i raha teha igê na hetakuiha iana tangagia i Kirisito Jesu.

⁸Renia na korohana nga God ngaia ki bani hagatahigamu, suria mu tongesuri. Mareha vi igamu maremi, ma na mahatana hete God.

⁹Igamu kamu pe nahunia na marâ, ge tonga hunana, hanana vi gamu ageage renia, suria igamu maremi kanimu pe katoa.

¹⁰God ki bani hagavoragia, ma ngaia ki hagavoragia, hanana vi ga obâbahaku henia o Kirisito Jesu, ma ka tanugi na tagaraha koro, i bani nakagi tangagia, vi ga katogi.

¹¹Igamu kamu bani vora me, manga hanana nogami na enoni, mu pe Siu. Na Siu ga visigamu, vi ga pe retegi râ na gavoni na varami. Ma ngaira mareta ka visira mareta, vi ga retegi na gavoni na varata. Na tarana ngekana ki vi, vi ngaira mareta na enoni kaniga katoa tangagi na apeta. Mu takusia, i nago igamu kamu manga i he?

¹²I na matena ngekana igamu kamu purunguni mênga renia o Kirisito. Igamu kamu mamahuara, ma igamu kamu mareha vi na enoni, God i bani atera tanga ngaia marena. Igamu kamu pe nahunigi na suruheri, ga tonga hunani igê na suruha iana God tangara na kariana. Igamu kamu oga ikê i maveta, ma kamu pe nahunia na naasiha, suria mu purunguni mênga renia God.

¹³Ma i ngekê igamu kamu kahu obahaku henia o Kirisito Jesu. I nago igamu kamu oga hagatê, ma i ngekê igamu kamu oga hagarangi renia na mera iana o Kirisito.

¹⁴Renia o Kirisito marena ki bani vategia na marapeha, suria ngaia ki bani katora na Siu ma na enoni, ga pe Siu, ka vora re na haku gi tage ma. Suria ngaia ki vora enoni, ngaia ki bani hogea na para, i bani voasira, ma ki katora, ka hemeronge.

¹⁵Ngaia ki bani kasigi na Ramata i na Buka Apuna iata na Siu henigi na tamasinga ma na tauha igê, hanana i katora na Siu ma na enoni, ga pe Siu, ka voravora re na haku gi tage na enoni, ga obahaku henia ngaia marena. Igê na tarana ngekana ngaia ki katora, ka hekorokoro.

¹⁶Renia o Kirisito ki me igê na kuruse, ngaia ki hatungia na hemerongeana iata. Renia na mera iana igê na kuruse ngaia ki hakura na Siu ma na enoni, ga pe Siu, igê na haku gi tage togo, ma ki hagaporosira tanga God.

¹⁷Tahema o Kirisito ki râ me, ma ki tarohenia na Taroha Koro renia na marapeha tangagia hato: tangagamu na enoni, mu pe Siu, igamu kamu hagatê tenia God, ma tangagami na Siu, igami kami hagarangia God.

¹⁸Renia nga o Kirisito igia hato, na Siu ma na enoni, ga pe Siu, igia ka obahaku henia na Higona Apu i gi tage togo, ma ka girara ga arâ i pasina God Vaemaka.

¹⁹Tahema igamu na enoni, mu pe Siu, ki hato, vi gamu mamahuara nikâ, se vi gamu vora vi na enoni getegamu râ nikâ. I ngekê igamu ki na tamata na kariana God, ma kamu hegoata igê na ahemata iana God.

²⁰Igamu nogami kamu manga ta agua na ruma. Na aposotolo ma na poropete ngaira ka mangagi na una na ruma, mo Kirisito Jesu marena ki manga na rangata na hagêguringa na ruma.

²¹Ngaia ki na ani, i taua gatagata na ruma hagenani, ma ki katoa, ki voravora re na ruma apuna iana na Araha.

²²Igê na obahahaku henia o Kirisito, igamu nogami na Higona Apu ki tagarahigamu henigami renia na ruma tanga God.